ગુજરાતની એકમાત્ર તમિલ સ્કૂલ ઇતિહાસ બનશે, સ્કૂલ બંધ ન થાય તે માટે વિદ્યાર્થીઓએ શિક્ષણપ્રધાનને રજૂઆત કરી

ગુજરાત રાજ્યમાં એકમાત્ર અમદાવાદમાં જ કાર્યરત તમિલ શાળા બંધ કરવાનો અમદાવાદ શિક્ષણ અધિકારી દ્વારા હુકમ આપવામાં આવ્યો છે ત્યારે સરકારી તમિલ શાળા બંધ ન થાય તે માટે આજે શાળાના વિદ્યાર્થીઓ અને વાલીઓએ ગાંધીનગર આવીને રાજ્યના શિક્ષણ પ્રધાન ભૂપેન્દ્રસિંહ ચૂડાસમાને રજૂઆત કરી હતી.

ગાંધીનગર : સમગ્ર ગુજરાતમાં ફક્ત અમદાવાદમાં જ સરકારી તમિલ શાળા આવેલી છે આ શાળામાં કુલ 31 જેટલા વિદ્યાર્થીઓ અભ્યાસ કરી રહ્યાં છે પરંતુ અમદાવાદ જિલ્લા શિક્ષણ અધિકારી દ્વારા શાળા અચાનક જ બંધ કરવાનો વટહુકમ બહાર પાડવામાં આવ્યો છે. જ્યારે વિદ્યાર્થીઓને અન્ય શાળામાં પ્રવેશ મેળવી લેવાની પણ સૂચના આપવામાં આવી છે ત્યારે ભાષાની સમસ્યાને લઈને મૂંઝાાયાં છે.

આ બાબતે તમિલ શાળાની વિદ્યાર્થી પ્રીતિએ જણાવ્યું હતું કે અમદાવાદ જિલ્લા શિક્ષણ અધિકારીઓ દ્વારા શાળા બંધ કરવાની સૂચના આપવામાં આવી છે ત્યારે અમને સૌથી મોટી સમસ્યા ભાષાની છે, ગુજરાતી ભાષા પર પ્રભુત્વ ન હોવાના કારણે ભણવું ખૂબ જ મુશ્કેલ છે જ્યારે અંગ્રેજી માધ્યમમાં શાળાની ફી પોસાય તેમ નથી જેથી તમામ વિદ્યાર્થીઓના હિતને ધ્યાનમાં લઈને આજે રાજ્યના શિક્ષણપ્રધાન ભૂપેન્દ્રસિંહ ચૂડાસમાને તમિલ શાળા બંધ ન કરવા માટે રજૂઆત કરવા માટે આવ્યાં છીએ.