ગાંધીનગર LCBની ટીમે એક વર્ષ પહેલા થયેલા ડબલ મર્ડરના આરોપીની ધરપકડ કરી

વર્ષ 2020માં સાંતેજ પોલીસ સ્ટેશનની હદમાં થયેલી હત્યાનો કેસ ગાંધીનગર LCBએ ઉકેલી કાઢ્યો છે. પોલીસે ડબલ મર્ડર કેસના ગુનાના આરોપીની ધરપકડ કરી છે. આરોપીએ પોતાના મિત્ર અને અન્ય એક મહિલા મિત્રની હત્યા કરી કેનાલમાં ફેંકી દીધા હતા.

• ગાંધીનગર LCBએ ડબલ મર્ડરના આરોપીની કરી ધરપકડ
• આરોપીએ પોતાના મિત્ર અને મહિલા મિત્રની કરી હતી હત્યા
• સાંતેજ પોલીસ સ્ટેશનની હદમાં થઈ હતી હત્યા

ગાંધીનગર: વર્ષ 2020માં સાંતેજ પોલીસ સ્ટેશનની હદમાં આવેલા ગિરનારી આશ્રમની પાછળ સંજય નામના વ્યક્તિની હત્યા થઈ હતી. ત્યારે આ હત્યાના આરોપીની LCB-1એ ધરપકડ કરી હતી. આરોપીએ પોતાના મિત્ર અને મહિલા મિત્ર જ્યોત્સનાની હત્યા કરી તેને કેનાલમાં ફેંકી દીધી હતી. આરોપી જિગર ઉર્ફે જિગો ઠાકોરે ગાંધીનગર LCB સમક્ષ કબૂલાત કરી હતી. આ સાથે જ LCBની ટીમે 2 ગુનાનો ભેદ ઉકેલ્યો હતો.

આ પણ વાંચો-Murder: સુરતના સચિન વિસ્તારમાં બે ભાઈ પર ચાકુથી હુમલો, એકનું મોત

આરોપીએ એક વર્ષ પહેલાં દારૂ પીધા બાદ મિત્રને મારી નાખ્યો હતો

સાંતેજ પોલીસ સ્ટેશનની હદમાં 5 ઓક્ટોબર 2020ના રોજ અજાણ્યા શખ્સે સંજયસિંહ ઉર્ફે કાળુ લક્ષ્મણસિંહની રામાપીરના મંદિર ગિરનારી આશ્રમની પાછળની સીમમાં તીક્ષ્ણ હથિયાર વડે ગળાના ભાગે ગંભીર ઈજાઓ પહોંચાડી મોત નીપજાવ્યું હતું. 6 ઓક્ટોબર 2020ના રોજ અંબારામ મેરાજી ઠાકોરે (રહે. સાંતેજ) જેમને સાંતેજ પોલીસ સ્ટેશન ખાતે ફરિયાદ આપી હતી. એલસીબી 1 ટીમે અલગ ટીમ બનાવી બાતમીને આધારે વૈજ્ઞાનિક ઢબે તપાસ હાથ ધરી હતી. તેમ જ મૃતકની વિગત એકઠી કરી હતી. શંકાના આધારે અને પૂરાવા એકત્રિત કરી સાંતેજ પોલીસ સ્ટેશનના ગુનામાં જિગર ઉર્ફે જિગો પોપટજી ઠાકોર પર યુક્તિ-પ્રયુક્તિ કરતા પૂછપરછ કરતા હકીકત સામે આવી હતી અને તેને સંજય સિંહ ઉર્ફે કાળુનું મર્ડર પોતે કર્યા હોવાની કબૂલાત કરી હતી.

આ પણ વાંચો-સુરતના લીંબાયતમાં હત્યાનો બનાવ CCTVમાં ઝીલાયો

મિત્ર સંજયનું મર્ડર કરી જિગો ફરાર થઈ ગયો

સંજય ગામની સીમના રામાપીરના મંદિરમાં ખીચડીનો પ્રસાદ બનાવતો હતો. સંજયને દારૂ પીવાની ટેવ હતી. આથી જિગર પણ તેની સાથે અવારનવાર દારૂ પીવા જતો હતો. બપોરના સમયે સંજય આશ્રમથી બોટલ લઈ જતો હતો. તે સમયે તેને રિક્ષામાં બેસાડી દારૂ પીવાના બહાને ગિરનારી આશ્રમની પાછળના ભાગે લઈ ગયો હતો. બંને દારૂ પીધેલા હતા. સંજય નશામાં આવી જઈ દારૂ પીધા બાદ બંને વચ્ચે રકઝક થતા આ તકનો લાભ લઇ ગળાના ભાગે તેને ચપ્પાથી ઘા મારી ચપ્પુ ફેરવી દેતા સંજયને ત્યાં છોડી દઈ રીક્ષા લઇ તે ભાગી ગયો હતો.

જ્યોત્સના નામની મહિલાના માથાના ભાગે પથ્થર મારી કેનાલમાં ફેંકી દીધી

જિગર ઉર્ફે જિગો પોપટજી ઠાકોરની વધુ પૂછપરછ કરતા તેણે અન્ય એક જ્યોત્સના નામની મહિલાને સાથે મિત્રતા હતી. તેની પણ હત્યા કર્યાની કબૂલાત કરી હતી. આરોપીએ કહ્યું હતું કે, મારી માનસિક સ્થિતિ સારી નહતી એટલે અવારનવાર દારૂ પી એકલતાવાળી જગ્યાએ લઈ જઈ આ મહિલાનો ગેરલાભ ઉઠાવ્યો હતો. લૉકડાઉનના 15 દિવસ પહેલા મહિલાને રિક્ષામાં બેસાડી કેનાલ પર લઈ જઈ દારૂના નશામાં તેની સાથે બળજબરી કરવાનો પ્રયત્ન કરતા મહિલા રિક્ષામાંથી નીચે ઉતરી ગઈ હતી અને તેને ભાગવાનો પ્રયત્ન કરતાં તેના માથાના ભાગ પર પથ્થર માર્યો હતો. ત્યારબાદ તેને જીવતી કેનાલમાં ફેંકી દીધી હતી. આમ, બંને મર્ડર તેને કર્યાની કબૂલાત જિગર ઉર્ફે જિગા પોપટજી ઠાકોરે કરી હતી.