સુરતમાં તમામ સ્મશાનગૃહમાં 24 કલાક મૃતદેહોની અંતિમ ક્રિયા શરૂ

દરરોજ શહેરમાં કોરોના પોઝિટિવ સહિત સેંકડો દર્દીઓ મોતને ભેટતા સ્મશાન ભૂમિમાં લોકોનો ભારે ધસારો જોવા મળી રહ્યો છે. ડાઘુઓએ અંતિમ ક્રિયા માટે લાંબી કતારોમાં ઊભા રહી મૃતદેહોની લાઈનો લગાવવી પડી રહી છે. સુરતમાં એવી સ્થિતિ આવી છે કે, ચોવીસ કલાક સ્મશાન ભૂમિ કાર્યરત છે અને લિમિટેડ સ્ટાફ દ્વારા મૃતદેહોની અંતિમક્રિયા કરવામાં આવી રહ્યી છે.

• કોરોનાના પહેલા ફેઝમાં દરરોજ 60 જેટલા મૃતદેહો આવતા હતાં
• હાલની પરિસ્થિતીમાં દરરોજ 80 જેટલા મૃતદેહોના અંતિમ સંસ્કાર થાય છે
• અંતિમ ક્રિયા માટે ટોકન પદ્ધતિ અપનાવવામાં આવી

સુરત:સુુરતમાં કોરોનાએ કહેર મચાવ્યો છે સાથે જ કોરોનાને કારણે થઈ રહેલા મૃત્યુના આંકડા પણ વધતા જાય છે, ત્યારે સ્મશાનભૂમિમાં ટોકન સિસ્ટમ શરૂ કરવામાં આવી છે. દરમિયાન રામનાથઘેલા સ્મશાન ભૂમિમાં હૃદય દ્રાવક દ્રશ્યો સર્જાયા હતા. સામાન્ય દિવસોમાં રામનાથ ઘેલા સ્મશાનભૂમિમાં રોજ 20 જેટલા મૃતદેહ અંતિમ સંસ્કાર માટે આવતા હતા, પરંતુ કોરોના કાળમાં કોરોના પોઝિટિવ, શંકાસ્પદ અને કોરોના નેગેટિવ સહિત અન્ય મૃતદેહોની સંખ્યા 80થી વધુ પહોંચી ગઇ છે. અહીં રોજ 80થી વધુ મૃતદેહો અંતિમ સંસ્કાર માટે આવી રહ્યા છે.

બે કર્મચારીઓની નિયુક્તિ

આ અંગે ટ્રસ્ટી હરીશ ઉમરીગરે જણાવ્યું હતું કે, અહીં અંતિમ સંસ્કાર માટે ચાર ગેસની ભટ્ટી અને સાત લાકડાની ભટ્ટી છે. ગેસની ભટ્ટીમાં કોરોના સંબંધિત મૃતદેહોના અંતિમ સંસ્કાર કરવામાં આવે છે. રોજ 80થી વધુ મૃતદેહો આવતા આજે શુક્રવારે મનપા કમિશનરે ટીમ મોકલી હતી. અહીં બે કર્મચારીઓની નિયુક્તિ કરવામાં આવી છે, જે આંકડા ઉપર ધ્યાન રાખશે આ સાથે વધુ સાત લાકડાની ભટ્ટીઓ શરૂ કરવા માટે પરવાનગી આપવામાં આવી છે.

આ પણ વાંચો:સુરતના અશ્વિનીકુમાર સ્મશાનગૃહમાં અંતિમ સંસ્કાર માટે પણ લેવું પડે છે ટોકન..!!

પહેલા ફેઝમાં રોજ 60 જેટલા મૃતદેહ સ્મશાનભૂમિમાં આવતા હતાં

પહેલા ફેઝ દરમ્યાન રોજ 60 જેટલા મૃતદેહ સ્મશાનભૂમિમાં આવી રહ્યા હતા પરંતુ આ વખતે આંકડો 80 ઉપર જઈ રહ્યો છે. ટોકન સિસ્ટમ શરૂ કરવામાં આવી રહી છે. માત્ર રામનાથઘેલા સ્મશાનભૂમિમાં 40થી વધુ વેઇટિંગ ચાલી રહ્યું છે. એક મૃતદેહના અંતિમ સંસ્કાર માટે પોણા બે કલાક લાગતા હોય છે. જેના કારણે આ પ્રક્રિયામાં સમય લાગે છે. મૃતકના પરિવારજનોને વધુ હાલાકી ન થાય તે માટેની પણ વ્યવસ્થા કરવામાં આવી છે.

44 મૃતદેહને કોવિડ ગાઇડલાઇન મુજબ અંતિમ ક્રિયા

બીજી બાજુ કુરુક્ષેત્ર સ્મશાન એક દિવસમાં 85 મૃતદેહોની અંતિમ ક્રિયા કરવામાં આવી હતી જે પૈકી 44 મૃતદેહને કોવિડ ગાઇડલાઇન મુજબ અંતિમ ક્રિયા કરાઈ છે. મૃતકોના પરિવારજનો કલાકો સુધી અંતિમ ક્રિયા માટે રાહ જોતા નજરે પડી રહ્યા છે અંતિમ ક્રિયા માટે ટોકન આપવામાં આવ્યા હતા કોરોના મહામારી એ તેનું ઉગ્ર સ્વરૂપ ધારણ કર્યું હોય તેમ જોખમ વધી રહ્યું છે.

આ પણ વાંચો:આ તે કેવી વિવશતા...અંતિમ સંસ્કાર માટે પણ પ્રતિક્ષા..!!

સવારથી દર અડધા કલાકે એક મૃતદેહ અશ્વિનીકુમાર સ્મશાનગૃહમાં આવે છે

આ બે સમશાનભૂમિ ઉપરાંત શહેરનું મુખ્ય અશ્વિનીકુમાર સ્મશાનગૃહમાં આવેલા મૃતદેહોની સંખ્યા જોઈ ચેમ્બર બનાવવામાં આવ્યું છે. જેમાં આવેલા તમામ મૃતદેહોને રાખવામાં આવી રહ્યા છે. જેથી તેમને તેમના ટોકન પ્રમાણે અંતિમ ક્રિયા માટે મોકલવામાં આવે. હાલ તેની પણ સ્થિતિ કફોડી બની છે, 24 કલાક તમામ સ્મશાનગૃહમાં અંતિમ સંસ્કાર થઈ રહ્યા છે, હાલ સવારથી લઇને અત્યાર સુધીમાં 50થી વધુ મૃતદેહો આવી ચૂક્યા છે.