વિશ્વમાં પ્રેમ અને કરુણાનો સંદેશ આપનાર ભગવાન ઇસુનો જન્મદિવસ એટલે નાતાલ. આ પર્વને વાપી અને તેની આસપાસના સંઘપ્રદેશ સહિતના વિસ્તારમાં રહેતા ખ્રિસ્તી પરિવારો ઉત્સાહભેર ઉજવતા આવ્યા છે. વાપીમાં આશાધામ સ્કૂલ ખાતે આવેલા ચર્ચમાં મોટી સંખ્યામાં ખ્રિસ્તી પરિવારો સજી-ધજીને ઉપસ્થિત રહે છે. ચર્ચમાં પાદરી બાઇબલનો ઉપદેશ આપે છે. ભગવાન ઇસુના જન્મ દિવસની ઉજવણી સાથે એકબીજાને મેરી ક્રિસ્મસની શુભેચ્છા પાઠવે છે.
ઉલ્લેખનીય છે કે, નાતાલ પર્વના દિવસે પ્રેમ, ભાઈચારા અને ગરીબોની સેવા કરનાર ભગવાન ઈસુએ મનુષ્યરૂપે અવતાર લીધો હતો. સમગ્ર દુનિયાને પ્રેમ અને કરુણાનો સંદેશ આપ્યો હતો.
ક્રિસમસ પર્વની તૈયારીઓને અપાયો આખરી ઓપ નાતાલની ઉજવણીના ભાગરૂપે મુખ્ય ચર્ચમાં તૈયારીઓને આખરી ઓપ અપાઈ રહ્યો છે. ચર્ચને રંગબેરંગી સ્ટાર અને ક્રિસમસ ટ્રીથી શણગારવામાં આવ્યા છે. આ અંગે ચર્ચના ફાધર ટોની લોપસે જણાવ્યું હતું કે, નાતાલ એટલે પ્રભુ ઈસુ ખ્રિસ્તનો જન્મદિવસ. આ દિવસે ભગવાનનો પ્રેમ કઈ રીતે મળતો રહે અને પ્રેમ શું છે? એક બીજાને ક્ષમા આપી પ્રેમનો સંદેશ આપવો એ જ આજના દિવસનો મહિમા છે.
ક્રિસમસ પર્વની તૈયારીઓને અપાયો આખરી ઓપ આ વર્ષે નાતાલ પર્વની તૈયારીના ભાગરૂપે ઘરે-ઘરે જઇ સંદેશ આપવામાં આવ્યો છે. ગરીબોને ખાદ્ય ચીજવસ્તુઓ તેમજ રમતગમતની સામગ્રી પૂરી પાડવામાં આવી છે. ક્રિસમસ એટલે ક્રિસમસ ટ્રી અને સાન્તાક્લોઝ જ નહીં, પરંતુ આ દિવસે મિસા(પૂજા) કરવામાં આવે છે. જીવનમાં ભગવાન ઇસુનો સ્વીકાર કરવો, પાપી જીવન અને સ્વાર્થી જીવનથી દૂર રહી તન-મનને પવિત્ર રાખવું એ જ આજનો મુખ્ય ઉદ્દેશ છે. આ દિવસ નિમિત્તે ચર્ચમાં ખાસ ડેકોરેશન કરવામાં આવ્યું છે. તે સાથે ભગવાન ઈસુએ ગૌશાળામાં જન્મ લીધો હતો. તે માટે તેની એક નાનકડી ઝૂંપડી બનાવી તેમાં તેનું પ્રદર્શન ગોઠવવામાં આવ્યું છે. જીવનને સુંદર બનાવો એ જ ક્રિસમસ સેલિબ્રેશનનો મુળ સંદેશ છે.
ઉલ્લેખનીય છે કે, 24મી અને 25મી ડિસેમ્બરની રાત્રીના નાતાલ પર્વની ઉજવણી કરવામાં આવે છે. જેમાં મોટી સંખ્યામાં ખ્રિસ્તી સમાજના મહિલાઓ-પુરુષો, બાળકો, યુવાનો ઉપસ્થિત રહી પ્રભુ ઈસુના પ્રાર્થના ગીતો ગાય છે. મિસા બાઈબલનું પ્રવચન સાંભળી એકબીજા મેરી ક્રિસમસની શુભકામના પાઠવે છે.
