દેશમાં પ્રથમ સરકારી શાળા શરૂ, આ શાળાને જોતા જ ખાનગી શાળા ભુલી જશો, જાણો સુવિધાઓ...

દેશમાં કોરોનાની કપરી પરિસ્થિતિને લઈને છેલ્લા 1.5 વર્ષ કરતા પણ વધારે સમયથી શાળાઓ બંધ છે, ત્યારે હાલ સમગ્ર દેશમાં પ્રથમવાર સુરતની સરકારી શાળાને શરૂ કરવામાં આવી છે. શાળા શરૂ શતા જ 1500થી વધુ વિદ્યાર્થીઓએ એડમીશન મેળવ્યા છે. આ શાળામાં આચાર્ય અને શિક્ષકો દ્વારા વિદ્યાર્થીઓને ડિજીટલ માધ્યમથી ભણાવવામાં આવી રહ્યા છે. આ શાળામાં CCTV, ડિજિટલ બોર્ડ, મલ્ટીમીડિયા રૂમ સહિત હાઈટેક સાયન્સ લેબ સહિતની તમામ સુવિધાઓ વિદ્યાર્થીઓ માટે ઉપલબ્ધ છે.

• સરકારી શાળામાં વિદ્યાર્થીઓને ડિજીટલ માધ્યમથી ભણાવવામાં આવે છે
• શિક્ષકો વર્ગખંડમાં પુસ્તક નહીં, પરંતુ લેપટોપ લઈને આપે છે બાળકોને શિક્ષિણ
• સરકારી શાળામાં CCTV, ડિજિટલ બોર્ડ, મલ્ટીમીડિયા રૂમનો સમાવેશ કરવામાં આવ્યો

સુરત : દેશમાં પ્રથમવાર સુરત શહેરમાં સરકારી શાળાઓમાં ધોરણ 11 ના વિદ્યાર્થીઓ માટે અભ્યાસ શરૂ કરવાનો નિર્ણય કરવામાં આવ્યો હોવાથી હાલ શાળાઓ શરૂ થઈ ગઈ છે. જેમાં અનેક વિદ્યાર્થીઓ એવા છે કે, જે પ્રાઇવેટ શાળાઓ છોડીને સરકારી શાળામાં પ્રવેશ મેળવ્યો છે. સરકારી શાળાના શિક્ષકો માઇક્રોફોન અને સ્પીકરના માધ્યમથી ધોરણ 11 કોમર્સ અને સાયન્સના વિદ્યાર્થીઓને ભણાવી રહ્યા છે, એટલું જ નહીં શિક્ષકો વર્ગખંડમાં પુસ્તક નહીં, પરંતુ લેપટોપ લઈને ડિજિટલ માધ્યમથી બાળકોને શિક્ષિત કરી રહ્યા છે.

શાળાને જોઈને અચંબામાં મુકાઈ જશો

સુરતમાં હાલમાં જ દેશમાં પ્રથમવાર સરકારી શાળાઓમાં ધોરણ 11 કોમર્સ અને સાયન્સના વર્ગખંડોની શરૂઆત કરવામાં આવી છે. શાળાઓમાં 1500થી વધુ વિદ્યાર્થીઓએ એડમીશન મેળવ્યા છે. કોરોનાના કપરા કાળના કારણે પ્રાઇવેટ શાળાઓમાં નહીં ભણાવી શકનાર વાલીઓએ પોતાના બાળકોને સરકારી શાળામાં એડમીશન અપાવ્યું છે, પરંતુ હાલ શાળાની પરિસ્થિતિ જોઈએ તેઓ પણ અચંબામાં મુકાઈ ગયા છે, કારણ કે સરકારી શાળામાં CCTV, ડિજિટલ બોર્ડ, મલ્ટીમીડિયા રૂમ સહિત હાઈટેક સાયન્સ લેબ સહિતની તમામ સુવિધાઓ ઉપલબ્ધ છે.

ડ્રાસ્ટીક ચેન્જ જોવા મળ્યો

M.A. B. Ed ની ડિગ્રી ધરાવતા શાળાની શિક્ષિકા સપનાએ જણાવ્યું હતું કે, પ્રાઇવેટ શાળામાં ભણાવીને આવી છું. અહીં સરકારી શાળામાં કેવી રીતે ભણાવવું તે મોટો પ્રશ્ન હતો, પરંતુ અહીં આવીને ડ્રાસ્ટીક ચેન્જ જોવા મળ્યો છે. આ સરકારી શાળા લાગતી જ નથી, આ એક પ્રાઇવેટ શાળા લાગે છે. ચારે બાજુથી વર્ગખંડમાં હવા ઉજાસ આવે છે. બાળકો પણ ડિજિટલ માધ્યમથી ભણે છે. અમે માઇક્રોફોન વાપરીએ છે. જેના સ્પીકરથી છેલ્લી બેંચ પર બેઠેલા વિદ્યાર્થીઓને પણ સારી રીતે વિષયની માહિતી મળે છે.

CCTV કેમેરાથી સજ્જ શાળા

શાળાના આચાર્ય મિનેશ ઠાકરે જણાવ્યું હતું કે, સુમન હાઈસ્કૂલ વર્ષ 2017માં શરૂ થઈ હતી. હાલ જે સમયની માંગ છે અને માધ્યમિક બોર્ડ દ્વારા જે જરૂરી છે તે જ પ્રકારની સુવિધાઓ અમારી શાળામાં છે. અમે અહીં ડિજિટલ માધ્યમથી વિદ્યાર્થીઓને શિક્ષણ આપીએ છીએ. શાળામાં શિક્ષકો પુસ્તકો લઈને નહિ, પરંતુ લેપટોપ લઈને ભણાવવામાં આવે છે. 32 જેટલા CCTV કેમેરા, 15 ક્લાસરૂમ, કોમ્યુનિટી હોલ, સાયન્સ લેબ, ડ્રોઈંગરૂમ જેવી સુવિધાઓ પણ બાળકો માટે છે. ભારતીય સંસ્કૃતિથી બાળકો અવગત થાય અને તેને ભૂલી ન જાય તે માટે દરેક વર્ગખંડને મહાપુરુષોના નામો આપવામાં આવ્યા છે.

પ્રાઈવેટ શાળા કરતાં પણ સારું ભણતર

વાલી વિજયભાઇએ જણાવ્યું હતું કે, અગાઉ મારો દિકરો પ્રાઈવેટ શાળામાં ભણતો હતો. કોરોનાકાળમા આર્થિક પરિસ્થિતિ બગડતા મારી સ્થિતિ મોંઘી ફી ભરવાની રહી નહોતી. આથી, મારા બાળકનું એડમીશન સરકારી શાળામાં કર્યું છે. મને સંતોષ છે કે જે સુવિધાઓ તેને ખાનગી શાળામાં મળી રહી હતી તે હાલ સરકારી શાળામાં પણ મળી રહી છે. હું કહું છું કે પ્રાઈવેટ શાળા કરતાં પણ સારું ભણતર અહીં મળી રહે છે. પ્રાઇવેટ શાળા કરતાં પણ વધારે સુવિધા અહીં મળે છે. જો બાળક શાળાએ સમયસર નહીં પહોંચે તો શિક્ષકો સંપર્ક કરી કારણ પૂછે છે.

ભણતરમાં શિક્ષકો કરે છે મદદ

વિદ્યાર્થી અક્ષિતે જણાવ્યું હતું કે, તે અગાઉ પ્રાઇવેટ શાળામાં ભણતો હતો. સરકારી શાળામાં આવ્યા પછી જાણવા મળ્યું કે અહીં શિક્ષણ સૌથી સારું મળે છે. ભણતરમાં શિક્ષકો મદદ કરે છે અને ઉત્સાહ વધારે છે, આ ઉપરાંત ડિજિટલ બોર્ડના માધ્યમથી વિદ્યાર્થીઓને ભણાવવામાં આવે છે.