કોરોના સામે લડવા વેક્સિન જ હાલ અમોધ શસ્ત્ર, રસી મૂકાવી પોતાને તેમજ પરિવારને સુરક્ષિત કરીએ

જામનગરમાં કોરોનાના કેસમાં સતત વધારો થઈ રહ્યો છે. જોકે, વેક્સિનેશનની કામગરી પણ જામનગરમાં પૂરજોશમાં ચાલી રહી છે. ત્યારે શહેરમાં કામદાર કોલોની વિસ્તારમાં આવેલી શહેરી પ્રાથમિક આરોગ્ય કેન્દ્ર ખાતે મેડિકલ ઓફિસર તરીકેની ફરજ બજાવતા ડૉ. કાજલ ચૌહાણે જામનગરની જનતાને વેક્સિન લેવા અપીલ કરી હતી.

• કોરોનાને નાથવા હાલ વેક્સિન જ હથિયાર
• મેડિકલ ઓફિસરે વેક્સિન લેવા કરી અપીલ
• 18 વર્ષથી ઉપરના લોકો માટે વેક્સિનેશન શરૂ

જામનગરઃ કોરોનાને નાથવા હાલ વેક્સિન જ ઈલાજ છે, ત્યારે જામનગર શહેરમાં કામદાર કોલોની વિસ્તારમાં આવેલી શહેરી પ્રાથમિક આરોગ્ય કેન્દ્ર ખાતે મેડિકલ ઓફિસર તરીકેની ફરજ બજાવતા ડૉ. કાજલ ચૌહાણે જામનગરની જનતાને અપીલ કરી હતી. તેમણે જણાવ્યું કે, લોકોએ વધુમાં વધુ કોરોના પ્રતિરોધક રસી લેવી જોઈએ. કામદાર કોલોની આરોગ્ય કેન્દ્ર તથા જામનગર શહેરમાં કોરોના વેક્સિન ઉપલબ્ધ છે. જામનગરના લોકો કોરોના વેક્સિનના બંને ડોઝ લઈને કોરોનાથી પોતાને તથા પરિવારને સુરક્ષિત કરે.

ડૉ. કાજલ ચૌહાણ

જામનગરમાં કુલ 15 જગ્યાએ વેક્સિન આપવાનું શરૂ

રાજ્ય સરકાર દ્વારા 18 વર્ષથી ઉપરના લોકો માટે વેક્સિનેશન શરૂ કરવામાં આવ્યું છે. ત્યારે કોવિડ એપ મારફતે વધુમાં વધુ યુવાઓ પોતાનું રજીસ્ટ્રેશન કરાવી વેક્સિન લે એ જરૂરી છે. કારણ કે કોરોના સામે લડવા હાલના તબક્કે રસીકરણ જ એકમાત્ર અમોધ શસ્ત્ર છે. જામનગરમાં કુલ 15 જગ્યાએ વેક્સિન આપવાનું શરૂ કરવામાં આવ્યું છે.

આ પણ વાંચોઃજામનગરના ગ્રામવિસ્તારોને કોરોનામુક્ત કરવા તંત્રની યુદ્ધના ધોરણે કામગીરી

રસીથી કોઇપણ જાતની આડઅસર જોવા મળી નથીઃ ડૉ.કાજલ ચૌહાણ

ડૉ.કાજલ ચૌહાણે વધુમાં જણાવ્યું કે, મેં વેક્સિનના બન્ને ડોઝ લઇ લીધા છે. જેની કોઇપણ જાતની આડઅસર જોવા મળી નથી. કોરોનાના સંક્રમણમાં રસીકરણના કારણે હું સુરક્ષીત છું. હાલ હું પ્રાથમિક આરોગ્ય કેન્દ્ર ખાતે દર્દીઓની તપાસ કરૂ છું અને મને કોઇપણ જાતની તકલીફ કે સંક્રમણ થયુ નથી. જેનુ કારણ રસીકરણ છે. રસીકરણની પ્રક્રિયા એકદમ સુરક્ષીત છે. સૌ લોકોએ મનમાં કોઇપણ જાતનાં ડર કે શંકા રાખ્યા વિના રસીકરણ કરાવી લેવું જોઇએ તેવી મારી તમામ નાગરીકોને મારી અપીલ છે.