સુરતમાં ટ્રાઈસ્ટાર હોસ્પિટલમાં લાગી ભીષણ આગ, કાર્બન મોનોક્સાઈડ ગેસ પ્રસરતા અફરાતફરી

રાજ્યમાં ફરી એક વખત હોસ્પિટલમાં આગ લાગવાની ઘટના સામે આવી છે. સુરતના અઠવા ગેટ વિસ્તાર ખાતે આવેલી ટ્રાઈસ્ટાર હોસ્પિટલના પહેલા માળે આવેલા સર્વર રૂમમાં અચાનક આગ લાગી હતી. જેથી ધુમાડા ફેલાયા હતા. આ ઘટનાની જાણ થતાં હોસ્પિટલમાં અફરાતફરીનો માહોલ સર્જાયો હતો. દર્દીઓ, સ્ટાફ અને ડૉક્ટર્સ સહિત 50થી વધુ લોકોનું રેસ્ક્યૂ કરવામાં આવ્યું છે. જો કે, આ ઘટનામાં કોઈ જાનહાનિ જોવા મળી નથી.

• ટ્રાઈસ્ટાર હોસ્પિટલમાં લાગી ભીષણ આગ
• હોસ્પિટલના પહેલા માળે આવેલા સર્વર રૂમમાં લાગી હતી આગ
• 50થી વધુ લોકોનું કરાયું રેસ્ક્યૂ
• 16થી વધુ દર્દીઓ ગંભીર સ્થિતિમાં હતા દાખલ

સુરતઃ શહેરના અઠવા ગેટ વિસ્તારમાં આવેલી ટ્રાઇસ્ટાર હોસ્પિટલમાં બપોરે 3.20 વાગ્યે અચાનક આગ લાગતા અફરાતફરીનો માહોલ સર્જાયો હતો. હોસ્પિટલના સ્ટાફ દર્દીઓ અને ડોક્ટર્સને સુરક્ષિત બહાર કાઢવામાં આવ્યા હતા. હોસ્પિટલમાંથી આશરે 50થી વધુ લોકોનું રેસ્ક્યૂ કરાયું હતું, જેમાંથી 16થી વધુ ગંભીર સ્થિતિમાં દાખલ દર્દીઓ હતા. દર્દીઓને વેન્ટીલેટર અને ઓક્સિજન સાથે જ રેસ્ક્યૂ કરાયા હતા. ધૂમાડાના કારણે દર્દીઓએ પણ ભારે હાલાકી ભોગવવી પડી હતી. તમામ દર્દીઓ અને સ્ટાફના લોકોને નજીકના હોસ્પિટલમાં દાખલ કરાયા હતા.

કાર્બન મોનોક્સાઈડ ગેસ ચારે તરફ ફેલાયો

આ આગના કારણે કાર્બન મોનોક્સાઈડ ગેસ ચારે તરફ ફેલાવા લાગયો હતો. જેથી આગ પર કાબૂ મેળવવા ફાયર વિભાગના જવાનોને ખૂબ મુશ્કેલીઓનો સામનો કરવો પડ્યો હતો. આ ગેસ ઝેરી હોવાના કારણે આંખમાંથી અશ્રુ નીકળ્યા હતા. પહેલા માળે લાગેલી આગના કારણે આ ગેસ બીજા અને બેઝમેન્ટ સુધી ફેલાઈ હતી. જેથી ફાયર વિભાગના જવાનોને આગ પર કાબૂમ મેળવવા ભારે જહેમત ઉઠાવવી પડી હતી.

સર્વર રૂમમાં શોર્ટ સર્કિટના કારણે લાગી હતી આગ

હોસ્પિટલમાં લાગેલી આ આગ પહેલા માળે આવેલા સર્વર રૂમમાં લાગી હતી. આ અંગે ફાયર વિભાગના અધિકારીઓએ જણાવ્યું હતું કે, આગ શોર્ટ સર્કિટથી લાગી હતી. જેને ગણતરીની મિનિટોમાં ઓલવી દેવામાં આવી હતી, પરંતુ આગના કારણે જે ઝેરી ધુમાડો થયો હતો, તેના કારણે સ્થિતિ નિયંત્રણમાં કરવામાં સમય લાગ્યો હતો.

એલીવેશનના ડિઝાઇનના કારણે ફાયર વિભાગ મુશ્કેલીમાં મૂકાયું

સુરત ખાતે હોસ્પિટલમાં બનેલી આગની ઘટનામાં સૌથી અગત્યની વાત એ હતી કે, હોસ્પિટલની ડિઝાઇનના કારણે આગ પર કાબૂ મેળવવા માટે ફાયર વિભાગને ભારે જહેમત ઉઠાવવી પડી હતી. કારણ કે, હોસ્પિટલમાં એલીવેશનના ડિઝાઇનના કારણે ફાયર વિભાગ પાણીનો છટકાવ કરી શક્યું નહોતું. જેથી એન્ટ્રી ગેટના માધ્યમથી પાણીની પાઇપ બેઝમેન્ટ અને બીજા માળ સુધી લઈ જવા પડ્યા હતા. ઉલ્લેખનીય છે કે, આ અગાઉ પણ સરથાણા ખાતે આવેલા રઘુવીર માર્કેટમાં એલીવેશનના કારણે જ કલાકો સુધી ફાયર વિભાગના જવાનો આગ પર કાબૂ મેળવી શક્યા નહોતા અને તંત્ર દ્વારા તમામ માર્કેટ અને હોસ્પિટલને એલીવેશન કાઢવા અંગેની સૂચના પણ આપવામાં આવી હતી.

હોસ્પિટલની ભૂલ હશે તો કરાશે કાયદેસરની કાર્યવાહી

અમદાવાદમાં કોવિડ હોસ્પિટલમાં લાગેલી આગની ઘટના બાદ સુરતના તમામ હોસ્પિટલોમાં ફાયર સેફ્ટીના સાધનો અંગે ચકાસણી કરવામાં આવી હતી, પરંતુ આમ છતાં સુરતમાં આવી ઘટના બની છે. જે અંગે તંત્રએ જણાવ્યું છે કે, જો હોસ્પિટલની ભૂલ સામે આવશે તો ચોક્કસથી હોસ્પિટલ સામે કાયદેસરની કાર્યવાહી કરવામાં આવશે.

આ હોસ્પિટલ અગાઉ પણ આવી છે વિવાદમાં

આ હોસ્પિટલમાં અગાઉ કોવિડ વોર્ડ હતો અને હોસ્પિટલ દ્વારા કોવિડના દર્દીઓ પાસે 11થી 25 લાખ સુધીનું બિલ વસૂલવામાં આવતું હતું. જો કે, હાલ કોવિડના દર્દીઓની સારવાર હોસ્પિટલમાં નથી ચાલતી.