GST પોર્ટલ પર અપલોડ ન કરવા બદલ 20 ટકા 'ઇનપુટ ટેક્સ ક્રેડિટ' મુદ્દે હાઇકોર્ટમાં રિટ

અમદાવાદ: શહેરમાં વેપારીના સપ્લાયરે ઇવવોઇસ કે, ડેબિટ નોટની વિગતો GST પોર્ટલ પર અપલોડ ન કરવાથી, જે-તે વેપારીને 20 ટકા 'ઇનપુટ ટેક્સ ક્રેડિટ' આપવાના સેન્ટ્રલ બોર્ડ ઓફ ઇન્ડાયરેક્ટ ટેક્સીસ એન્ડ કસ્ટમ્ટસ (CBIC)ના નવા પરિપત્રને ગુજરાત હાઇકોર્ટમાં પડકારવામાં આવ્યો છે. જસ્ટિસ હર્ષા દેવાણી અને જસ્ટિસ સંગીતા વિશેનની ખંડપીઠે રાજ્ય અને કેન્દ્ર સરકારને આ અંગે નોટિસ પાઠવી જવાબ રજૂ કરવા નિર્દેશ કર્યો છે. જેથી કેસની વધુ સુનાવણી 18 ડિસેમ્બરના રોજ હાથ ધરવામાં આવશે.

'સોસાયટી ફોર ટેક્સ એનાલિસિસ એન્ડ રિસર્ચ' નામની સંસ્થાએ અરજદાર તરીકે રજૂઆત કરી છે કે, સી.જી.એસ.ટી એક્ટની કલમ 37ની પેટા કમલ 1 મુજબ જો ઇનવોઇસ કે, ડેબિટ નોટ અંગેની વિગતો સપ્લાયર દ્વારા અપલોડ ન કરવામાં આવી હોય, તો જે-તે વેપારીને 20 ટકાથી વધુ 'ઇનપુટ ટેક્સ ક્રેડિટ' મળી શકે નહીં. આ નવો નિયમ નાણા મંત્રાલય અને જી.એસ.ટી. વિભાગ દ્વારા ગત સપ્ટેમ્બર મહિનાથી લાગુ કરવામાં આવ્યો છે.

અરજદારની રજૂઆત છે કે, વેપારી સપ્લાયર વિગત અપલોડ ન કરે, તો તેની વિપરિત અસર વેપારી પર ન થવી જોઇએ. 'ઇનપુટ ટેક્સ ક્રેડિટ' 20 ટકા સુધી જ સિમિત કરવામાં આવશે, તો વેપારીને મળતા માર્જીનની રકમ પણ મળી શકશે નહીં. જેથી, અરજદાર આ નિયમ અને તેની હેઠળ જાહેર કરાયેલા પરિપત્રને ગુજરાત હાઇકોર્ટમાં પડકારી રહ્યા છે. જેથી, હાઇકોર્ટે રાજ્ય સરકાર, કેન્દ્ર સરકાર, GST કાઉન્સિલ, સેન્ટ્રલ બોર્ડ ઓફ ઇન્ડાયરેક્ટ ટેક્સિસ અને GST નેટવર્કને નોટિસ પાઠવી 18 ડિસેમ્બર સુધીમાં જવાબ રજૂ કરવા નિર્દેશ કર્યો છે.