વ્યાજખોરના ત્રાસથી બિલ્ડરે ઝેરી દવા ગટગટાવી

રાજ્યમાં વ્યાજખોરનો ત્રાસ વધી રહ્યો છે, ત્યારે વધુ એક કિસ્સો સામે આવ્યો છે. શહેરના દાણીલીમડા પોલીસ સ્ટેશનમાં બે વ્યાજખોર સામે ફરિયાદ નોંધાઇ છે. આ બન્ને વ્યાજખોરોએ એક બિલ્ડરની મિલકતો પચાવી પાડી હતી. અને અવાર-નવાર ફોન ઉપર વધુ રૂપિયા માંગી તેઓને ધમકી પણ આપી હોવાનો આક્ષેપ કર્યો છે. આ બિલ્ડરે એક વ્યક્તિ પાસેથી 50થી 60 લાખ રૂપિયા કન્સ્ટ્રક્શનની સાઈટમાં જરૂર પડતા વ્યાજે લીધા હતા. જોકે આ બન્ને વ્યાજખોરોના ત્રાસથી બિલ્ડરે દવા પી લેતાં તેઓને હોસ્પિટલ ખસેડવામાં આવ્યા હતા. જ્યાં પોલીસને જાણ કરતાં દાણીલીમડા પોલીસે બિલ્ડરની ફરિયાદ નોંધી તપાસ શરૂ કરી છે.

• વ્યાજખોરના ત્રાસથી બિલ્ડરે ઝેરી દવા ગટગટાવી
• સ્કીમમાં પૈસાની જરૂર પડતાં વ્યાજે લીધા હતા
• વ્યાજખોરોએ મિલકત પણ પચાવી પાડી

અમદાવાદ: શહેરના દાણીલીમડામાં આવેલા શીતલ ફ્લેટમાં રહેતાં ઝાકીર હુસેન કુરેશી બિલ્ડીંગ કન્સ્ટ્રક્શનનું કામ કરે છે. આજથી ત્રણેક વર્ષ પહેલાં બોમ્બે હોટેલમાં રોશન રેસીડેન્સી નામની ફ્લેટની સ્કીમ ચાલુ કરી હતી. જે સ્કીમ માટે પૈસાની જરૂર પડતાં તેમણે તેમના મિત્ર રસીદ ખાનને વાત કરી હતી અને રસીદ ખાને તેઓને લિયાકત મિર્ઝા અને ઇકબાલ ખાન સાથે મુલાકાત કરાવી હતી. આ બન્ને વ્યક્તિઓએ પૈસા વ્યાજે આપવાની તૈયારી બતાવી હતી. ઝાકીર હુસેને ઈકબાલ ખાન પઠાણ પાસેથી 50થી 60 લાખ જેટલી રકમ વ્યાજ પર લીધી હતી. જે રકમ વ્યાજ સાથે ચુકવી પણ આપી હતી પણ આ ઈકબાલ પઠાણ પૈસાની લાલચમાં ઝાકીર હુસેન પાસે બીજા 25થી 30 લાખથી વધારે માંગતો હતો અને ઝાકીર હુસેને લિયાકત મિર્ઝા પાસેથી ટુકડે-ટુકડે 16 લાખની રકમ વ્યાજે લઈ ચૂકવી દીધા હતા.

આ પણ વાંચો:મહેસાણાના વિજાપુરમાં વૃદ્ધ દંપતીએ ઝેરી દવા પી જીવન ટૂંકાવ્યું

બન્ને લોકોએ ઝાકીર હુસેનને ડરાવીને ફ્લેટનો કબ્જો લઈ લીધો

આ મામલે વ્યાજ પેટે વધુ રકમ પડાવી લેવા માટે ઈકબાલ પઠાણ અને લિયાકત મિર્ઝા ધાક ધમકી આપતા હતા. આ બન્ને લોકોએ ઝાકીર હુસેનને ડરાવી-ધમકાવી ફ્લેટના લખાણ ઉપર સહી કરાવી તેનો કબ્જો લઈ લીધો હતો. ઝાકીર હુસેન તેમની ફ્લેટ ઉપર પણ જઇ શકતા ન હતા. લિયાકત મિર્ઝાએ ઝાકીર હુસેનને ફોન ઉપર ધમકી આપી મૂડી પર 20 ટકા રકમ વધુ માંગી હતી. આટલું જ નહી એકવાર ઝાકીર હુસેનના ઘરે જઈ તેને ફોર વ્હીલમાં બેસાડી તેના ઘરે લઇ જઇ માર માર્યો હતો અને ફ્લેટનું ધાબુ પણ લખાવી લીધું હતું.

આ પણ વાંચો:વડોદરામાં નર્સે ઊંઘ અને મસલ રિલેક્સેશનના ઈજેક્શન લઈ મોત વ્હાલું કર્યું