રાજ્યના ગ્રામ્ય વિસ્તારોમાં પોલીસને કોવિડ કેર સેન્ટરની જવાબદારી સોંપાઈ

કોરોના મહામારીને કારણે રાજ્યમાં પોલીસ એક્શન મોડમાં આવી છે. ત્યારે, રાજ્યના DGP આશિષ ભાટીયા દ્વારા રાજ્યના ગ્રામ્ય વિસ્તારોમાં કોવિડ કેર સેન્ટર પર સ્થાનિક પોલીસ ઇન્સ્પેક્ટર અને સબ ઇન્સ્પેક્ટરને જવાબદારી સોંપવામાં આવી છે. આ બાબતે રાજ્યના DGPએ જણાવ્યું હતું કે, પોલીસ હવે હોસ્પિટલમાં પણ તપાસ કરી રહી છે. જ્યારે, રેમડેસીવીરની કાળાબજારી કરતા 112 આરોપીઓની ધરપકડ કરવામાં આવી છે.

• રાજ્યમાં કોવિડ મહામારીમાં પોલીસ એક્ટિવ મોડમાં
• ગ્રામ્ય વિસ્તારોમાં પોલીસને કોવિડ કેર સેન્ટરની જવાબદારી સોપાઈ
• રાજ્યમાં છેલ્લા 7 દિવસમાં કલમ 188ના 17,420 કેસ, માસ્ક વગરના 73,994 લોકોને દંડ

ગાંધીનગર: રાજ્યમાં કોરોનાનો કહેર તબાહી મચાવી રહ્યો છે. શહેરી વિસ્તારોમાં કેસો સામાન્ય રીતે ઓછા થઈ રહ્યા છે. પરંતુ, ગ્રામ્ય વિસ્તારોમાં કેસો કાબૂ બહાર જતા રહ્યા હોય તેવી પરિસ્થિતિનું નિર્માણ થઈ રહ્યું છે. ત્યારે, રાજ્ય સરકાર દ્વારા 1 મેંના રોજ મારુ ગામ કોરોના મુક્ત ગામનું અભિયાન શરૂ કર્યું છે. ત્યારે, આ અભિયાનના ભાગરૂપે ગ્રામ્ય વિસ્તારોમાં કોવિડ કેરના દેખરેખ માટે પોલીસને પણ જવાબદારી સોંપવામાં આવી છે.

આ પણ વાંચો:મેડિકલ સાધનોના 200 ટકાથી લઇને 1,000 ટકા લેવાય છે ભાવ

ગ્રામ્ય વિસ્તારોમાં પોલીસને જવાબદારી સોપાઈ

આ બાબતે રાજ્યના DGP આશિષ ભાટિયાએ જણાવ્યું હતું કે, રાજ્યમાં ગ્રામ્ય વિસ્તારોમાં પોલીસની નજર છે. ગ્રામ્ય વિસ્તારમાં કોવિડ કેર સેન્ટર પર સ્થાનિક પોલીસ ઇન્સ્પેક્ટર અને સબ ઇન્સ્પેક્ટરને જવાબદારી સોંપવામાં આવી છે. જેમાં, પોલીસ કોવિડ સેન્ટરમાં તપાસ પણ કરશે. આ બાબતે, પોલીસ અને GRD જવાનો અને ગ્રામજનોને સૂચના આપવામાં આવી છે. આ સમગ્ર મામલે 56000 પોલીસ જવાનો, 13000 હોમગાર્ડના જવાનો અને 30,000 ગ્રામરક્ષક દળને જવાબદારી આપવામાં આવી છે. જ્યારે, 90 જેટલી SRP કંપની માઇક્રોકન્ટેન્મેન્ટ ઝોનમાં નજર રાખી રહ્યા છે.

રાજ્યની પોલીસ માટે 24*7 હેલ્પલાઇન

રાજ્યના DGP આશિષ ભાટિયાએ વધુમાં પોલીસની કોવિડને લાગતી સુરક્ષા માટે જણાવ્યું હતું કે, રાજ્યમાં તમામ પોલીસ કર્મચારીઓએ રસીનો પ્રથમ અને બીજો ડોઝ લઈ લીધો છે. પરંતુ, જો પોલીસ કર્મચારીઓ કોરોના સંક્રમિત થાય તો સોમચંદ ટ્રસ્ટ સાથે સંકલન કરીને ટેલીમેડિસિન આપવામાં આવી રહી છે. જેમાં રોજના 300થી વધુ કોલ આવી રહ્યા છે. ત્યારે, 24*7 સર્વિસ ડોક્ટર દ્વારા ફક્ત પોલીસ કર્મચારીઓને અને પરિવારજનોને સુવિધા આપવામાં આવી રહી છે. આ ઉપરાંત, અન્ય જિલ્લામાં અધિકારીઓને નોડલ ઓફિસર તરીકે નિમણૂક કરવમાં આવી છે.

લગ્નમાં પોલીસ દ્વારા કરવામાં આવ્યું ચેકીંગ

રાજ્યમાં સંક્રમણ વધતા રાજ્ય સરકાર દ્વારા લગ્નમાં 50 વ્યક્તિઓ ફિક્સ કરવામાં આવ્યા હતા. જ્યારે અંતિમ વિધિમાં 20 વ્યક્તિઓની જ હાજરી ફરજિયાત કરવામાં આવી છે. ત્યારે, લગ્ન બાબતે રાજ્ય સરકારે ઓનલાઈન અરજી કરીને લગ્નની પરવાનગી માટેની સૂચના આપી હતી. આ બાબતે રાજ્યના DGP આશિષ ભાટિયાએ જણાવ્યું હતું કે, રાજ્યની પોલીસ દ્વારા અત્યાર સુધીમાં કુલ 137 લગ્નમાં પોલીસ દ્વારા ચેકિંગ કરવામાં આવ્યું છે. જેમાં, 25 ગુના વગર માસ્ક અને 50થી વધુ લોકો સામેલ હોય તેવો એક કેસ દાખલ કરવામાં આવ્યો છે. જ્યારે, અત્યાર સુધીમાં લગ્નમાં 515 ગુનાઓ જાહેરહિતના ભંગ બદલ નોંધવામાં આવ્યા છે. આ ઉપરાંત, 667 વ્યક્તિઓની લગ્નમાંથી કાયદાના ભંગ બદલ ધરપકડ પણ કરવામાં આવી છે.

આ પણ વાંચો:ગૃહ રાજ્યપ્રધાન પ્રદિપસિંહના અધ્યક્ષસ્થાને સમીક્ષા બેઠક યોજાઇ

હોસ્પિટલમાં પણ પોલીસ ની તપાસ થશે

વર્તમાન સમયમાં હોસ્પિટલમાં બેડ નથી મળી રહ્યા ત્યારે, અમુક હોસ્પિટલો દ્વારા બેડ માટે વધુ પૈસાની ઉઘરાણીઓ કરવામાં આવી રહી છે. આ ઉપરાંત, અમુક મળતિયાઓ પણ હોસ્પિટલમાં બેડના સોદા કરતા હોય તેવી વાત સામે આવી રહી છે. ત્યારે, આ બાબતે રાજ્યના DGPએ જણાવ્યું હતું કે, પોલીસ હવે હોસ્પિટલમાં પણ તપાસ કરી રહી છે. જ્યારે, રેમડેસીવીરની કાળાબજારી કરતા 112 આરોપીઓની ધરપકડ કરવામાં આવી છે. જેમાં, કુલ 41 જેટલા કેસ નોંધવામાં આવ્યા છે. આ ઉપરાંત, સીટી સ્કેનમાં વધારે ભાવ ઉઘરાવતી લેબોરેટરી વિરુદ્ધ પણ કાયદેસરની કાર્યવાહી કરવામાં આવશે. આ સાથે જ મોટી બ્રાન્ડના ડુબ્લીકેટ માસ્ક વેચાય છે. તે બાબતે પણ પોલીસ તપાસ કરી રહી છે.

પોલીસે કાયદા ભંગના ગુના નોંધ્યા

DGP આશિષ ભાટિયાએ વધુમાં જણાવ્યું હતું કે, રાજ્યના 36 જિલ્લામાં રાત્રી કરફ્યૂ અને દિવસના પ્રતિબંધ લાગુ છે. ત્યારે, છેલ્લા 7 દિવસમાં કલમ 188ના ભંગ બદલ 17,420 ગુનાઓ, માસ્ક વગર 73,994 ગુનાઓ આ સાથે કુલ મળીને 11,803 વાહનોની જપ્તી કરવામાં આવી છે. જ્યારે, છેલ્લા 7 દિવસમાં 17,267 આરોપીઓની ધરપકડ કરવામાં આવી છે.