દમણમાં ગેરકાયદેસર દબાણ પર તંત્રની લાલ આંખ, જિલ્લા પંચાયતના પૂર્વ પ્રમુખની ઓફિસ સહિતના બાંધકામો હટાવાયા

દમણ મહેસૂલ વિભાગ દ્વારા છેલ્લા 2 અઠવાડિયાથી કેનાલનું અતિક્રમણ દૂર કરવાની કાર્યવાહી કરવામાં આવી રહી છે. જે અંતર્ગત ઔદ્યોગિક એકમો, સ્થાનિકો અને જિલ્લા પંચાયતના પુર્વ પ્રમુખ દ્વારા કરવામાં આવેલા 50થી વધુ નહેર પરના ગેરકાયદેસર બાંધકામને તોડી પાડવામાં આવ્યા હતાં. પ્રશાસનની આ કાર્યવાહીથી દબાણ કર્તાઓમાં ફફડાટ ફેલાયો છે.

દમણ: સંઘપ્રદેશમાં ખેતીવાડી વિસ્તારમાં કેનાલની જમીન પર કરેલા ગેરકાયદેસર બાંધકામ અને ચોમાસા પૂર્વેની પ્રિ-મોન્સૂન કામગીરી હેઠળ નહેર-નાળા ઉપર ગેરકાયદેસર બાંધકામો હટાવવાની કામગીરી તંત્રએ હાથ ધરી છે. ગત્ અઠવાડિયામાં કચી ગામની કેનાલ પરના 50થી વધુ અતિક્રમણ દૂર કરવામાં આવ્યા હતા. જેમાંથી ઘણાં બાંધકામો ગેરકાયદેસર રીતે કંપનીઓના સંચાલકો દ્વારા બાંધવામાં આવ્યા હતા.

દમણમાં ગેરકાયદેસર બાંધકામ પર તંત્રની લાલ આંખ

જેમાં રિતેશ ઇલેક્ટ્રિકલ્સ, સૂર્યા પોલિમર, મંગલમ ઉદ્યોગો, અલ્ટ્રા પોલિમર, ક્રાફ્ટ પેક, નિધિ ઇકો-પ્રોડક્ટ્સ, માર્વેલ નિકાસ અને તનોજ પટેલની ચાલ જેવી કંપનીઓ સામેલ છે. જ્યારે બુધવારે ભીમપોરમાં પણ આ અભિયાન હાથ ધરવામાં આવ્યું હતું. ભીમપોરની કેટલીક દુકાનોની સાથે ફ્લેર રાઇટિંગ ઉદ્યોગોની કમ્પાઉન્ડ વોલ અને કેબીન, હોટલ દિનેશની કમ્પાઉન્ડ વોલ, તેમજ જિલ્લા પંચાયતના પુર્વ પ્રમુખ અને હાલમાં હત્યાના ગુન્હામાં જેલમાં સજા ભોગવતા સુરેશભાઇ પટેલનું આલીશાન ઓફિસ સ્ટ્રક્ચર (ડી.એલ. ગ્રુપ)ને નહેરની ઉપર ગેરકાયદેસર રીતે કરેલા બાંધકામને JCB અને બુલડોઝરની મદદથી તોડી પાડવામાં આવ્યું હતું.

દમણમાં ગેરકાયદેસર બાંધકામ પર તંત્રની લાલ આંખ

દમણ મહેસૂલ વિભાગે દરેક પંચાયત વિસ્તારમાં આ અભિયાન શરૂ કર્યું છે, તેવી અખબારી યાદી પણ 10 જૂને પ્રસિદ્ધ કરી હતી. જેને લઈને દમણના અન્ય દબાણકારોમાં હાલ ફફડાટ વ્યાપ્યો છે.