દશેરા પર્વે મુખ્યપ્રધાન ભુપેન્દ્ર પટેલે સુરત શહેરને રૂપિયા 237 કરોડના વિકાસકામોની ભેટ આપી

ભકિ્ત, શકિ્ત અને વિજયના પર્વ એવા દશેરાના દિને મુખ્યપ્રધાન ભુપેન્દ્ર પટેલે સુરત શહેરને રૂપિયા 237 કરોડના વિકાસકામોની ભેટ આપી હતી. તેમણે જણાવ્યું હતું કે, છેવાડાના માનવીની સુખાકારી માટે કોઈ વહીવટી ગુંચ ન પડે તેમનું કામ ઝડપથી થાય તેવા કાર્યો કરવાની નેમ છે. મહાનગરપાલિકા અને સરકાર ખભેથી ખભા મિલાવીને વિકાસની ગતિને વધુ તેજ ગતિએ લઈ જવા પ્રયત્નશીલ રહેશે તેવો વિશ્વાસ તેમણે વ્યક્ત કર્યો હતો.

• સીએમ ભુપેન્દ્રભાઈ પટેલે સુરતને રૂપિયા 237 કરોડના વિકાસના કામોની ભેટ આપી
• સુરત મનપા અને સુડાના રૂપિયા 172 કરોડના વિકાસ પ્રકલ્પોનું મુખ્યપ્રધાન હસ્તે લોકાર્પણ/ ખાતમુહૂર્ત
• માંડવી અને મહુવા ખાતે તૈયાર થશે ગર્લ્સ-બોયઝ હોસ્ટેલ
• 6 ઓક્સિજન પ્લાન્ટનું ઈ-લોકાર્પણ, 16 એમ્બ્યુલન્સને ઝંડી આપી પ્રસ્થાન કરાવ્યું

સુરતઃ શહેરના સંજીવકુમાર ઓડીટોરીયમ ખાતે આયોજીત સમારોહમાં મુખ્યપ્રધાને જણાવ્યું કે, કોરોનાકાળ દરમિયાન અમેરિકા જેવા દેશોની હાલત પણ કફોડી બની હતી. વડાપ્રધાન નરેન્દ્ર મોદીએ માર્ગદર્શન આપીને સમગ્ર ભારતને કોરોનાની મહામારીમાંથી બહાર લાવીને વિકાસની ગતિને અટકવા દીધી નથી. સુરત શહેરે હરંહમેશા લોકોની વચ્ચે રહીને આમ આદમીના પ્રશ્નોને વાચા આપી છે. આવનારી મુશ્કેલીઓનો મક્કમતાપૂર્વક સામનો કરીને વિકાસની ગતિને આગળ લઈ જવા માટે સુરતે નમૂનારૂપ કાર્ય કર્યું છે. સુરતના વિકાસમાંથી અન્ય જિલ્લાઓ પર પ્રેરણા લે તેવી હિમાયત તેમણે કરી હતી. વધુમાં તેમણે જણાવ્યું કે, કેવડીયા જેવા આર્થિક, સામાજિક રીતે પછાત વિસ્તારમાં સ્ટેચ્યુ ઓફ યુનિટીનું નિર્માણ કરીને આ વિસ્તારની કાયાપલટ કરવાનું કાર્ય વડાપ્રધાને કર્યું છે.

પ્રધાનમંત્રી આવાસોની ઓનલાઈન અનાવરણવિધિ સંપન્ન

મહાનગરપાલિકાના અંદાજીત રૂપિયા 42.45 કરોડના ખર્ચે સાકારિત થનારા કચ્છ જિલ્લાના સુખમાણ ગામ ખાતે રોહા નખત્રાણા સાઈટ ખાતે 6.3 મેગા વોટ ક્ષમતાનો વિન્ડ પાવર પ્લાન્ટ તથા રૂપિયા 32.50 કરોડના ખર્ચેના શાળાના મકાન, ફાયર સ્ટેશન, આંગણવાડી મળી કુલ રૂપિયા 74.95 કરોડના ખર્ચના વિકાસકામોનું લોકાર્પણ તથા રૂપિયા 62.09 કરોડના કામોનું ખાતમુહૂર્ત તેમજ સુરત શહેરી વિકાસ સત્તામંડળના રૂપિયા 35 કરોડના ખર્ચે પ્રધાનમંત્રી આવાસોની ઓનલાઈન અનાવરણવિધિ સંપન્ન થઈ હતી.

6 ઓક્સિજન પ્લાન્ટોનું વચ્યુર્અલ લોકાર્પણ

આ પ્રસંગે મુખ્યપ્રધાને આરોગ્ય વિભાગની 16 એમ્બ્યુલન્સોને ઝંડી આપી પ્રસ્થાન કરાવીને સુરત શહેર- જિલ્લામાં રૂપિયા 5.54 કરોડના ખર્ચે 6 ઓક્સિજન પ્લાન્ટોનું વચ્યુર્અલ લોકાર્પણ કર્યું હતું. આ ઉપરાંત તેમના હસ્તે આદિજાતિ વિસ્તારના દીકરા- દીકરીઓને ઘર આંગણે શિક્ષણ સહિતની સુવિધાઓ ઉપલબ્દ્ધ થાય તે માટે આદિજાતિ વિભાગના રૂપિયા 60.29 કરોડના ખર્ચે ત્રણ જેટલા છાત્રાલયોનું પણ ઓનલાઈન ખાતમુહૂર્ત સંપન્ન થયું હતું.