રાજ્યપાલને આવેદનપત્ર આપ્યા બાદ ગુજરાત કોંગ્રેસના પ્રમુખ અમિત ચાવડાએ જણાવ્યું હતું કે, ભાજપ સરકારના શાસનમાં રાજ્યમાં બહુધા શિક્ષણ બાદ રોજગારી મેળવી ખુબ મુશ્કેલ થઈ ગઈ છે. સમગ્ર રાજ્યમાં બેરોજગારીની સંખ્યામાં ઉત્તરોત્તર વધારો થઇ રહ્યો છે. સરકારની નીતિઓ રોજગાર આપવાના બદલે તે સિવાયની દિશામાં કામ કરી રહી છે. સરકાર દ્વારા સરકારી નોકરી માટે ભરતી પ્રક્રિયામાં સતત ગેરરિતી, પેપર ફૂટવા, મેરીટમાં ગોલમાલ, 2 વર્ષ સુધી પ્રમાણપત્ર ચકાસણી અને લાખો રૂપિયા પરીક્ષાની ફી ના નામે ઉઘરાવવામાં આવે છે.
વિવિધ મુદ્દાને લઇ કોંગ્રેસે રાજ્યપાલને આવેદનપત્ર પાઠવ્યું અમિત ચાવડાએ વધુમાં જણાવ્યું હતું કે, શિક્ષણ લોકોનો મૂળભૂત અધિકાર છે. રાજ્ય સરકાર આવનારા દિવસોમાં 6000 જેટલી શાળાઓ બંધ કરવાની વિચારણા કરી રહી છે. જેને ધ્યાનમાં લઈ રાજ્યપાલ દેવવ્રત આચાર્યને આવેદનપત્ર આપ્યું હતું. જેમાં રાજ્યપાલે ડેલિગેશન સાથે ચર્ચા કરીને આગળ પગલાં ભરવાની પણ સાંત્વના આપી છે.
રાજ્યપાલને આવેદનપત્ર આપ્યા પહેલાં કોંગ્રેસના ધારાસભ્યોએ ગાંધીનગર ખાતે બેઠક યોજીને સંપૂર્ણ પ્લાન કર્યો હતો. જેમાં, કેવી રીતે અરજી કરવી અને તેમની સાથે કેવી ચર્ચા કરવી, જેવું આયોજન કરીને રાજ્યપાલને આવેદનપત્ર આપ્યું હતું. સાથે જ જો રાજ્ય સરકાર સ્કૂલો બંધ કરવાનો નિર્ણય પાછો નહીં લે અથવા સરકારી નોકરીમાં શૈક્ષણિક લાયકાત સુધારાનો જે નિર્ણય કર્યો છે, તે પાછો નહીં લે તો કોંગ્રેસ આગામી સમયમાં આંદોલન કરશે, એવી ચિમકી ગુજરાત કોંગ્રેસ પ્રદેશના પ્રમુખ અમિત ચાવડાએ ઉચ્ચારી હતી.
