રાજ્યમાં કોવિડ ગાઈડલાઈનનું કડક પાલન કરાવવા DGPએ આદેશ કર્યો

રાજ્યના પોલીસ મહાનિર્દેશક અને હેડ ઓફ પોલીસ ફોર્સ આશિષ ભાટિયાએ ગુજરાતના તમામ જિલ્લાઓના પોલીસ અધિક્ષક અને પોલીસ કમિશનરને કોવિડ ગાઈડલાઈનનું ચુસ્ત પાલન થાય તે માટે કાર્યવાહી કરવા માટે આદેશ કર્યો છે.

• રાજ્યના DGPએ કોરોના સંક્રમણ બાબતે કડક કાર્યવાહી કરવા આદેશ કર્યો
• ભીડભાડ વાળી જગ્યાએ વિશેષ પોલીસ બંદોબસ્ત અને પેટ્રોલિંગ દ્વારા કરાવાશે પાલન
• રાજ્યના પોલીસ અધિકારીઓ સાથે મિટિંગ બાદ એક્શન પ્લાન

અમદાવાદ: રાજ્ય પોલીસ મહાનિર્દેશકે તમામ જિલ્લાઓના પોલીસ અધિક્ષક અને પોલીસ કમિશનરોને સ્પષ્ટપણે જણાવ્યું છે કે, તેમના વિસ્તારમાં દરેક વ્યક્તિ ફરજિયાત માસ્ક પહેરે અને માસ્ક ન પહેરનારા સામે કડક હાથે કામ લઇ રૂપિયા 1 હજારના દંડની પણ વસૂલાત કરવામાં આવે. આ ઉપરાંત કન્ટેનમેન્ટ ઝોનમાં વિશેષ તકેદારી રાખવાની સૂચના આપવામાં આવી છે, ત્યારે ભીડભાડ વળી જગ્યાએ પેટ્રોલિંગ અને વિશેષ પોલીસ બંદોબસ્ત ગોઠવવામાં આવશે.

કોરોના

આ પણ વાંચો :રાજકોટમાં કોરોના કેસમાં 24 કલાક દરમિયાન 13 લોકોના મોત

સૌ નાગરીકો ફરજિયાત માસ્ક પહેરે તે માટેની ઝુંબેશ હાથ ધરવા કરી અપીલ

રાજ્યમાં વધતા કોરોના સંક્રમણનો વ્યાપ અટકાવવા સૌ નાગરિકોની આરોગ્ય રક્ષા માટે માસ્ક અનિવાર્ય હોવાથી, રાજ્યના પોલીસ મહાનિર્દેશકે સૌ નાગરીકો ફરજિયાત માસ્ક પહેરે તે માટેની ઝુંબેશ તાત્કાલિક ધોરણે હાથ ધરવા પણ જિલ્લા પોલીસ અધિક્ષકો અને પોલીસ કમિશનરોને તાકીદ કરી છે.