ખેડૂતોને વરસાદથી થયેલા નુકસાનના વિસ્તારમાં વધારો થશેઃ કૃષિ પ્રધાન આર. સી. ફળદુ

રાજ્યમાં છેલ્લા પાંચ દિવસથી સૌરાષ્ટ્ર વિસ્તારમાં કમોસમી વરસાદના ઝાપટાં પડી રહ્યા છે ત્યારે 21 ઓક્ટોબરથી શરૂ થતી ટેકાના ભાવે મગફળીની ખરીદી પણ પાંચ દિવસ બાદ શરૂ કરવા રાજ્ય સરકારે નક્કી કર્યું છે. કમોસમી વરસાદના કારણે થયેલ નુકસાન બાબતે પણ આજે કેબિનેટ બેઠકમાં ચર્ચા થઈ હતી, જેને આવનારા દિવસોમાં ચૂંટણી બાદ આ વિસ્તારોને પણ સહાયની અંદર ગણતરી કરવામાં આવશે તેવું રાજ્યના કૃષિ પ્રધાન આર. સી. ફળદુએ જણાવ્યું હતું.

• કમોસમી વરસાદથી ખેડૂતોને થયેલા નુકસાન અંગે કેબિનેટ બેઠકમાં ચર્ચા
• 21 ઓક્ટોબરથી શરૂ થવાની હતી ટેકાના ભાવે મગફળીની ખરીદી
• હવે ટેકાના ભાવે મગફળીની ખરીદી 5 દિવસ બાદ શરૂ થશે
• કૃષિ પ્રધાન આર. સી. ફળદુએ નિવેદનમાં જણાવ્યું

ગાંધીનગર: રાજ્યના મુખ્યપ્રધાન વિજય રૂપાણી અધ્યક્ષતામાં મળેલી કેબિનેટ બેઠકમાં આજે બુધવારે રાજ્યમાં ખેડૂતોને થયેલા નુકસાન અંગે ચર્ચા કરવામાં આવી હતી. ચાલુ વર્ષે રાજ્યમાં ભારેથી અતિભારે વરસાદ ખાબકયો છે. ત્યારે વરસાદથી ખેડૂતોને પણ ઘણું નુકસાન થયું છે. આ નુકસાન બાબતે રાજ્ય સરકારે ખેડૂતો માટે ખાસ પેકેજની જાહેરાત પણ કરી હતી. જેમાં કુલ 15,07,598 ખેડૂતોએ સહાય માટેનું રજિસ્ટ્રેશન કરાવ્યું હતું. આ તમામ અરજીની અત્યારે ખરાઈ કરાઈ રહી છે. જ્યારે 32, 62, 215 ખેડૂતોને તેમના ખાતામાંથી રૂ 256 કરોડ 29 લાખ 49 હજાર 20 જિલ્લાના ખેડૂતોને ચૂકવવામાં આવ્યા છે. જ્યારે હજુ પણ બાકી રહેતા ખેડૂતો અરજી કરી શકે છે અને નુકસાન થનારા તમામ ખેડૂતો લાભ લે તેવી અપીલ પણ રાજ્યના કૃષિ પ્રધાન આર. સી. ફળદુએ કરી હતી. આ ઉપરાંત 31 ઓક્ટોબર સુધી ખેડૂતે કરેલી સહાય અરજીની વેરિફિકેશનની પ્રક્રિયા ચાલુ રહેશે.

સહાયમાં બાકી રહી ગયેલા જિલ્લા-તાલુકાને પણ સહાય અપાશેઃ આર. સી. ફળદુ

જ્યારે છેલ્લા પાંચ દિવસથી સૌરાષ્ટ્ર વિસ્તારના પડી રહેલા કમોસમી વરસાદને લઈને આર. સી. ફળદુએ જણાવ્યું હતું કે, નુકસાન થયું હોય તેવા વિસ્તારોમાં વધારો કરવામાં આવશે. જ્યારે રાજ્યના અમુક જિલ્લાઓ અને અમુક તાલુકાઓમાં પણ સહાયમાં બાકી રહી ગયા છે ત્યારે આવનારા સમયમાં પણ તે વિસ્તારને પણ વધારો કરવામાં આવશે. આ તમામ કામ પેટાચૂંટણી બાદ હાથમાં લેવામાં આવશે. સાણંદ આમ સહાય પેકેજમાં વધારાના 13 પૈકીના 11 તાલુકાઓનો સમાવેશ થાય છે. જ્યારે અન્ય બે તાલુકા અંગે સરકાર પેટા ચૂંટણી બાદ નિર્ણય કરશે.