રાજકોટ : સ્ટેટ મોનિટરિંગ સેલની ટીમ સતત શહેર પોલીસનું નાક (Rajkot police controversy )કાપી રહી છે. 48 કલાક પહેલાં જ આ ટીમ દ્વારા ભાવનગર રોડ પરથી વર્લીનો જુગાર રમતા 16 શખ્સને લાખો રૂપિયાના મુદ્દામાલ સાથે ઝડપી લઈ થોરાળા પોલીસનું નાક કાપવામાં આવ્યું હતું. ત્યારે ગત રાત્રે ગોકુલધામ આવાસ યોજનામાં દારૂનો વેપલો કરતા નામચીન બૂટલેગરને (Bootlegger of Rajkot city)ત્યાં દરોડા પાડી દેશી દારૂની ભઠ્ઠી ઝડપી લેવામાં આવી છે. ત્રણ દિવસમાં સ્ટેટ મોનિટરિંગ સેલની (State Monitoring Cell Raids in Rajkot) બીજી રેઇડને લઈને શહેર પોલીસ ફરી એકવાર શરમમાં મુકાઈ છે.
સ્ટેટ મોનિટરિંગ સેલની ટીમ ત્રાટકી- જાણવા મળતી વિગત મુજબ, માલવિયાનગર પોલીસ સ્ટેશન વિસ્તારના ગોકુલધામમાં આવેલા ક્વાર્ટર્સમાં નામચીન બૂટલેગર હાર્દિક ઉર્ફે કવિ દેશી દારૂની ભઠ્ઠી ચલાવતો હોવાની ચોક્કસ માહિતી મળતાં સ્ટેટ મોનિટરિંગ સેલની ટીમ (State Monitoring Cell Raids in Rajkot) ત્રાટકી હતી. નામચીન બૂટલેગર કવિની ભઠ્ઠી પર દરોડો પડતાં નાસભાગ મચી ગઇ હતી. વિજિલન્સની ટીમે સ્થળ પરથી બે હજાર લિટરથી વધુ આથો અને દેશી દારૂનો મોટો જથ્થો જપ્ત કર્યો હતો.
સ્થાનિક પોલીસમાં સોપો પડી ગયો - નામચીન બૂટલેગર હાર્દિક ઉર્ફે કવિ અગાઉ વિદેશી દારૂનો વેપલો કરતો હતો, પરંતુ છેલ્લા ત્રણેક વર્ષથી દેશી દારૂની ભઠ્ઠી ચાલુ કરી હતી. જેમાં ખજૂર સહિતના ફ્રૂટનો દારૂ બનાવી તેનું વેચાણ કરતો હતો. વિજિલન્સના (State Monitoring Cell Raids in Rajkot) દરોડાથી સ્થાનિક પોલીસ કર્મચારીઓમાં સોપો પડી ગયો છે.