દમણઃ 26મી જાન્યુઆરીથી સંઘપ્રદેશ દાદરા નગર હવેલી, દમણ-દિવ બને પ્રદેશનું એક જ પ્રદેશમાં વિલીનીકરણ થયું હતું. બે સંઘપ્રદેશના એક સંઘપ્રદેશમાં વિલીનીકરણ બાદ કેટલાક સરકારી વિભાગોમાં પણ ફેરફારો કરવામાં આવી રહ્યા છે. આ ફેરફાર અંતર્ગત વાહનોના રજિસ્ટ્રેશન નંબરમાં ફેરફાર થઈ રહ્યા છે. આ અંગે દાદરા નગર હવેલી RTO કચેરીના અધિકારી કવલજીત ચૌહાણે વિગતો આપતા જણાવ્યું હતું કે, આગામી દિવસોમાં દાદરા નગર હવેલીના જે વાહનોનું રજિસ્ટ્રેશન પાર્સિંગ DN-09 હતું, જે બદલવામાં આવ્યું છે. હવે જે વાહનોનું રજિસ્ટ્રેશન થશે, તે વાહનો DD-01થી રજિસ્ટર કરવામાં આવશે. જૂના DN-09 પાર્સિંગના વાહનો યથાવત રહેશે.
દાદરા નગર હવેલીના નવા વાહનોનો પાર્સિંગ કોડ DD-01 - પાર્સિંગ કોડ
સંઘપ્રદેશ દાદરા અને નગર હવેલી, દમણ અને દિવનું એક જ સંઘપ્રદેશનો દરજ્જો આપવામાં આવ્યો છે. જે અંતર્ગત દાદરા નગર હવેલી, અને દમણ-દિવમાં નવા ફેરફારો શરૂ કરવામાં આવ્યા છે. જેમાં પ્રથમ ફેરફાર વાહનોના પાર્સિંગમાં કરવામાં આવશે. આ સંઘપ્રદેશમાં પહેલા દમણના વાહનોમાં DD-03, દિવના વાહનોમાં DD-02 અને દાદરા નગર હવેલીના વાહનોમાં DN-09 રજિસ્ટ્રેશનની સિરીઝ હતી. હવે એકીકરણ થયા બાદ દાદરા નગર હવેલીના વાહનોની સિરીઝ DD-01 થશે. જ્યારે DD-02, DD-03 યથાવત રહેશે. આ સાથે સંઘપ્રદેશોની RTOનું પણ એકીકરણ થયું છે. આ સંયુક્ત RTOની ત્રણ અલગ કચેરીઓ રહેશે.
નવા કોડ સાથે પાર્સિંગ થનારા વાહનોમાં માત્ર વાહનોના નંબર બદલાશે, લાઈસન્સમાં કે બીજી અન્ય કોઈ ફેરબદલ કરવામાં આવશે નહીં. RTOની મુખ્ય કચેરી દમણમાં રહેશે, આ ઉપરાંત દાદરા નગર હવેલી અને દિવમાં પણ RTOની એક-એક કચેરી રહેશે. વાહનચાલકો દમણ, દિવ કે દાદરા નગર હવેલીમાંથી વાહનો ખરીદી કરી, જે તે પ્રદેશમાં તેનું રજિસ્ટ્રેશન કરાવી શકશે. આ માટે RTOનું પણ આધુનિકરણ કરવામાં આવ્યું છે. જે કારણે વાહનચાલકોને અનેક ફાયદા થશે. જેમાં મહત્વનો ફાયદો એ છે કે, તેમને પસંદગીના નંબરમાં મળી રહેશે. જે માટેની ફીનો દર ત્રણેય કચેરીમાં એક સરખો રહેશે.
ઉલ્લેખનીય છે કે, સંઘપ્રદેશ દાદરા નગર હવેલી અને દમણ-દિવ એવા નવા નામે એક જ સંઘપ્રદેશ બનેલા દિવના વાહનોમાં DD-02 કોડ છે. દમણમાં DD-03 કોડ છે. હવે દાદરા નગર હવેલીને DD-01નો કોડ આપવામાં આવ્યો છે. દાદરા નગર હવેલીમાં 1.60 લાખ વાહનો DN-09ના રજિસ્ટ્રેશન ધરાવે છે. જેમનો નંબર યથાવત રહેશે. DD-01ના નવા રજિસ્ટ્રેશન કોડ એનાયત કરવાની કામગીરી ટૂંક સમયમાં શરૂ કરવામાં આવશે.