રેમડેસીવીર ઉપલબ્ધ કરાવવા હાઇકોર્ટની સરકારને તાકીદ, બે દિવસ બાદ ફરી સુનાવણી

ગુજરાત હાઇકોર્ટે રાજ્ય સરકાર અને કેન્દ્ર સરકારના કામો અને આગામી આયોજન શું હશે, તે જાણવા માટે સુનાવણી યોજી હતી. જેમાં ગુજરાત હાઇકોર્ટ દ્વારા બજારમાં પેરાસીટામોલ જેટલી સરળતાથી મળી રહે છે, એટલી જ સરળતાથી રેમડેસીવીરનું ઇન્કજેક્શન મળી રહે તેવી વ્યવસ્થા કરવા માટેની તાકિદ સરકારને કરી હતી.

• કોરોના કાબૂમાં લેવા હાઇકોર્ટની સરકારને સલાહ
• લગ્ન સિવાય કોઈપણ કાર્યક્રમ યોજવામાં ન આવે
• લગ્નમાં પણ 50 વ્યક્તિઓને જ મંજૂરી

અમદાવાદ : રાજ્યમાં વધતી જતી કોરોનાની વિપરિત પરિસ્થિતિને જોઇને સોમવારના રોજ ગુજરાત હાઇકોર્ટે રાજ્ય સરકાર અને કેન્દ્ર સરકારને તેમણે કરેલા કામો અને આગામી આયોજન શું હશે તે જાણવા માટે સુનાવણી હાથ ધરવામાં આવી હતી. આ સુનવણી દરમિયાન ગુજરાત હાઇકોર્ટના ચીફ જસ્ટિસ વિક્રમ નાથ, જસ્ટિસ ભાર્ગવ કારિયા, એડવોકેટ જનરલ કમલ ત્રિવેદી, કેન્દ્રનો પક્ષ મૂકવા માટે આસિસ્ટન્ટ સોલિસીટર જનરલ હાજર રહ્યા હતા.

હાઈકોર્ટે સરકારને કેટલીક સલાહ આપી

ગુજરાત હાઇકોર્ટમાં કેન્દ્ર સરકારનો પક્ષ રજૂ કરતા આસિસ્ટન્ટ સોલિસીટર જનરલ દેવાંગ વ્યાસે ETV BHARATને જણાવ્યું હતું કે, શહેરમાં વધતી જતી કોરોનાની વિકટ પરિસ્થિતિને જોઈને નામદાર હાઈકોર્ટે વિવિધ વિષયો પર સરકાર કઈ રીતે આયોજન કરી રહી છે, તે જાણવા માટે સુનાવણી કરી હતી. કોવિડ 19 માટે હોસ્પિટલમાં બેડની વ્યવસ્થા, ઓક્સિજનની અવેલિબિલીટી, રેમડેસીવીરની વ્યવસ્થા જેવા પ્રશ્નો પર કોર્ટે પોતાની ચિંતા વ્યક્ત કરી હતી. આ પરિસ્થિતિને કાબૂમાં લેવા માટે હાઈકોર્ટે સરકારને કેટલીક સલાહ પણ આપી હતી.

કોરોનાનું ટેસ્ટિંગ અને રિઝલ્ટ જલ્દી ઉપલબ્ધ કરાવો

દર્દીઓને કોરોનાનું ટેસ્ટિંગ કરવા લાગી રહેલો સમય અને ત્યાર બાદ તેના રિઝલ્ટ આવવામાં થઈ રહેલા વિલંબ પર નામદાર કોર્ટે સરકારને ટકોર કરી હતી. નામદાર હાઈકોર્ટે સરકારને પૂછ્યું હતું કે, ટેસ્ટિંગ માટે પહેલાં જે 8થી 10 કલાકનો સમય લાગતો હતો, તે જ રિપોર્ટ અને પરિણામ આવવામાં પાંચ દિવસ લાગી રહ્યા છે. વળી RT-PCRનો ટેસ્ટ પણ તમામ જિલ્લાઓમાં થઈ રહ્યો નથી. હાઇકોર્ટે સરકારને જણાવ્યું હતું કે, તમે કહો છો કે ટેસ્ટિંગ માટેની સંખ્યા વધી છે, તેમ છતાં હજૂ પણ તાલુકા અને જિલ્લાઓ કે જ્યાં વસ્તી વધુ છે ત્યાં પણ RT-PCR ટેસ્ટ થઈ રહ્યા નથી.

આ પણ વાંચો -ગુજરાત હાઈકોર્ટઃ કોરોના સંક્રમણની ચેઈનને તોડવા રાજ્યભરમાં 3-4 દિવસનો કરફ્યૂ હિતાવહ

એક જ હાથ નીચે ઇન્જેક્શનનું કંટ્રોલ ન હોવું જોઇએ - હાઇકોર્ટ

રેમડેસીવીર ઇન્જેક્શનને લઈને હાઈકોર્ટે સરકારને સલાહ આપી હતી કે, એક જ હાથ નીચે ઇન્જેક્શનનું કંટ્રોલ ન હોવું જોઈએ. ઇન્જેક્શન તમામ જરૂરિયાતમંદોને સરળતાથી મળી રહે તેવા પ્રકારની વ્યવસ્થા સરકારે કરવી જોઈએ. જેમ બજારમાં પેરાસીટામોલની દવા સરળતાથી મળી રહે છે, તેટલી જ સરળતાથી ઇન્જેક્શન પણ મળવું જોઈએ. હાઈકોર્ટે સરકારને ટકોર કરી હતી કે, તમારી પાસે તમામ વસ્તુઓ ઉપલબ્ધ છે, કોઈ કમી નથી.

આ પણ વાંચો -8 મેના રોજ યોજાશે મેગા લોક અદાલત

રેમડેસીવીર બાબતે સરકારે પોતાનો પક્ષ રજૂ કર્યો

ગુજરાતના એડવોકેટ જનરલે રેમડેસીવીરને લઈને રાજ્ય સરકારનો મત મૂકતા જણાવ્યું હતું કે, ઇન્જેક્શનનું પ્રોડક્શન લિમિટેડ સંખ્યામાં જ થઈ રહ્યું છે, ત્યારે ડોક્ટર્સે પણ ઈમરજન્સી સિવાય તેનું પ્રિસ્ક્રિપ્શન કરવું જોઈએ નહીં. આ ઉપરાંત ડૉકટરના પ્રિસ્ક્રિપ્શનથી જ ઇન્જેક્શન મળશે. હાલ રાજ્યમાં રેમડેસીવીરનું 1 લાખ 75 હજાર જેટલું ઉત્પાદન થાય છે અને એ કોઈ પેરસીટામોલ જેવી દવા નથી.

રાજ્યમાં 1127 કોવિડ ડેઝિગ્નેટેડ હોસ્પિટલ છે

કોવિડ હોસ્પિટલમાં બેડ પૂરતા હોવાનો દાવો એડવોકેટ જનરલે કર્યો હતો. તેમણે રવિવારના રોજ અમદાવાદ હોસ્પિટલ નર્સિંગ હોમ એસોસિએશને તેમના પોર્ટલ પર મૂકેલી માહિતી મુજબ કુલ 6283 બેડ પૈકી 1027 બેડ ખાલી હતા, જ્યારે અમદાવાદમાં કુલ 141 અને રાજ્યમાં 1127 કોવિડ ડેઝિગ્નેટેડ હોસ્પિટલ હોવાનું જણાવ્યું હતું.

સરકારી કોરોના કાબૂમાં લેવા માઈક્રો પ્લાનિંગ કરવું જોઈએ - ગુજરાત હાઇકોર્ટ

કોરોનાના વધતા જતા કેસને જોઈને નામદાર હાઈકોર્ટના ચીફ જસ્ટિસ વિક્રમનાથ અને જસ્ટિસ ભાર્ગવ કારીયાએ સરકારને સલાહ આપી હતી કે, જેમ ચૂંટણી સમયે સોસાયટી - સોસાયટી બુથ ઉભા કરી આયોજન કરવામાં આવે છે. તેવી જ રીતે કોરોનાનું પણ માઈક્રો પ્લાનિંગ કરી સોસાયટીના વ્યક્તિને જવાબદારી આપવામાં આવી જોઈએ. ત્યાર બાદ વૉર્ડના અધિકારેને તેની જવાબદારી આપવામાં આવે. જેથી ટ્રેસિંગ પણ થઈ શકે.

આ પણ વાંચો -રાજકીય પક્ષોને હાઇકોર્ટની ચેતવણી: કોરોનાના કેસ વધશે તો કાર્યકર્તાઓને ડ્યૂટી માટે મોકલીશું

હોસ્પિટલ આગળ લાઈન કેમ છે - હાઇકોર્ટનો સવાલ

હોસ્પિટલ આગળ કોરોનાની સારવાર લેવા માટે લાગી રહેલી લાઈનને લઇ નામદાર હાઈકોર્ટે સરકારને સવાલ કર્યો હતો. તેના જવાબમાં ગુજરાતના એડવોકેટ જનરલ કમલ ત્રિવેદીએ જણાવ્યું હતું કે, કોવિડ ડેઝીગ્નેટેડ હોસ્પિટલમાં ત્રણથી ચાર હોસ્પિટલ્સ નામિત હોસ્પિટલ છે. મોટાભાગના લોકોને આજ હોસ્પિટલમાં સારવાર લેવી છે, જ્યારે અન્ય હોસ્પિટલમાં કોઈ જવા માંગતું નથી.

જાહેર પ્રસંગો બંધ કરવામાં આવે - હાઇકોર્ટ

નામદાર કોર્ટે લગ્નવિધિ ઉપરાંત તમામ પ્રસંગો પર બેન મૂકવા રાજ્ય સરકારને જણાવ્યું છે. લગ્નમાં પણ માત્ર 50 વ્યક્તિઓને જ પરવાનગી આપવા જણાવ્યું હતું. આ ઉપરાંત ઓફિસમાં પણ 50 ટકા સ્ટાફને જ કાર્યરત રાખવા જણાવ્યું હતું. માસ્ક અને સેનિટાઇઝરનો ઉપયોગ વધે તે માટેના પ્રયાસ કરવા સૂચનાઓ આપી હતી.

ગુજરાત એડવોકેટ એસસિએશનને પણ કોરોના કાબૂમાં લેવા દાખલ કરી હતી પિટિશન

રાજ્યમાં વધતા કોરોનાના કેસને લઈને ગુજરાત હાઇકોર્ટ એડવોકેટ એસોસિએશને પિટિશન દાખલ કરી કેટલીક સલાહ આપી હતી. જેમાં તમામ જરૂરિયાતમંદોને રેમડેસીવીર ઇન્જેક્શન મળે, હોસ્પિટલમાં બેડની સંખ્યા, ખાલી બેડ, ઓક્સિજન, રેમડેસીવીરનો જથ્થો વગેરે જેવી માહિતી વેબસાઈટ, રેડિઓ અને ટેલિવિઝન જેવા માધ્યમો થકી પ્રસારિત કરવામાં આવે. જાહેર પ્રસંગો પર પ્રતિબંધ મૂકવામાં આવે. આમ, કુલ 19 જેટલી સલાહ આપવામાં આવી હતી.

આ પણ વાંચો -કોલેજ ફી મુદ્દે ગુજરાત હાઇકોર્ટ વચગાળાનો હુકમ જારી કરી શકે છે

લોકડાઉન લાવી ન શકાય - રાજ્ય સરકાર

કોરોના મુદ્દે લોકડાઉન લાવવા મુદ્દે રાજ્ય સરકારે હાઇકોર્ટમાં પોતાનો મત મૂકતા જણાવ્યું હતું કે, જો લોકડાઉન લાવવામાં આવે તો દૈનિક જીવનચાર્યમાં સામાન્ય લોકોને ઘણી મુશ્કેલીઓ પડે તેમ છે. તેના કરતાં અમે એકલાક એસોસિયેશન સાથે વાત કરી તેમને મનસ્વી લોકડાઉન રાખવા કહીએ છીએ. પાન મસાલાના સેવનથી લોકો માસ્ક હટાવી ગમે ત્યાં થૂંકે છે, જે કારણે સંક્રમણ ફેલાય છે, એટલે તેને બંધ કરાવ્યું છે.

મીડિયાના અહેવાલો જવાબદારીપૂર્વકના છે, તથ્ય નથી એવું કહી ન શકાયઃ ચીફ જસ્ટિસ

એડવોકેટ જનરલે એક તબક્કે સુનાવણીમાં એવી દલીલ કરી હતી કે મીડિયામાં આવતા અહેવાલો તથ્યહીન હોય છે ત્યારે ચીફ જસ્ટિસ વિક્રમનાથે તીખી પ્રતિક્રિયા આપતા કહ્યું કે, સરકાર પોતાની કામગીરી પર ધ્યાન રાખે. તેમણે વધુમાં કહ્યું કે પ્રસાર માધ્યમો એટલે કે મીડિયાના અહેવાલોમાં તથ્ય નથી એવું કહી ન શકાય. અમે પણ મીડિયા અહેવાલો અને વાસ્તવિક પરિસ્થિતિ બન્ને જોઈએ છીએ.