જાણો, સુરતમાં LIC કર્મચારીઓએ સરકાર વિરુદ્ધ સૂત્રોચ્ચાર કરવાની કેમ જરૂર પડી?

LIC સુરત ડિવિઝના કર્મચારીઓ આજે પોતાની પડતર માગણીઓને લઈને એક દિવસની રાષ્ટ્ર વ્યાપી હડતાલમાં જોડાયા હતા. ખાનગીકરણ અને નવી ભરતી સહિત અન્ય મુદ્દાઓને લઈ કર્મચારીઓમાં છેલ્લા કેટલાક સમયથી રોષ છે. આથી સુરત ખાતે કર્મચારીઓએ સૂત્રોચ્ચાર કરી સરકારની નીતિઓ અંગે વિરોધ વ્યક્ત કર્યો હતો.

• LICના ખાનગીકરણને લઈને કર્મચારીઓમાં રોષ
• સુરત ડિવિઝનના કર્મચારીઓએ કર્યો વિરોધ
• પડતર માગણીને લઈને કર્મચારીઓ મેદાને
• એક દિવસની રાષ્ટ્રવ્યાપી હડતાલમાં જોડાયા કર્મચારીઓ

સુરત: એક દિવસની રાષ્ટ્ર વ્યાપી હડતાલમાં LIC સુરત ડિવિઝનના વર્ગ 3 અને 4ના કર્મચારીઓ જોડાયા હતા. તમામ કર્મચારીઓ મુગલીસરા ખાતે આવેલી મુખ્ય કચેરી બાહર એકત્ર થઈ સરકારની નીતિઓ સામે સૂત્રોચ્ચાર કર્યા હતા. એલઆઈસીના કર્મચારીઓ દ્વારા આક્ષેપ કરવામાં આવ્યો હતો કે, ભારત સરકારની નીતિ કર્મચારી વિરોધી, લોક વિરોધી, ખેડૂત વિરોધી છે.

LICના દરેક કર્મચારીઓ માટે જૂની પેન્શન સ્કિમ-1995 ચાલુ કરવા માગ

કર્મચારીઓની માગ છે કે, નવી પેન્શન પદ્ધતિ (NPS)ને રદ કરી LICના દરેક કર્મચારીઓ માટે જૂની પેન્શન સ્કિમ-1995 ફરીથી ચાલુ કરવામાં આવે. વર્ગ-4માં ભરતી કરાય અને જાહેર ક્ષેત્રોને ખાનગીકરણ કરવામાં ન આવે. આ તમામ વિવિધ માંગણીઓના સંદર્ભમાં કર્મચારીઓ એક દિવસની હડતાલ પર ઉતર્યા હતા.