જામનગરમાં રૂપિયા 10 કરોડની છેતરપિંડી કરનારા દંપતીનો કોરોના રિપોર્ટ પોઝિટિવ

જામનગર શહેરમાં 10 કરોડથી વધુ રકમની છેતરપિંડી પ્રકરણમાં નાશી ગયેલા દંપતીને પોલીસે મુંબઈમાંથી ઝડપી પાડ્યૂં હતું. તેમજ જામનગર લઈ આવ્યાં હતા. જ્યાં બન્નેનો કોવિડ ટેસ્ટ કરાવાતા કોરોના રિપોર્ટ પોઝિટિવ આવ્યો હતો. જોકે, દંપતીને પકડવા ગયેલી પોલીસ ટીમનો કોરોના રિપોર્ટ નેગેટિવ આવ્યો હતો. આ પ્રકરણમાં ઝડપાયેલા દંપતીનો હજુ એક સાગરિત નાસતો ફરે છે. જેની શોધખોળ માટે પોલીસે ચક્રો ગતિમાન કર્યા હતા.

• જામનગરમાં છેતરપિંડી કરનારા દંપતિ ઝડપાયા
• 10 કરોડથી વધુની છેતરપિંડી કરી હતી
• દંપતિનો કોરોના ટેસ્ટ કરવામાં આવતા રિપોર્ટ આવ્યો પોઝિટિવ

જામનગરઃ શહેરમાં નિવૃત્ત આર્મીમેન સહિતના લોકોને રોકાણના બહાને લોભામણી સ્કીમ આપી 10 કરોડથી વધુની છેતરપિંડીના ગુનાના મુખ્ય આરોપી એવા હિરેન મહેન્દ્રભાઈ ધબ્બા અને તેની પત્ની આશાબેન હિરેન ધબ્બા કે જેઓ કૌભાંડ આચરીને ભાગી છૂટ્યા હતા. જેઓને પોલીસે મુંબઈથી ઝડપી જામનગર લઈ આવ્યા હતા. ત્યારે તેઓના કોવિડ ટેસ્ટની કાર્યવાહી હાથ ધરવામાં આવતા બન્નેના રિપોર્ટ પોઝિટિવ આવતા પોલીસ તંત્રમાં દોડધામ મચી ગઈ હતી. બન્નેને હાલ જી.જી.હોસ્પિટલના કોવિડ વોર્ડમાં રાખવામાં આવ્યા છે. જેના પર પોલીસ બંદોબસ્ત પણ ગોઠવી દેવાયો છે. આરોપી દંપતીને પકડવા ગયેલા જામનગરના PSI રાદડિયા ઉપરાંત તમામ સ્ટાફનો પણ કોવિડ ટેસ્ટ કરવામાં આવ્યો હતો. જોકે, તમામનો રિપોર્ટ નેગેટિવ આવ્યો હોવાથી પોલીસે રાહત અનુભવી હતી.

આ પણ વાંચોઃ જામનગરમાં ઓમ ટ્રેડીંગના સંચાલકોએ નિવૃત્ત આર્મીમેન સાથે રૂપિયા 33 લાખની છેતરપિંડી કરી

આ પ્રકરણમાં કુલ 6 આરોપીઓની પોલીસે અત્યારસુધીમાં કરી છે ધરપકડ

પોલીસે આ પ્રકરણમાં અગાઉ મહેન્દ્ર ધબ્બા, તોસિફ શેખ, સંગીતા લાલવાણી, હસમુખ પરમાર વગેરેની ધરપકડ કરી હતી અને તેઓને જેલ હવાલે કર્યા હતા. ઉપરાંત તપાસ દરમિયાન એજન્ટ તરીકેનું કામ કરતા વધુ બે આરોપીઓ પ્રવિણ ઝાલા અને નવીન નાનજીભાઈ વાઘેલાની પણ ધરપકડ કરી જેલ હવાલે કરવામાં આવ્યા હતા. આ પ્રકરણમાં કુલ 6 આરોપીઓની ધરપકડ થઈ ચૂકી છે. ઉપરાંત મુખ્ય સૂત્રધાર દંપતી પણ પોલીસના હાથમાં આવી ગયું છે. હજુ તેનો ભાઈ જય ધબ્બા ફરાર હોવાથી પોલીસ તેને શોધી રહી છે.