કોંગ્રેસના ધારાસભ્ય કોંગ્રેસને જ બ્લેકમેલ કરે તે કોંગ્રેસની કમનસીબી: યગ્નેશ દવે

સ્થાનિક સ્વરાજની ચૂંટણી અગાઉ કોંગ્રેસમાં ભંગાણ પડ્યું છે. આજે સોમવારે જમાલપુર-ખાડીયાના ધારાસભ્ય ઈમરાન ખેડાવાલાએ પોતાના પસંદગીના ઉમેદારને ટિકિટ નહીં મળતાં રાજીનામું ધરી દીધું છે. આ મુદ્દે પ્રદેશ ભાજપ મીડિયા કન્વીનર યગ્નેશ દવેએ વ્યંગ કરતા જણાવ્યું કે, કોંગ્રેસના ધારાસભ્ય કોંગ્રેસને જ બ્લેકમેલ કરે તે કોંગ્રેસની કમનસીબી છે.

• કોંગ્રેસના ધારાસભ્ય ઇમરાન ખેડાવાલાનું રાજીનામું
• AMCની ચૂંટણીમાં ઉમેદવારોને લઈને ખેડાવાલાને મનદુઃખ
• કોંગ્રેસ પ્રદેશ પ્રમુખ અમિત ચાવડાને આપ્યું રાજીનામું

અમદાવાદઃ કોંગ્રેસ માટે 'એક સાંધે, ત્યાં તેર તૂટે' જેવી પરિસ્થિતિનું નિર્માણ થયું છે. સ્થાનિક સ્વરાજ્યની ચૂંટણીઓમાં મેન્ડેટ આપવાને લઈને કોંગ્રેસમાં ઘમસાણ મચી ગયું છે. અમદાવાદ મ્યુનિસિપલ કોર્પોરેશનની ચૂંટણીમાં કોંગ્રેસ મોટા ભાગના વોર્ડના ઉમેદવારો જાહેર કરી શકી નહોતી. છેલ્લે ઇલેક્શન ફોર્મ ભરવાના સ્થળે કોંગ્રેસે ઉમેદવારોને મેન્ડેટ મોકલી આપ્યા હતા.

બહેરામપુરામાં પોતાની પસંદગીના ઉમેદવાર ન ઉભા રખાતા ઇમરાન ખેડાવાલા નારાજ

કોંગ્રેસ અનેક જૂથમાં વહેંચાઈ ચુકી છે. લઘુમતી વોટબેન્ક ધરાવતા વિધાનસભા વિસ્તાર જમાલપુર-ખાડીયાના ધારાસભ્ય ઇમરાન ખેડાવાલાએ અમદાવાદ મ્યુનિસિપલ કોર્પોરેશનની ચૂંટણીમાં પોતાના મતવિસ્તાર બહેરામપુરામાં પોતાની પસંદગીના ઉમેદવારોને ટિકિટ નહીં અપાતા નારાજગી વ્યક્ત કરી હતી. જેથી આજે સેમવારે તેમણે કોંગ્રેસ પ્રદેશ પ્રમુખને રાજીનામું ધરી દીધું છે.

કોંગ્રેસ પર દબાણ લાવવાનું ઇમરાન ખેડાવાલાનું નાટક ?

જો કે, ધારાસભ્ય તરીકે ઇમરાન ખેડાવાલાએ વિધાનસભા અધ્યક્ષને રાજીનામું આપવાનું થાતું હોય છે, પરંતુ ઇમરાને તેમ કર્યું નથી. એટલે હજી સુધી તે ધરાસભ્ય છે. બહેરામપુરા વિસ્તારમાંથી કોંગ્રેસે 06 ઉમેદવારને મેન્ડેટ આપ્યું હતું. જેથી 2 ઉમેદવારનું ફોર્મ પાછું ખેંચવા અને પોતાની તરફના ઉમેદવારોને જ ચૂંટણી લડાવવા ઇમરાન ખેડાવાલાએ કોંગ્રેસ પર દબાણ લાવવા આ પગલું ભર્યું હોવાનું ચર્ચાઈ રહ્યું છે. તો ઇમરાન ખેડાવાલાના સપોર્ટ વગર જમાલપુર- ખાડીયા વિધાનસભાના 3 વોર્ડ પૈકી લઘુમતી બહુમતી ધરાવતા 2 વોર્ડ જમાલપુર અને બહેરામપુરા જીતવા કોંગ્રેસ માટે અશક્ય છે.

ઈમરાન ખેડાવાલા

135 વર્ષ જૂની પાર્ટી અતિશય નબળી

ઇમરાન ખેડાવાલાના રાજીનામાં મુદ્દે પ્રતિક્રિયા આપત ભારતીય જનતા પાર્ટીના પ્રદેશ મીડિયા કન્વીનર યગ્નેશ દવેએ જણાવ્યું હતું કે, 135 વર્ષ જૂની પાર્ટી અતિશય નબળી પડી ચૂકી છે. જૂનાગઢ, ભાવનગર અને જામનગર જેવા નાના શહેરોમાં પણ કોંગ્રેસ પોતાના ઉમેદવારો જાહેર કરી શકી નથી, મેન્ડેટ આપી શકી નથી. અમદાવાદ જેવા મોટા શહેરોમાં પોતાના પક્ષના જ કાર્યકરોને મેન્ડેટ આપવું પણ કોંગ્રેસની પરિસ્થિતિ જોતા શક્ય નહોતું બન્યું. આજે કોંગ્રેસ એવી પરિસ્થિતિમાં છે કે, તેમના પોતાના પક્ષના ધારાસભ્યો પણ તમને બ્લેકમેલ કરી રહ્યા છે, જે કોંગ્રેસની કમનસીબી છે, પરંતુ આ તેમની આંતરિક બાબત છે.

રાજકીય બજારમાં ચર્ચાઓ ચાલી !

જો કે, ઈમરાન ખેડાવાલા રાજીનામાંથી રાજકીય વર્તુળોમાં ચર્ચા તેજ બની છે કે, લઘુમતિઓ તરફની હૈદરાબાદની AIMIM પાર્ટીના સુપ્રીમો અસદુદ્દીન ઔવેસીની પાર્ટી ગુજરાતમાં આવી ચૂકી છે. ગઈકાલે રવિવારે અસદ્દદુદીન ઓવૈસીએ અમદાવાદમાં જંગી સભા કરી હતી. AIMIMએ અમદાવાદમાં લઘુમતીઓના વોર્ડમાં પોતાના ઉમેદવારો ઉભા રાખ્યા છે. જેમાં ઇમરાન ખેડાવાલાના મતક્ષેત્રના વોર્ડનો પણ સમાવેશ થાય છે. વળી કોંગ્રેસના ભૂતપૂર્વ કોર્પોરેટર અને કાર્યકરો પણ આ પાર્ટીની ટિકિટ સાથે ચૂંટણીમાં ઉભા છે, ત્યારે કોંગ્રેસનું ડૂબતી જહાજ જોઈને ઈમરાન ખેડાવાલા AIMIM તરફ ખસી રહ્યા છે.

આ પણ વાંચોઃધારાસભ્ય ઇમરાન ખેડાવાલાએ આપ્યું કોંગ્રેસમાંથી રાજીનામું, ગ્યાસુદ્દીન શેખે માગ સંતોષવા માટે કરી રજૂઆત