જૂનાગઢ: શહેર અને જિલ્લામાં એકંદરે મેઘરાજાએ ખમૈયા કરતાં લોકોમાં હાશકારો વ્યાપ્યો છે. છેલ્લા એક અઠવાડિયાથી જે પ્રકારે જૂનાગઢ શહેર અને જિલ્લામાં મેઘરાજાએ તાબડતોડ ઇનિંગ ખેલીને અત્ર-તત્ર-સર્વત્ર પાણી-પાણી કરી નાંખ્યું હતું.
આજે સવારે જૂનાગઢ શહેરમાં વરસાદના ઝાપટાને બાદ કરતા શહેર અને જિલ્લામાં વરસાદે વિરામ લીધો છે. આજે વરસાદે વિરામ ચોક્કસ લીધો છે, પરંતુ વરસાદી વાતાવરણ હજુ પણ યથાવત જોવા મળી રહ્યું છે. હજુ પણ આગામી 24 કલાક સુધી ભારેથી અતિભારે વરસાદની આગાહીઓ વ્યક્ત કરવામાં આવી રહી છે.
હવે મેઘરાજા ખમૈયા કરે તેવુ લોકો પણ ઈચ્છી રહ્યાં છે, પરંતુ જે પ્રકારે એક બાદ એક વરસાદી સિસ્ટમ આગળ વધી રહી છે. જેને લઈને વધુ કેટલાક વરસાદની શક્યતાઓને નકારી શકાય તેમ નથી.
