દમણથી સુરત જતાં પ્રવાસીઓ સાથે GRD જવાને કરી મારામારી

દમણમાં ફરવા આવેલા સુરતના પ્રવાસી સાથે ગુજરાતની હદમાં વલસાડના GRD જવાને ઓવરટેકના મુદ્દે બોલાચાલી કરી કારમાં નુકસાન પહોંચાડી કારમાં સવાર સુરતના કોન્ટ્રાક્ટરને માર મારતાં પારડી પોલીસમથકમાં ફરિયાદ નોંધાઇ હતી. જે આધારે પોલીસે તાત્કાલિક બે યુવકોની ધરપકડ કરી આગળની કાર્યવાહી હાથ ધરી છે.

વાપી :સુરત મોટા વરાછા ખાતે રહેતાં અને લેબર કોન્ટ્રાક્ટનો વ્યવસાય કરતાં જગદીશ રાઠોડ તેમના ડ્રાઇવર રાકેશ શેલડીયા સાથે તેમની ફોર્ચ્યુનર કારમાં રવિવારના રોજ દમણની સહેલગાહ કરી પરત ફરતાં હતાં. ત્યારે ગુજરાતના મોતીવાડા હાઇવે પર પેટ્રોલ પંપ સામે તેમની કારને બાઈક પર આવેલા બે ઈસમોએ અટકાવી હતી અને ઓવરટેક મુદ્દે કારચાલક રાકેશ સાથે બોલાચાલી બાદ ઉશ્કેરાઈ જઇ કારચાલક રાકેશ અને અને તેના માલિક જગદીશને લાકડીથી તેમ જ ગડદાપાટુ વડે માર માર્યો હતો.

દમણથી સુરત જતાં પ્રવાસીઓ સાથે GRD જવાને કરી મારામારી

હુમલો કરનારા ઈસમો સાથે એક વગર નંબરની લાલ કલરની સ્વીફ્ટ કારમાં આવેલા અન્ય બે ઈસમોએ પણ રાકેશ અને જગદીશભાઈને મારમારી તેમની ફોર્ચ્યુનર કારના સાઈડ ગ્લાસ તેમજ નંબર પ્લેટ તોડી નુકસાન પહોંચાડ્યું હતું.

આ બાબતની જાણ પારડી પોલીસને થતા ઘટના સ્થળે પહોંચતાં માર મારનારા સ્વીફ્ટ કારમાં આવેલા બે ઈસમો ભાગી છૂટ્યાં હતાં. જ્યારે બાઈક પર આવેલો એક GRD જવાન મયૂર નરેશભાઈ પટેલ અને જીતુ રામુભાઈ પટેલ ઝડપાઇ ગયાં હતાં. ઘટનામાં GRD જવાને જ મારામારી કરતાં પારડી પોલીસ બેડામાં ચકચાર મચી છે. આ સમગ્ર મારામારીની ઘટના એચપી પેટ્રોલ પંપ પર લાગેલા સીસીટીવી કેમેરામાં કેદ થઇ હતી. પોલીસે ઘટના સ્થળેથી મળી આવેલી GRD જવાનની બાઇક કબજે લીધી છે. સાથે કારમાં આવેલાં અન્ય ઈસમોને વોન્ટેડ જાહેર કરવામાં આવ્યાં છે.