નગરપાલિકાઓને નગર-જન સુખાકારીના વિકાસના આધારે હવેથી સ્ટાર રેન્કીંગ અપાશે

રાજ્યની નગરપાલિકાઓને નગર સુખાકારીના અને જનસુખાકારીના વિકાસ કામોના પેરામિટર્સના આધારે સ્ટાર રેન્કીંગ અપાશે. મુખ્યપ્રધાન વિજય રૂપાણી (vijay rupani)ના અધ્યક્ષસ્થાને રાજ્યની 6 રિજીયોનલ મ્યૂનિસીપલ કમિશનરો અને શહેરી વિકાસ વિભાગની સમીક્ષા બેઠક યોજાઇ હતી. જેમાં મુખ્યપ્રધાન વિજયભાઇ રૂપાણીએ આ નિર્ણય લીધો હતો.

• પેરામિટર્સના આધારે સ્ટાર રેન્કીંગ અપાશે
• મુખ્યપ્રધાન વિજયભાઇ રૂપાણીએ આ નિર્ણય લીધો
• લાઇટ-પાણી-રસ્તા, STP, ભૂર્ગભ ગટર, નલ સે જલ આધારે રેન્કિંગ મળશે

ગાંધીનગર:મુખ્યપ્રધાન રૂપાણી (vijay rupani)ના અધ્યક્ષસ્થાને ગાંધીનગરમાં રાજ્યના 6 રિજીયોનલ મ્યૂનિસીપલ કમિશનરો, શહેરી વિકાસ વિભાગના વરિષ્ઠ અધિકારીઓની યોજાયેલી સમીક્ષા બેઠકમાં તેમણે નગરપાલિકાઓની પ્રજાલક્ષી કામગીરી સુગ્રથિત કરવા અંગે ગહન માર્ગદર્શન આપ્યું હતું અને આ નિર્ણય લીધો હતો. ગુજરાત મ્યૂનિસિપલ ફાયનાન્સ બોર્ડના અધ્યક્ષ ધનસુખભાઇ ભંડેરી, GUDCના ડિરેકટર હાર્દિક શાહ તેમજ શહેરી વિકાસના અધિક મુખ્ય સચિવ મૂકેશ પૂરી, શહેરી હાઉસીંગ સચિવ લોચન શહેરા વગેરે આ બેઠકમાં સહભાગી થયા હતા.

રાજ્યની 156 નગરપાલિકાઓ વચ્ચે તંદુરસ્ત સ્પર્ધા થશે

આ સંદર્ભમાં તેમણે કહ્યું કે, રાજ્યની 156 નગરપાલિકાઓ વચ્ચે વિકાસના અને જનસુખાકારી સુવિધા વૃદ્ધિના કામોની શ્રેષ્ઠતાની તંદુરસ્ત સ્પર્ધા થાય તેવું વાતાવરણ નિર્માણ કરવું છે. આવી તંદુરસ્ત સ્પર્ધા અને નગરોમાં નાગરિક સુખાકારી, લાઇટ-પાણી-રસ્તા, એસ.ટી.પી-ભૂર્ગભ ગટર, હર ઘર જલ-નલ સે જલ વગેરે વિવિધ વિકાસ કામોના પેરામિટર્સના આધારે નગરપાલિકાઓને સ્ટાર રેન્કીંગ આપી દેવામાં આવશે તેમ પણ મુખ્યપ્રધાને જણાવ્યું હતું. આના પરિણામે નગરપાલિકાઓને લોકહિત-નગર સુવિધાના વધુને વધુ કામો કરવાનું પ્રોત્સાહન મળશે એમ તેમણે ઉમેર્યુ હતું.

આ પણ વાંચો:પોરબંદર જિલ્લાની નગરપાલિકાઓને વિકાસના કામ માટે રૂપિયા 4.12 કરોડના ચેક અર્પણ કરાયા

મુખ્યપ્રધાને કર્યા આ પ્રેરક સૂચનો

156 નગરપાલિકાઓ વચ્ચે જનહિત-માળખાકીય વિકાસ કામોની શ્રેષ્ઠતા માટે તંદુરસ્ત સ્પર્ધાનું વાતાવરણ બનાવવાની નેમ લીધી છે. રાજ્યની બધી જ નગરપાલિકાઓમાં એક સમાન કોમન ટેક્ષ એસસમેન્ટ-રિકવરી સીસ્ટમની સંભાવના અને સર્વગ્રાહી વિચારણા માટે ઉચ્ચસ્તરીય કમિટીની રચના કરો, કમિટીની ભલામણો-અભ્યાસ તારણોના આધારે રાજ્ય સરકાર આગામી દિવસોમાં કોમન ટેક્ષ-એસસમેન્ટ અંગેની પોલિસી અંગે વિચારાધિન રહે. 6 રિજીયોનલ મ્યૂનિસિપલ કમિશનરો પોતાના કાર્યક્ષેત્રની નગરપાલિકાઓના વિકાસ કામો-માળખાકીય સુવિધા કામોની પ્રગતિની સમીક્ષા દર પખવાડિયે બેઠક યોજીને કરે તેમજ દર મહિને એક રાજ્યસ્તરીય બેઠક યોજાય, નગરોમાં પાણી-ભૂર્ગભ ગટર-એસ.ટી.પી-નલ સે જલ જેવા પાયાના જનહિત કામોના લક્ષ્યાંક નિયત કરી કામગીરીમાં ગતિ લાવો જેવા સૂચનો મુખ્યપ્રધાને આપ્યા હતા.

આ પણ વાંચો:વલસાડની નગરપાલિકાઓને 7.75 કરોડના ચેક અર્પણ કરવાનો ઓનલાઇન કાર્યક્રમ યોજાયો