રાજ્યમાં શનિવારથી 18 વર્ષથી ઉપરના યુવાનોને અપાશે વેક્સિન

રાજ્યમાં આવતીકાલે શનિવારથી 18 વર્ષથી ઉપરની તમામ વ્યક્તિઓને વેક્સિન આપવામાં આવશે. ત્યારે મુખ્યપ્રધાન વિજય રૂપાણીએ જણાવ્યું કે, આવતીકાલે શનિવારથી રાજ્યના જે 10 જિલ્લામાં કોરોના સંક્રમણ વધુ છે તે જિલ્લામાં 18 વર્ષથી ઉપરના વ્યક્તિઓને વેક્સિન આપવામાં આવશે.

• શનિવારે ગુજરાતનો સ્થાપના દિવસ
• 1 મેથી 18 વર્ષથી ઉપરના વ્યક્તિઓને અપાશે વેક્સિન
• પ્રથમ તબક્કામાં 10 જિલ્લાના યુવાનોને વેક્સિન આપવામાં આવશે

અમદાવાદઃ રાજ્યમાં કોરોનાના કેસમાં સતત વધારો થઈ રહ્યો છે. ત્યારે સંક્રમણને અટકાવવા માટે વેક્સિનેશન ખૂબ જ આવશ્યક છે. જેથી તમામ યુવાનોને પણ વેક્સિન મળી રહે તે માટે આવતીકાલે શનિવારથી 18 વર્ષથી ઉપરના તમામ યુવાનોને વેક્સિન આપવામાં આવશે. જોકે, રાજ્યમાં હાલ જે જિલ્લાઓમાં સૌથી વધુ કોરોના સંક્રમણ છે, તેવા 10 જિલ્લાઓમાં જ વેક્સિનેશન શરૂ થશે. જે માટે જરૂરી વેક્સિનનો જથ્થો આગામી 30 મે સુધી રાજ્ય સરકાર દ્વારા મંગાવવામાં આવશે. રાજ્ય સરકાર દ્વારા વેક્સિનનો ઓર્ડર પણ આપવામાં આવ્યો છે. વેક્સિનેશનના જથ્થા માટે આગામી 30 મે સુધી નિયમિત જરૂરિયાત પ્રમાણે વેક્સિનનો જથ્થો અમદાવાદ આવી પહોંચશે.

વેક્સિનના અઢી કરોડ ડોઝનો ઓર્ડર આપવામાં આવ્યો

18 વર્ષથી વધુ વયના યુવાનો કોરોના સામે સુરક્ષિત રહે તે હેતુથી જલ્દીથી તમામનું વેક્સિનેશન થઈ જાય તે માટે રાજ્ય સરકાર દ્વારા વેક્સિનના અઢી કરોડ ડોઝનો ઓર્ડર આપી દેવામાં આવ્યો છે. રાજ્યને વેક્સિનનો ડોઝ નિયમિત રીતે મળી રહે તે પ્રકારની વ્યવસ્થા પણ કરવામાં આવી છે. આજે શુક્રવારે સાંજ સુધીમાં વેક્સિનના ત્રણ લાખ ડોઝ હવાઈમાર્ગે ગુજરાત આવી પહોંચશે અને આવતીકાલે શનિવારથી 10 જિલ્લાઓમાં યુવાનોને વેક્સિન આપવાનો પ્રારંભ થશે.

આ પણ વાંચોઃ જામનગરમાં 1 મેથી 18 વર્ષથી મોટી ઉંમરના લોકોને વેક્સિન અપાશે

મે મહિના દરમિયાન ગુજરાત રાજ્યને કુલ 11 લાખ ડોઝ મળશે

મુખ્યપ્રધાન વિજય રૂપાણીએ જણાવ્યું હતું કે, મે મહિના દરમિયાન ગુજરાત રાજ્યને કુલ 11 લાખ ડોઝ મળશે. સાથે જ વધુ જથ્થો પ્રાપ્ત થાય તે માટે રાજ્ય સરકાર દ્વારા પ્રયત્નો કરવામાં આવશે. રાજ્ય સરકાર દ્વારા જે ઓર્ડર કરવામાં આવ્યાં છે તેને ધ્યાનમાં રાખીને આગામી 30 મે સુધી લગભગ દૈનિક અને જરૂરિયાત પ્રમાણે તમામ વેક્સિનેશનનો જથ્થો છે તે અમદાવાદ આવી પહોંચે તેવી પણ તૈયારીઓ કરાઈ છે.