પ્રેમલગ્ન કરનારી યુવતીની પતિના હાથે જ હત્યા, પતિએ પણ આત્મહત્યાનો કર્યો પ્રયાસ

દિવાળીનો દિવસ ભાવનગરના એક પરિવાર માટે ખૂબ આઘાતદાયી બની રહ્યો છે. ભાવનગરની સરિતા સોસાયટીમાં સસરાના ઘરમાં ધસી આવીને અન્ય શખ્સની મદદથી પોતાની પત્નીની એક પતિએ હત્યા ( Murder ) કર્યાંનો બનાવ સામે આવ્યો છે. ચાર્મી નાવડિયા અને વિશાલ ભૂપતભાઈ વાઘેલાએ એક વર્ષ પહેલાં પ્રેમલગ્ન કર્યાં હતાં જેનો કરુણ અંજામ આવ્યો હતો.

• ભાવનગરમાં પતિએ કરી 19 વર્ષીય પત્નીની હત્યા
• રીસામણે બેઠેલી પત્નીની સસરાના ઘરમાં આવીને પતિએ હત્યા કરી
• ચાર્મી અને વિશાલે એક વર્ષ પહેલાં પ્રેમલગ્ન કર્યાં હતાં

ભાવનગર: ભાવનગર શહેરની સરિતા સોસાયટીમાં રહેતી ચાર્મી નાવડીયા નામની યુવતીએ એક વર્ષ પૂર્વે પ્રેમલગ્ન કર્યાં હતાં. લગ્ન બાદ પતિ અને સાસુની રંજાડને પગલે રીસામણે પિયરમાં રહેતી ચાર્મીની તેના પતિ વિશાલ વાઘેલાએ અને અન્ય શખ્સે ( Murder ) હત્યા કરી છે. હત્યા બાદ પતિએ જાતે શરીર પર હથિયારથી ઇજાઓ કરી મરવાની કોશિશ કરી છે. આ મામલે પોલીસ પર પણ આક્ષેપ થઇ રહ્યાં છે, જોકે એક વર્ષ પહેલાં પ્રેમલગ્ન કરી ગુમ થયાં હતાં ત્યારે આ બંનેને શોધવાની અરજી બાદ પોલીસે શોધી આપ્યાં હતાં.

અગાઉ ગુમની ફરિયાદ બાદ ચાર્મી- વિશાલને શોધી પરિવારને આપ્યાં હતાં : ASP

ભાવનગર શહેરમાં આજે દિવાળી પર્વના દિવસે પ્રેમલગ્ન કરેલાં પતિપત્નીનો કરૂણ અંજામ આવ્યો છે. રિસામણે ગયેલી પત્નીને તેના પિતાના ઘરમાં જ તેના પતિ અને એક મિત્ર દ્વારા સાથે મળીને હત્યા ( Murder )કરવામાં આવી છે પતિએ પણ પોતાના શરીરના ભાગે હથિયાર વડે ઈજા પહોંચાડીને મરવાની કોશિશ કરી છે. યુવતી ચાર્મીનું મૃત્યુ થયું છે તો પતિ ગંભીર હાલતમાં ભાવનગરની સર.ટી હોસ્પિટલમાં સારવાર હેઠળ છે.

શું છે મામલો

ભાવનગર શહેરના બોરતળાવ વિસ્તારમાં હરિરામ બાગમાં રહેતાં વિશાલ ભુપતભાઇ વાઘેલાએ ચાર્મી નાવડિયા 19 વર્ષની સાથે એક વર્ષ પૂર્વ પ્રેમલગ્ન કર્યાં હતાં. ત્યારબાદ પતિપત્ની વચ્ચે થતાં ઝઘડાને કારણે ચાર્મી નાવડીયા પોતાના પિતાના ઘરે રિસામણે આવી ગઈ હતી. ત્યારબાદ પતિની રંજાડ હોવાનો અને ત્રાસ હોવાની પરિણીતાના પિતા પ્રવીણભાઈ દ્વારા અને ચાર્મી દ્વારા પણ અરજીઓ કરવામાં આવી હતી. મૃતક ચાર્મીના કાકા છગનભાઇ નાવડીયાએ જણાવ્યું હતું કે વિશાલ અને તેના મિત્રો ઘરે આવીને ધમકીઓ આપતાં હતાં. જેના CCTV પણ અમે પોલીસને આપ્યાં હતાં અને અરજી કરી હતી. અરજીના આધારે પગલાં ભર્યા હોત તો આજે આ બનાવ ( Murder ) બન્યો ન હોત.

હત્યારા પતિ વિશાલ અને તેની માતા સામે ચાર્મીના પરિવારના આક્ષેપ

આજે બપોરના 12 વાગ્યાની આસપાસ ચાર્મીના પિતા બહાર ગયા હતાં ત્યારે ઘરમાં એકલી ચાર્મી હતી. તે સમયે તેનો પતિ અને એક શખ્સ આવ્યાં હોવાના સીસીટીવી ફૂટેજ પોલીસની તપાસમાં બહાર આવ્યાં છે. ચાર્મીના કાકા છગનભાઇએ જણાવ્યું હતું કે અગાઉ પોલીસને આપેલી અરજીમાં ચાર્મી તેનો પતિ અને તેની માતા શારીરિક વેપાર કરાવતાં હોવાનો આક્ષેપ કરેલો છે. તેથી ચાર્મી રિસામણે આવી ગઈ હતી. ત્યારબાદ તેના પતિ સહિત અન્ય કેટલાક શખ્સો દ્વારા પણ ઘરે આવીને ધમકીઓ અપાતી હોવાની જાણ પોલીસ સ્ટેશનમાં અરજી મારફત કરાયેલી છે.

બનાવને પગલે ASPનું નિવેદન

બનાવને પગલે ASP સફિન હસને જણાવ્યું હતું કે સરિતા સોસાયટી શેરી નંબર છમાં રહેતા પ્રવીણભાઈ નાવડિયાની દીકરી 19 વર્ષે ચાર્મી બેનનું મૃત્યુ ( Murder ) તેના પતિએ તીક્ષ્ણ હથિયાર વડે કર્યું છે અને તેના પતિએ પણ જાતે પેટના અને ગળાના ભાગે જીવલેણ હથિયારો જાતે મારીને ગંભીર હાલતે સરટી હોસ્પિટલમાં સારવાર લઇ રહ્યાં છે. જો કે અગાઉની પોલીસની અરજીને પગલે પોલીસે કાર્યવાહી કરી હોવાનું ASP સફિન હસને જણાવ્યું હતું કે ચાર્મી ગુમ થયાની અરજીને પગલે બંનેને શોધીને પરિવારને આપવામાં આવ્યાં હતાં. ASPએ બાદમાં પતિ વિશાલની રંજાડ અને ધમકીના પગલે તપાસ ચાલુ હોવાનું જણાવ્યું હતું.

આ પણ વાંચોઃ ધોરાજીમાં પતિ-પત્ની વચ્ચે થયેલા ઝગડામાં પતિએ પત્નીની કરી હત્યા

આ પણ વાંચોઃ ઉમરગામના ફણસા ગામે પતિએ કરી પત્નીની હત્યા, 2 બાળકો બન્યા નોંધારા