ભાવનગર જિલ્લામાં 20 ટકા વરસાદની હજુ ઘટ, જાણો ડેમમાં પાણીની સ્થિતિ

ભાવનગરમાં ભાદરવો ભરપુરની કહેતી સાચી પાડતાં મેઘરાજાની ધમાકેદાર ઇનિંગ રહી છે. મેઘરાજાની મહેરથી ખેતીના પાકને ફાયદો થયો છે પરંતુ હવે પાછોતરો વરસાદ વધી જવાથી ખેડૂતોના પાક માથે ભય પણ ઉભો થયો છે. મોસમનો કુલ 80 ટકા વરસાદ નોંધાયો છે. પાછોતરો વરસાદ ટૂંકાગાળામાં 40 ટકા સુધી નોંધાતા પાણીની કમી દૂર થઈ છે પરંતુ પાકતા પાક પર ચિંતાના વાદળો ઘેરાયાં છે

• ભાવનગર જિલ્લામાં વધુ-ઓછા વરસાદની સ્થિતિ
• સરેરાશ વરસાદમાં હજુ 20 ટકા વરસાદની ઘટ
• પાકપાણી અને ડેમમાં પાણીની સ્થિતિ જાણો
  

ભાવનગરઃશહેર અનેજિલ્લામાં મોસમનો કુલ વરસાદ 79.64 ટકા નોંધાયો છે. જ્યારે વરસાદમાં ઘટની વાત કરીએ તો હજુ 20 ટકા વરસાદની ઘટ છે. જિલ્લામાં ખેતીને લાયક પાછોતરો વરસાદ થતાં પાક બચી ગયો હતો. 35થી 40 ટકા વરસાદ આવતાં પાક તો બચી ગયો, પણ હવે જો પાછોતરો વરસાદ આવે તો પાકતો પાક બગડવાની શક્યતા વધી ગઈ છે. બે તાલુકામાં વરસાદ 100 ટકા થતાં ત્યાં હવે વરસાદનું આગમન નુકશાનકારક બની શકે છે. જ્યારે ડેમોની સ્થિતિ ખૂબ સારી હોવાથી જોઈએ તેવો શિયાળુ પાક ખેડૂતો મેળવી શકશે તે નિશ્ચિત છે.

વરસાદની વાત ભાવનગર જિલ્લામાં 40 ટકા પાછોતરો વરસાદ થતાં 79.64 ટકા વરસાદ નોંધાયો જિલ્લામાં હાલ સીઝનના 595 mm વરસાદ સામે 471 mm વરસાદ નોંધાયો જિલ્લાના દસ તાલુકા પૈકી સિહોર,જેસર અને તળાજામાં સૌથી ઓછો 50 ટકા વરસાદ નોંધાયો જિલ્લામાં 100 ટકા કરતા વધુ વરસાદ મહુવા અને ઘોઘા પંથકમાં નોંધાયો જિલ્લામાં હવે સિઝનનો 20 ટકા વરસાદ બાકી પણ હવે વરસાદ આવે તો ખેતીને નુકશાની

શહેર જિલ્લામાં ક્યાં કેટલો વરસાદ

ભાવનગર શહેર અને જિલ્લામાં જોઈએ તો દસ તાલુકામાં વરસાદ નોંધાયો છે. દસ તાલુકામાં થયેલા વરસાદમાં 100 ટકા વરસાદ બે તાલુકામાં નોંધાઇ ચૂક્યો છે. આ બે તાલુકા ઘોઘા અને મહુવા છે. જ્યાં વરસાદની ટકાવારી ઘોઘામાં 100.31 ટકા અને મહુવામાં 104.10 ટકા છે. જ્યારે સૌથી ઓછો વરસાદ દસ તાલુકામાંથી ત્રણ તાલુકા સિહોર, જેસર અને તળાજામાં નોંધાયો છે. આ ત્રણ તાલુકામાં જોઈએ તો જેસરમાં 50.07 ટકા, સિહોર 51 ટકા અને તળાજામાં 53.48 ટકા નોંધાયો છે અને ત્યાં હજુ 50 ટકા વરસાદની જરૂરિયાત છે.

પાછોતરો વરસાદ વધી જવાથી ખેડૂતોના પાક માથે ભય

હવે જોઈએ જરૂરિયાત કેટલી અને કેટલો વરસાદ વરસ્યો

વરસાદની ટકાવારી પ્રમાણે જોઈએ તો જિલ્લાને કુલ 595 % વરસાદની સીઝનની જરૂરિયાત છે ત્યારે હાલમાં સીઝનનો વરસાદ 79.64 ટકા નોંધાયો છે એટલે કે 471 mm વરસાદ નોંધાયો છે, જ્યારે 100 ટકા વરસાદમાં 20 ટકા વરસાદની ઘટ રહી છે.

તાલુકો	જરુરિયાત	વરસેલો વરસાદ	ટકાવારી
ભાવનગર	689 mm	684 mm	99.21 ટકા
ઉમરાળા	546 mm	461 mm	84.39 ટકા
વલભીપુર	589 mm	456 mm	77.36 ટકા
ઘોઘા	613 mm	615 mm	100.31 ટકા
પાલીતાણા	587 mm	454 mm	77.31 ટકા
તળાજા	567 mm	303 mm	53.48 ટકા
સિહોર	622 mm	317 mm	51.00 ટકા
ગારીયાધાર	463 mm	459 mm	99.21 ટકા
મહુવા	604 mm	629 mm	104.10 ટકા
જેસર	679 mm	340 mm	50.07 ટકા

ખેતીના પાણી માટે ડેમોના પાણીનો ફાયદો

ભાવનગર જિલ્લામાં વરસાદ 79.64 ટકા નોંધાયો છે ત્યારે પાછોતરો વરસાદ અંતમાં આવતા ખેડૂતોમાં આનંદ છવાયો હતો. પાછોતરો વરસાદ 45 ટકા કરતા વધુ આવતા ખેતીના પાકને જીવતદાન મળ્યું પરંતુ હવે ચિંતા વધી છે. કારણ કે પાકતા પાકનો સમય સપ્ટેમ્બરનો હોય ત્યારે વરસાદની આગાહી અને વરસાદ આવવાથી નુક્શાનીનો ભય વધી ગયો છે. જિલ્લામાં કપાસનું 2 લાખ હેકટર કરતા વધુ વાવેતર છે જ્યારે 1 લાખ હેકટર કરતા વધુ મગફળીનું વાવેતર છે. જેને પગલે ખેડૂતોના પાકની ગુણવત્તા સામે પ્રશ્નાર્થ ઉભો થયો હતો તે ક્યાંક કુદરતે હલ કરી દીધો છે. પરંતુ જે રીતે વરસાદ બંધ થવાનું નામ નથી લેતો તેના કારણે ચિંતા વધી ગઈ છે. જો કે વરસાદથી ડેમો ભરાઈ જતાં આગામી શિયાળુ પાક સારો લેવાશે તેવી આશા છે. હાલ 22 સપ્ટેમ્બરના રોજ જિલ્લાના ડેમોની સ્થિતિ નીચે મુજબ રહી છે.

ડેમ	ઓવરફ્લો મીટરમાં	હાલની સપાટી
શેત્રુંજી	55.53	55.53
રજાવળ	56.75	55.35
ખારો	54.12	54.12
માલણ	104.25	104.00
રંઘોળા	62.05	61.35
લાખણકા	44.22	40.09
હમીરપરા	87.08	85.03
હણોલ	90.01	89.70
બગડ	60.41	59.71
રોજકી	99.06	98.44
જસપરા	40.25	31.45
પિંગળી	51.03	50.03

ભાવનગર શહેર જિલ્લામા સાત તાલુકામાં સારા એવા વરસાદથી જળાશયોમાં પણ નવા નીર આવ્યા છે. ત્યારે ખેડૂતોની ચિંતા ક્યાંક દૂર થતી જાય છે, કારણ કે સપ્ટેમ્બર માસના અંત બાદ મગફળી અને કપાસનો પહેલો ફાલ લેવામાં આવતો હોય છે. પાછોતરો વરસાદ ચિંતા કરાવી રહ્યો છે પણ શિયાળુ પાક સોના જેવો ચોક્કસ લઈ શકાશે તે નિશ્ચિત છે.

આ પણ વાંચોઃ ભાવનગરમાં બે દિવસના અસહ્ય બફારા બાદ મેઘરાજાની પધરામણી, ખેતી માટે પાણીની સમસ્યા દૂર થઈ

આ પણ વાંચોઃ શેત્રુંજી ડેમમાં ઉપરવાસમાં વરસાદથી પાણી આવક વધી, સપાટી 32 ફૂટ 10 ઈંચે પહોચી