68 વર્ષીય પૂર્વ નર્સિંગ સુપરિન્ટેન્ડ અને 75 વર્ષીય તેમની બહેને કોરોનાને માત આપી

સિવિલ હોસ્પિટલના પૂર્વ નર્સિંગ સુપરિન્ટેન્ડન્ટ 68 વર્ષીય રમીલાબેન પટેલ 1લી એપ્રિલના રોજ કોરોનાના લક્ષણો સાથે સિવિલમાં આવ્યા હતા. સુરતમાં 2 વૃદ્ધ બહેનોએ કોરોનાને માત આપી છે.

• સુરતની 2 વૃદ્ધા બહેનોએ કોરોનાને માત આપી
• રમીલાબેને અગાઉ પ્લેગ અને હોનારતમાં સેવા આપી હતી
• કોવિડમાં કામ કરતા કર્મચારી ઓછા જ્યારે, દર્દી વધારે: રમીલાબેન

સુરત:શહેરમાં 2 વૃદ્ધ બહેનોએ કોરોનાને માત આપી છે. આ 2 બહેનો પૈકી એક બહેન સિવિલ હોસ્પિટલના પૂર્વ નર્સિંગ સુપરિન્ટેન્ડ છે. પૂર્વ નર્સ અગાઉ પ્લેગ અને હોનારતના સમયે સેવા આપી ચૂક્યા છે. તેઓએ જણાવ્યું હતું કે, સિવિલમાં સ્ટાફ ઓછો છે પણ કામગીરી સરસ કરી રહ્યા છે.

આ પણ વાંચો:જસદણના 98 વર્ષીય દૂધીબેને આપી કોરોનાને માત, છેલ્લા 20 વર્ષથી છે અસ્થમાની બિમારી

કોરોનાનાં લક્ષણો દેખાતા તપાસ કરી

સિવિલ હોસ્પિટલના પૂર્વ નર્સિંગ સુપરિન્ટેન્ડન્ટ 68 વર્ષીય રમીલાબેન પટેલ 1લી એપ્રિલના રોજ કોરોનાના લક્ષણો સાથે સિવિલમાં આવ્યા હતા. તેમની સાથે રહેતા તેમના 75 વર્ષીય મોટા બહેન જશોદાબેન પટેલને પણ શંકાસ્પદ કોરોનાનાં લક્ષણો દેખાતા હોવાથી બન્નેની તપાસ કરાવામાં આવી હતી. જ્યાં, બન્નેનો કોરોના રિપોર્ટ પોઝિટિવ આવતા દાખલ કરી સારવાર શરૂ કરાઈ હતી.

તબિયતમાં સુધારો આવતા રજા અપાઈ

કોવિડ હોસ્પિટલના ડૉ. અવિન વસાવા અને ડૉ. અમિત ગામીતના ઓબ્ઝર્વેશન હેઠળ બન્ને બહેનોની તબિયતમાં સુધારો આવતા રજા અપાઈ હતી. રમીલાબેન અગાઉ પ્લેગ અને હોનારતમાં પણ સેવા આપી ચુક્યા છે. આ તબક્કે જશોદાબેને તબીબોનો આભાર માન્યો હતો.

આ પણ વાંચો:રાજકોટમાં ગંભીર બીમારીઓ ધરાવતા 3 વયોવૃદ્ધ દર્દીઓએ કોરોનાને માત આપી

કોવિડમાં કામ કરતા કર્મી ઓછા દર્દી વધારે

રમીલાબેને જણાવ્યું હતું કે, હાલ સિવિલમાં કર્મચારી ઓછા છે. જેથી લોકોએ સાવધાની રાખવાની ખાસ જરૂર છે. સરકારે તબીબ-નર્સ અને સર્વન્ટની ફાળવણી કરવી જોઈએ. કોવિડમાં કામ કરતા કર્મચારી ઓછા જ્યારે, દર્દી વધારે છે.