માં કાર્ડ ધારકો માટે મહત્વનો નિર્ણય, ગણતરીના કલાકોમાં જ મળશે સહાય

રાજ્યમાં કોરોના મહામારીને ધ્યાને લઈને સરકારે એક મહત્વનો નિર્ણય લીધો છે. સરકારે જાહેરાત કરી છે, સરકારે માં કાર્ડ માટે ગ્રીન કોરિડોર સિસ્ટમ ઊભી કરીને ધારકોને ગણતરીના કલાકોમાં જ સહાય આપવા યોજના બનાવી છે.

• માં કાર્ડ બાબતે રાજ્ય સરકારે કર્યો મહત્વનો નિર્ણય
• ગણતરીના કલાકોમાં આપવામાં આવશે સહાય
• આ અગાઉ 2 દિવસનો સમય લાગતો હતો

ગાંધીનગર :રાજ્યના ગરીબ અને મધ્યમ વર્ગના પરિવારો માટે માં કાર્ડ તથા પ્રધાનમંત્રી આરોગ્ય કાર્ડ એક આશીર્વાદ સમાન બન્યું છે, ત્યારે રાજ્ય સરકાર અને કેન્દ્ર સરકાર દ્વારા આ બન્ને કાર્ડને એક કરીને પ્રધાનમંત્રી આરોગ્ય કાર્ડ નામ આપવામાં આવ્યું છે, આ સાથે જ આજે ગુરૂવારે રાજ્ય સરકાર દ્વારા એક મહત્વનો નિર્ણય કરવામાં આવ્યો હતો, જેમાં હવે માં કાર્ડ ધારકોને ફક્ત ગણતરીના કલાકોમાં જ સહાયની રકમ જમા કરવામાં આવશે.

આ પણ વાંચો:અમદાવાદમાં 2 સફાઈ કામદારોના ગટરમાં પડી જતા મોત, વધુ એક કર્મચારી લાપતા

શું છે પ્રોસેસ ?

જો કોઈપણ વ્યક્તિને આરોગ્ય કાર્ડ કઢાવવું હોય તો જે તે આરોગ્ય સંસ્થા અથવા તો PHC /CHC સેન્ટરમાં જઈને કાર્ડ ઇશ્યૂ કરાવી શકે છે અને કાર્ડ ઇશ્યૂ થયાના 2 થી 3 દિવસ બાદ કાર્ડમાં રાજ્ય સરકારના નોટિફિકેશન પ્રમાણે 5 લાખ રૂપિયાની સહાય આપવામાં આવે છે. જેથી ઇમર્જન્સી અથવા તો ત્યારબાદના ગાળામાં જો વ્યક્તિ દાખલ થાય તો તે સહાયનો ઉપયોગ કરી શકે, પરંતુ હવે વ્યક્તિ જ્યારે માં કાર્ડ નવું ઈશ્યૂ કરશે ત્યારે ગણતરીના કલાકોમાં જ આ 5 લાખ રૂપિયાની સહાય તાત્કાલિક ધોરણે જમા કરાવવામાં આવશે.

ઇમરજન્સીમાં ખૂબ ઉપયોગી નીવડશે આ નિર્ણય

ઇમર્જન્સી દરમિયાન જો કોઈ વ્યક્તિ પાસે માં કાર્ડ ન હોય, તો તેમને મુશ્કેલીનો સામનો કરવો પડે છે, પરંતુ રાજ્ય સરકારના આ નિયમથી ઇમર્જન્સીમાં કાર્ડ ઇશ્યૂ કરીને ગણતરીના કલાકોમાં જ સહાયની રકમ જમા કરવામાં આવશે અને તાત્કાલિક ધોરણે સારવાર પણ થઈ શકશે. જ્યારે આ કાર્યને વધુ ઝડપી બનાવવા માટે હોસ્પિટલમાં અને એજન્સીઓમાં જે જગ્યાએ કાર્ડ ઇશ્યૂ કરવામાં આવ્યા છે, ત્યાં આરોગ્ય મિત્રની પણ નિમણૂક કરવામાં આવશે.

આ પણ વાંચો:માસ પ્રમોશનથી અસંતુષ્ટ 12 વિજ્ઞાન પ્રવાહના 65 વિદ્યાર્થીઓનું પરિણામ જાહેર, 38 પાસ, 11 ગેરહાજર

સરકારે ગ્રીન કોરિડોર તૈયાર કર્યો

રાજ્યના આરોગ્ય વિભાગ તરફથી મળતી માહિતી પ્રમાણે, રાજ્ય સરકારે આ માં કાર્ડ માટે ખાસ ગ્રીન કોરિડોર સિસ્ટમ તૈયાર કરી છે. સરકારી હોસ્પિટલમાં સિંગલ વિન્ડો સિસ્ટમ ઊભી કરીને ખાસ ગ્રીન કોરિડોર તૈયાર કરવામાં આવ્યો છે, અત્યાર સુધી સહાય માટે 2 દિવસ જેટલો સમય લાગતો હતો, પરંતુ હવે આ ગ્રીન કોરિડોરની સિસ્ટમની સહાયથી લાભાર્થીને માત્ર 3 કલાક કરતા ઓછા સમયમાં સહાય પ્રાપ્ત થશે.