ડોક્ટરો અને નર્સિંગ સ્ટાફના આંદોલનમાં સિવિલમાં પોલીસ ખડકી દેવાઇ, એક ડોકટરની ધરપકડ

GMERSના ડોક્ટરો અને નર્સિંગ સ્ટાફનું આંદોલન સિવિલ હોસ્પિટલ ખાતે ચાલી રહ્યું છે. જ્યાં મોટી સંખ્યામાં પોલીસનો કાફલો ખડકી દેવાયો છે. એક ડોકટરની ધરપકડ પણ કરવામાં આવી છે. આંદોલનમાં પોલીસ મેદાનમાં આવતા અનેક સવાલો ઉભા થયા છે.

• આંદોલનમાં પોલીસ મેદાનમાં આવતા અનેક સવાલો ઉભા થયા
• સિવિલમાં પોલીસના ઉચ્ચ અધિકારીઓ પણ પહોંચ્યા
• ડોક્ટરો અને નર્સિંગ સ્ટાફ ગાંધીનગર સિવિલ હોસ્પિટલમાં બેનરો સાથે ઉભા છે

ગાંધીનગરઃ GMERSના ડોક્ટરો અને નર્સિંગ સ્ટાફનું આંદોલન છેલ્લા બે દિવસથી ચાલી રહ્યું છે. જેમને સોમવારથી જ આંદોલનની ચિમકી આપી હતી. જ્યારે બુધવારથી જ તેઓએ કોરોના પેશન્ટને લગતી સારવાર બંધ કરી હતી. આજે સવારથી જ તેઓ ગાંધીનગર સિવિલ હોસ્પિટલમાં બેનરો સાથે ઉભા છે, ત્યારે ડોક્ટરો અને નર્સિંગ સ્ટાફના આંદોલનમાં સિવિલમાં પોલીસ ખડકી દેવાઈ છે. જેથી અનેક તર્ક વિતર્કો ઉભા થયા છે.

આ પણ વાંચોઃજામનગર: ભારત બંધના એલાનને પગલે સુરક્ષા જાળવવા ઘોડે સવાર પોલીસ તૈનાત કરાઈ

એસોસિએશનના ડોકટરની પોલીસ દ્વારા ધરપકડ કરવામાં આવી

GMERS ફેકલ્ટી એસોસિએશનના પ્રમુખ ડો. હીરેન પ્રજાપતિએ કહ્યું કે, અમે અહીં શાંતિથી આંદોલન કરી રહ્યા હતા, તેવામાં મોટી સંખ્યામાં પોલીસનો કાફલો ખડકી દેવાયો છે. જેમાં અમારા એસોસિએશનના ડો. ગૌરીશંકર શ્રીમાળીને અરેસ્ટ કરવામાં આવ્યા છે. પોલીસ દ્વારા જેલમાં પુરવાની અને મારીને ભગાડવાની ધમકી આપવામાં આવી રહી છે. તેવામાં આમારી જાનનું જોખમ છે, તેવું તેમને વિડિયો જારી કરી જણાવ્યું હતું.

આંદોલન કારીઓને આ આંદોલન તૂટવાનો ડર પેઠો છે

છેલ્લા બે દિવસથી GMERSના આંદોલને જોર પકડ્યું છે. કારણ કે તેમને કોરોનાના પેશન્ટની સારવાર બંધ કરી છે. સરકારે પણ કોઈ સ્પષ્ટ તારણ તેમની માગોને લઈને હજુ સુધી નક્કી નથી કર્યું. ત્યારે પોલીસ પણ ખડકી દેવામાં આવી છે, ત્યારે આંદોલન કારીઓમાં થોડો ડર પણ આંદોલન તૂટવાને લઈને પેઠો છે. સિવિલ હોસ્પિટલમાં જ્યાં આંદોલન ચાલી રહ્યું છે. ત્યાં ગાંધીનગર સિવિલ હોસ્પિટલમાં પોલીસના ઉચ્ચ અધિકારીઓ સાથે પોલીસનો કાફલો ખડકી દેવાયો છે.

આ પણ વાંચોઃરાત્રી કરફ્યૂ દરમિયાન જામનગર પોલીસ દ્વારા સઘન ચેકિંગ

આંદોલન તોડી પાડવા માટે પોલીસ મેદાને આવ્યાનો આંદોલનકારીઓનો દાવો

GMERS અને નર્સિંગ સ્ટાફના આંદોલનનો મામલો પોલીસ આવતા બિચકાયો છે. પોલીસ કાફલો ખડકાયો છે, ત્યારે આંદોલન તોડી પાડવા માટે પોલીસ મેદાને આવ્યાનો આંદોલનકારીઓએ દાવો કર્યો છે. જ્યારે પોલીસે સ્પષ્ટતા કરી છે કે, દર્દીના સગા દ્વારા હોસ્પિટલ સ્ટાફ સાથે માથાકૂટ ના થાય તે માટે બંદોબસ્ત ગોઠવાયો છે.