રાજકોટના વીરપુરમાં 3 ઇંચ જેટલો વરસાદ ખાબકતા છાપરવડી ડેમ ઓવરફ્લો થયો

જન્માષ્ટમીની મોડી રાત્રે વીરપુર અને આસપાસના પંથકમાં 3 ઇંચ જેટલો ધોધમાર વરસાદ ખાબક્યો હતો. જેના લીધે વીરપુરના વાળાડુંગરા ગામ પાસે આવેલો છાપરવડી ડેમ ઓવરફ્લો થયો હતો.

• દક્ષિણ ગુજરાત અને સૌરાષ્ટ્રના અનેક જિલ્લામાં વરસાદની આગાહી
• સરીયામતી નદીના કોઝ વે પર પાણી ફરી વળ્યાં
• વીરપુરના વાળાડુંગરા ગામ પાસે આવેલો છાપરવડી ડેમ ઓવરફ્લો
• વીરપુરથી 10 ગામોની અવરજવર બંધ

રાજકોટ: દક્ષિણ ગુજરાત અને સૌરાષ્ટ્રના અનેક જિલ્લાઓમાં 16 ઓગષ્ટ સુધી ભારે વરસાદની આગાહી કરવામાં આવી છે. હવામાન વિભાગે બુધવારે આ અંગે એલર્ટ પણ જારી કર્યું હતુ.વીરપુર અને વીરપુર પંથકમાં ગત મોડી રાત્રેથી જ વરસાદી માહોલ જામતા વિરપુર પંથકમાં 3 ઇંચ જેટલો વરસાદ નોંધાયો હતો.

વીરપુરમાં 3 ઇંચ જેટલો વરસાદ ખાબકતા છાપરવડી ડેમ ઓવરફ્લો થયો

મોડી રાત્રેથી ભારે વરસાદને લઈને વીરપુરના સિમ વિસ્તારમાં નદીઓ નાળા છલકાયા હતા. જેતપુર તાલુકાના વિરપુર પંથકના વાળાડુંગરા ગામ પાસે આવેલ છાપરવાડી ડેમ ગતરાત્રીના ભારે વરસાદમાં ઓવરફ્લો થયો હતો. સિંચાઈ માટે બનેલ આ ડેમના પાણીથી લુણાગરા, મેવાસા, પ્રેમગઢ, કેરાળી વગેરે ગામોના ખેડૂતોને પિયત માટે પાણી આપવામાં આવે છે.

ગતરાત્રીના ભારે વરસાદને કારણે ડેમ ઓવરફ્લો થતાં ડેમના ચાર દરવાજા 3 ફૂટ ખોલવામાં આવ્યા છે. હાલ ૧૮000 ક્યુસેક પાણીની આવક સામે 18000 ક્યુસેક પાણીની જાવક પણ છે.

વીરપુર પંથકમાં અને ઉપરવાસમાં ભારે વરસાદ ને લઈને વીરપુરની સરીયામતી નદીમાં ઘોડાપુર આવ્યું છે. સરીયામતી નદીના કોઝ વે પર પાણી ફરી વળ્યાં હતા અને વિરપુર થી મેવાસા, જેતપુર, હરિપર સહિતના ગામોમાં જવાનો રસ્તો બંધ થયો છે. કોઝવે પુલ પાણીમાં ગરક થતા વીરપુર થી 10 ગામોની અવરજવર બંધ થઈ છે.