બારડોલીમાં જીતના ઉન્માદમાં ABVPનું ફાયરિંગ, જનરલ સેક્રેટરીના પરિણામ બાદની ઘટના

સુરતઃ બારડોલીની પી આર બી આર્ટ્સ કોમર્સ કોલેજમાં GS(જનરલ સેક્રેટરી)ની ચૂંટણીમાં વિજેતા ઉમેદવાર અંકિત ચૌધરીના સમર્થક યુવાને જાહેરમાં ફાયરિંગ કર્યું હતું. જેથી પોલીસે આ યુવાનની ધરપકડ કરી વધુ તપાસ હાથ ધરી હતી.

વીર નર્મદ દક્ષિણ ગુજરાત યુનિવર્સીટી સંલગ્ન કોલેજોમાં આજે જનરલ સેક્રેટરીની ચૂંટણી યોજાઈ હતી, જે અંતર્ગત બારડોલી માં આવેલ પી આર બી આર્ટ્સ એન્ડ કોમર્સ કોલેજમાં પણ GSની ચૂંટણી યોજાઈ હતી. જેમાં વિજેતા ઉમેદવાર અંકિત ચૌધરીના સમર્થક યુવાને ફાયરિંગ કર્યું હતું.

જાહેર માર્ગ ઉપર ફાયરિંગ કરતા વિદ્યાર્થીઓ એક સમયે અચંબામાં પડી ગયા હતાં. જો કે, ફાયરિંગ વીડિયો વાયરલ થતા વાત બારડોલી પોલીસ સ્ટેશનમાં પહોંચી હતી. જેથી બારડોલી પોલીસે વીડિયોના આધારે યુવાનોને પોલીસ સ્ટેશને બોલાવ્યા હતા તેમજ Dysp, જિલ્લા LCB પોલીસ પણ દોડતી થઈ ગઈ હતી.

બારડોલી પોલીસે આ ફાયરિંગ અંગે તપાસ શરૂ કરતાં ફાયરિંગ કરનાર યુવક ABVPનો સમર્થક કૌશિક રબારી હોવાનું બહાર આવ્યું હતું. જેથી નગરના ભાજપ આગેવાનો પણ પોલીસ સ્ટેશને દોડી આવ્યા હતા. વિજેતા ઉમેદવારના ઉન્માદમાં કૌશિક રબારીએ ભાન ભૂલી જાહેરમાં ફાયરિંગ કર્યું હતું.

પોલીસ તપાસ દરમિયાન ફાયરિંગ થનાર પ્લાસ્ટિકની ચાઈના બનાવટ બંદૂક હોવાનું કબૂલાત કરી હતી. જેથી પોલીસે પણ FSLની મદદ લઈ જરૂરી કાર્યવાહી હાથ ધરી છે.