હાઇકોર્ટના ચૂકાદા મુજબ કેવડીયામાં આદિવાસીઓના વિકાસ કામગીરી ચાલી રહી છે: પ્રદીપસિંહ જાડેજા

સ્ટેચ્યૂ ઓફ યુનિટીમાં આદિવાસીઓ સાથે અન્યાય થઇ રહ્યો હોવાનો કોંગ્રેસ દ્વારા આક્ષેપ કરવામાં આવ્યો છે ત્યારે તેના જવાબમાં રાજ્યના ગૃહપ્રધાન પ્રદીપસિંહ જાડેજા જણાવ્યું હતું કે કોંગ્રેસ અત્યારે કેવડીયા મુદ્દે ખોટી રાજનીતિ કરી રહી છે જ્યારે ગુજરાત હાઇકોર્ટના ચૂકાદા મુજબ કેવડિયામાં આદિવાસીઓના વિકાસ માટેની કામગીરી ચાલી રહી છે.

ગાંધીનગર :ગૃહ રાજ્યપ્રધાન પ્રદીપસિંહ જાડેજાએ જણાવ્યું છે કે, નર્મદા જિલ્લામાં વિશ્વની સૌથી ઉંચી સરદાર સાહેબની ‘‘સ્ટેચ્યુ ઓફ યુનિટી’’ પ્રોજેક્ટના વિસ્તારમાં વસતાં આદિવાસીઓના સર્વાંગી વિકાસ માટે રાજ્ય સરકાર હંમેશા ચિંતિત છે. ત્યારે કોંગ્રેસે આદિવાસીઓને ગેરમાર્ગે દોરવાનું બંધ કરવું જોઇએ. સમગ્ર વિશ્વ, દેશ અને રાજ્ય જ્યારે ખભેખભો મિલાવીને કોરોનાની મહામારી સામે જીતવા માટે જંગ લડી રહ્યું છે. ત્યારે મદદરૂપ થવાને બદલે કોંગ્રેસ રાજનીતિ કરે છે તે અત્યંત નિંદનીય છે.

જાડેજાએ વધુમાં જણાવ્યું હતું કે કોવિડ 19ની પરિસ્થિતિમાં નાગરિકોને આવી વિકટ પરિસ્થિતિમાંથી બહાર લાવવા માટે રાજ્યનું સમગ્ર વહીવટીતંત્ર રાતદિવસ કામ કરી રહ્યું છે, ત્યારે કેવડીયાના આદિવાસીઓને ઉશ્કેરીને ‘‘સ્ટેચ્યૂ ઓફ યુનિટી’’ ખાતે વાતાવરણ ડહોળવાનો પ્રયાસ કર્યો છે. તેને રાજ્ય સરકાર સાંખી લેશે નહી. નામ. હાઇકોર્ટ દ્વારા અપાયેલ ચૂકાદા મુજબ જ આ વિસ્તારના આદિવાસીબંધુઓને સહાયરૂપ થવાની કામગીરી ચાલી રહી છે. હાઇકોર્ટના ચૂકાદા મુજબ આ વિસ્તારમાં વસતાં આદિવાસીબંધુઓ માટે સરદાર સરોવર નર્મદા નિગમ દ્વારા જે પેકેજ તૈયાર કરીને કોર્ટમાં રજૂ કરાયું છે તે મુજબ તમામ નાણાકીય સહાય તથા અન્ય સવલતો પૂરી પાડવા સરદાર સરોવર નર્મદા નિગમ તત્પર છે. લૉકડાઉનની પરિસ્થિતિમાં જનજીવન જેવું પૂર્વવત થશે ત્યારે ત્વરિત આ લાભો પૂરા પાડવામાં આવશે. કોંગ્રેસ લોકોને ઉશ્કેરે છે તે વાજબી નથી. આદિવાસી ઉપર સરકારે કોઇ અત્યાચાર કર્યાં નથી આ ભાઇઓને તેમની મૂળ જગ્યાએ પણ જરૂર હશે તો પ્રસ્થાપિત કરવાનો પ્રયાસ રાજ્ય સરકાર ચોક્કસ કરશે. ‘‘સ્ટેચ્યૂ ઓફ યુનિટી’’ પ્રોજેક્ટના વિકાસ થકી સ્થાનિક કક્ષાએ આદિવાસીબંધુઓને મોટા પ્રમાણમાં રોજગારી પૂરી પાડવાનો આશય રાજ્ય સરકારનો છે એટલે ત્યાં જે વિકાસ કામો થઇ રહ્યાં છે તે તેમના હિતમાં જ છે.નર્મદા ડેમના અસરગ્રસ્તોને તંત્ર દ્વારા હેરાન કરીને તેમના ઉપર અત્યાચાર ગુજારવામાં આવી રહ્યાં છે તેવા આક્ષેપને પાયાવિહોણા ગણાવી જાડેજાએ કહ્યું કે, ‘‘સ્ટેચ્યૂ ઓફ યુનિટી’’ ખાતેના અસરગ્રસ્તોને કોઇપણ જાતનો અન્યાય ન થાય અને તેમની પર અમાનવીય કૃત્ય ન થાય તે માટે રાજ્ય સરકાર હંમેશા પ્રયત્નશીલ છે જ અને રહેશે. એટલે આદિવાસીબંધુઓએ સહેજપણ ગભરાવાની જરૂર નથી.