મધુબન ડેમમાં પાણીની સપાટી જળવાયેલી રહેતાં તંત્રને રાહત, જળ સપાટી 75.90 મીટર પર સ્થિર

વલસાડ જિલ્લામાં આ વખતે ખૂબ જ ઓછો વરસાદ નોંધાયો છે. તેમ છતાં જિલ્લાની જીવાદોરી સમાન મધુબન ડેમમાં રુલ લેવલ જળવાયેલું રહ્યું છે. ચોમાસાના અંતમાં ડેમમાં 79.76 મીટરના લેવલે પહોંચવા અને ઓગસ્ટ મહિનાનું 76 મીટરનું રુલ લેવલ જાળવવા સામે હાલ મધુબન ડેમની જળ સપાટી 75.90 મીટર પર સ્થિર છે. દર વર્ષે ડેમમાંથી 3 લાખ ક્યુસેક પાણી દમણગંગા નદીમાં છોડવામાં આવે છે. જેની સામે આ વખતે વધુમાં વધુ 58 હજાર ક્યુસેક પાણી છોડવાની જ નોબત આવતા તંત્ર માટે પણ ખૂબ જ રાહત રહી છે.

વાપીઃ મધુબન ડેમમાં 18મી ઓગસ્ટ સુધીમાં રુલ લેવલ 75.90 મીટરે પહોંચ્યું છે જેને ઓગસ્ટ માસના રુલ લેવલ મુજબ જાળવી રાખવા વધારાનું પાણી ડેમના દરવાજા વાટે દમણગંગા નદીમાં છોડવામાં આવી રહ્યું છે. અને ડેમના લેવલને 75.30 મીટર પર સ્થિર કર્યું છે. જેને કારણે દાદરા નગર હવેલીની મધ્યમાં આવેલ મધુબન ડેમથી દમણમાં ભળતી દમણ ગંગા નદીમાં ઘોડાપુર આવ્યું છે. વાપી નજીકથી પસાર થતી દમણગંગા નદી પરનો વિયર બે કાંઠે વહી રહ્યો છે.

મધુબન ડેમમાં પાણીની સપાટી જળવાયેલી રહેતાં તંત્રને રાહત

દમણગંગા નદીમાંથી આ પાણી દમણના દરિયામાં વહી જાય છે. દર વર્ષે ચોમાસાની સીઝનમાં ભારે વરસાદને કારણે લગભગ 3 લાખ ક્યુસેક સુધીનું પાણી આ રીતે દમણગંગા નદીમાં છોડવામાં આવે છે. પરંતુ આ વખતે અત્યાર સુધીમાં વધુમાં વધુ 58 હજાર ક્યુસેક પાણી જ છોડવામાં આવ્યું છે. તો, મધુબન ડેમ પર 5 મેગા વોટ વીજળી ઉત્પન્ન કરવામાં આવે છે. એ ઉપરાંત નહેરમાં છોડવામાં આવતા પાણી દ્વારા વધુ અઢી મેગા વોટ વીજળી ઉત્પન્ન કરવામાં આવે છે. ઓછા વરસાદમાં પણ ડેમમાં ભરપૂર પાણી રહેતા મેગાવોટમાં પણ લેવલ જળવાયું છે.

ઉલ્લેખનીય છે કે મધુબન ડેમનું સર્વોચ્ચ લેવલ 79.76 મીટર છે. જે ચોમાસાના સીઝનના અંત સુધીમાં જાળવવામાં આવે છે. ઓગસ્ટ મહિનાના અંત સુધીમાં 76 મીટર જાળવવામાં આવે છે. જે બંને લેવલ ઓછા વરસાદમાં પણ અંકિત કરી લેવાના વિશ્વાસ સાથે તંત્રએ વધુ પાણી છોડવાની નોબત નહીં આવતા રાહત અનુભવી છે.