બિલ્ડરને આપેલા ઉછીના 4 કરોડ રૂપિયા વસૂલવા માટે બીટકોઈન ફેમ શૈલેષ ભટ્ટે કુખ્યાત ગેંગને સોપારી આપી

કરોડો રૂપિયાના બીટકોઈન કૌભાંડના મુખ્ય સૂત્રધાર શૈલેષ ભટ્ટ સામે વધુ એક ફરિયાદ સુરત પોલીસે નોંધી છે. બિલ્ડરને આપેલા ઉછીના ચાર કરોડ રૂપિયા વસૂલવા માટે બીટકોઈન ફેમ શૈલેષ ભટ્ટે કુખ્યાત ગેંગને સોપારી આપી હતી. આ ગેંગના સભ્યો બિલ્ડરની ઓફિસમાં ગેરકાયદે કબજો કરવા હથિયાર સાથે પહોંચ્યા હતા. આખરે પોલીસે આ સમગ્ર ઘટનામાં સૌરાષ્ટ્રના માથાભારે યુવકોની ધરપકડ કરી તેમની પાસેથી ચાર પિસ્તોલ, 13 જીવતા કારતૂસ અને બે ચપ્પુ જપ્ત કર્યા છે.

સુરત: બીટકોઈન કૌભાંડનો મુખ્ય આરોપી શૈલેષ ભટ્ટ ફરી એક વખત ચર્ચામાં આવ્યો છે. કરોડો રૂપિયાના બીટકોઈનનો કૌભાંડી શૈલેષ ભટ્ટ આ વખતે બિલ્ડરની ઓફિસ પર ગેરકાયદે કબજો કરવાના પ્રકરણમાં ચર્ચામાં આવ્યો છે. સુરત સરથાણા પોલીસે શૈલેષ ભટ્ટ સામે ફરિયાદ નોંધી છે, જેમાં તેમણે વર્ષ 2015માં એક બિલ્ડરને ઉછીના 4 કરોડ રૂપિયા દોઢ ટકા વ્યાજ પર આપ્યા હતા. બિલ્ડરે 6 કરોડ રૂપિયા પણ દીધા હતા પરંતુ શૈલેષ ભટ્ટે સૌરાષ્ટ્રના માથાભારે ગણાતા ગેંગના યુવાનોને બિલ્ડરની સાઇટ પર ગેરકાયદે કબજો કરવા મોકલ્યા હતા. બિલ્ડરની ઓફિસમાં ચાર જેટલા ઈસમો હથિયાર સાથે આવી ધાકધમકી આપી હતી અને સાઇટ પર ગેરકાયદે કબજો કરવા પ્રયાસ કર્યો હતો.

આ અંગે પોલીસ કમિશ્નર અજય તોમરે જણાવ્યું હતું કે, ગેંગના કેટલાક યુવકોએ બિલ્ડરના ઓફીસ પર ગેરકાયદે અડીંગો જમાવ્યો હતો. જે અંગે ફરિયાદ મળતા પોલીસે શંકાસ્પદ યુવકોની તપાસ હાથ ધરી હતી અને ઘાતક હથિયારો આરોપીઓ મળી આવ્યા હતા. પોલીસે સમગ્ર ઘટનામાં સૌરાષ્ટ્રના કુખ્યાત ગેંગના સલીમ સાજીદ હનીફ અને ઉંમરની ધરપકડ કરી હતી. પોલીસને આ ચારેય આરોપીઓ પાસેથી દેશી હાથ બનાવટની ચાર પિસ્તોલ અને 13 જીવતા કારતૂસ, એક ચપ્પુ મળી આવ્યા હતા. પોલીસે હથિયારો ઉપરાંત તેઓ પાસેથી ચાર મોબાઇલ ફોન જપ્ત કર્યા છે અને ગેરકાયદેસર પ્રવેશ તેમજ આમ્સ એકટનો ગુનો નોંધી ચારેયની ધરપકડ કરી હતી.અજય તોમરે વધુમાં જણાવ્યું હતું કે, ફરિયાદી રાજુ દેસાઇએ બહુચર્ચિત ખોખરીયા પાસેથી ચાર કરોડ વ્યાજે લીધા હતા, જેની સામે રાજુ દેસાઇએ વ્યાજ સહિત 6 કરોડ રૂપિયા ચુકવી પણ દીધા હોવાનું કહેવાય છે. શૈલેષ પટેલે સૌરાષ્ટ્રના નામચીન અનિરુદ્ધને પૈસા કઢાવવા સોપારી આપી હતી જેથી શૈલેષ ભટ્ટના ઈશારે અનિરુદ્ધની ટોળકીએ બિલ્ડરની મિલકત પર કબજો જમાવ્યો હતો.તો આ સાથે પોલીસ કમિશ્નર અજય તોમરે જણાવ્યું હતું કે, જે મુખ્ય આરોપી છે તે bitcoin કૌભાંડનો પણ આરોપી રહી ચૂક્યો છે. જેથી bitcoin અંગે પણ આ કેસમાં કોઈ ભૂમિકા રહી છે કે નહીં તેની પણ તપાસ કરવામાં આવશે. આ સાથે જમીન અંગેનો વિવાદ હોવાથી સમગ્ર ઘટનાની તપાસ ક્રાઇમ બ્રાંચને સોંપવામાં આવી છે. પ્રાથમિક તપાસમાં શૈલેષ ભટ્ટ ખોખરીયા સૌરાષ્ટ્રનો નામચીન અનિરુદ્ધ ,અતાઉલ્લા ખાન શબ્બીર સહિતની વ્યક્તિઓના નામ બહાર આવ્યા છે. જેથી જરૂર પુરાવા એકત્ર કરી પડદા પાછળ ખેલ કરનાર નામચીન નેતાઓ સામે પણ ગુનો નોંધી તેમની પૂછપરછ અને ધરપકડની કાર્યવાહી શરૂ કરવામાં આવશે.