Gambling Den: ડિલિવરી બોય બની ત્રાટકેલી પોલીસે 150થી વધુ જુગારીઓને ઝડપ્યા

અમદાવાદ દરિયાપુર વિસ્તાર (Dariapur area)માં જુગારધામ ઝડપાયું હતું. સ્ટેટ મોનીટરીંગ સેલે (State Monitoring Cell)દરિયાપુરમાં આવેલા મનપસંદ જિમખાનામાં દરોડા પાડી 150થી પણ વધુ આરોપીઓની ઝડપી પાડ્યા હતા. મનપસંદ જિમખાનામાં મોટાપાયે કલબ ચાલતું હોવાની બાતમીના આધારે ડીજી વિજિલન્સ સ્કોડે દરોડા પાડયા હતા. આ દરોડામાં સ્ટેટ મોનીટરીંગ સેલના Dysp જ્યોતિબેન પટેલ (Dysp Jyotiben Patel) પણ જોડાયા હતા.

• અમદાવાદ શહેરમાંથી મસ્ત મોટું ઝડપાયું જુગારધામ
• દરિયાપુર વિસ્તારમાંથી સ્ટેટ મોનીટરીંગ સેલે પાડ્યા દરોડા
• 150થી વધુ જુગારીઓ 7 અલગ અલગ બિલ્ડીંગમાં રમતા હતા જુગાર

અમદાવાદ: શહેરના દરિયાપુર વિસ્તારમાં ચાલતા જુગારધામ પર ફરી એક વખત પોલીસે દરોડા પાડયા હતા. દરિયાપુરની તંબુ ચોકી કે જે 500 મીટર પણ નહીં આવેલી હોય ત્યાં દરિયાપુર પોલીસ સ્ટેશન (Dariapur Police Station) 1 કિલો મીટરના અંતરે આવેલું છે. જેની નજીકમાં જ મનપસંદ જિમખાનામાં કેટલાક જુગારીઓ જુગાર રમી રહ્યા હોવાની ચોક્કસ બાતમી સ્ટેટ મોનીટરીંગને મળતાની સાથે જ દરોડા પાડવામાં આવ્યા હતા. આ દરોડા કરતાની સાથે જ સમગ્ર વિસ્તારમાં ભારે નાસભાગ મચી ગઈ હતી અને દરોડા દરમિયાન પોલીસના હાથે જે લાગ્યું તે પણ ચોંકાવનારું જોવા મળ્યું હતું.

ઉલ્લેખનીય છે કે, દરોડા (Raid) દરમિયાન પોલીસને ચોક્કસ માહિતી મળતી મળી હતી કે, એક બિલ્ડીંગ નહીં પરંતુ સાત અલગ અલગ બિલ્ડિંગમાં જુગારધામો ધમધમી રહ્યા છે. શહેર વિસ્તારમાં રહેણાંક મકાન છતાં આટલી મોટી સંખ્યામાં જુગારીઓ અહીં જુગાર રમતા હતા. જેની સ્થાનિક પોલીસના બદલે સ્ટેટ મોનીટરીંગ સેલ (State Monitoring Cell) દ્વારા દરોડા પાડવામાં આવ્યા છે. જેને લઇને સ્થાનિક પોલીસ સ્ટેશન પર પણ અનેક શંકાઓ ઉપજાવી રહી છે.

આ પણ વાંચો: સુરતમાં જુગારધામ પર સ્ટેટ વિજીલન્સની ટીમે દરોડો પાડ્યો, 100 જેટલા જુગારીઓ ઝડપાયા

સ્ટેટ મોનીટરીંગ સેલ સ્કોડ દ્વારા 7 અલગ અલગ બિલ્ડીંગમાં ડિલિવરી બોય બનીને પાડવામાં આવ્યા દરોડા

શહેરમાં ઓનલાઈન ફૂડ (Food online)નું માર્કેટ ધીમે ધીમે વધી રહ્યું છે. કોવિડ-19 (Covid) પરિસ્થિતિ બાદ સામાન્ય લોકો ઓનલાઈન ફૂડ સૌથી વધારે મંગાવી રહ્યા હોય છે. ત્યારે એવામાં દરિયાપુરમાં ચાલતા સૌથી મોટા જુગારધામ (Gambling Den)પર દરોડા પાડવાના ઓપરેશનની સ્ટેટ મોનીટરીંગ સેલના અધિકારીઓને જાણ થતાં તેઓએ એક ચોક્કસ પ્લાન તૈયાર કર્યો હતો. જેમાં સૌથી પહેલા કેટલી જગ્યાએ અને કઈ કંઈ બાજુ જુગારધામ છે તે નક્કી કરવામાં આવ્યું હતું.

જેના આધારે નિશ્ચિત માણસો નક્કી કર્યા હતા. જેઓને ડિલિવરી બોય બનાવવામાં આવ્યા હતા. કોઈ સામાન્ય સ્વિગી, ઝોમેટો અથવા અન્ય ફૂડ ડિલિવરી નહિ પરંતુ આ પોલીસ ડિલિવરી હતી. જેઓ તમામ 7 અલગ અલગ બિલ્ડીંગમાં પહોંચી ફૂડ પેકેટ ડિલિવરી કરવા આવેલા હોવાનું જણાવી 150થી વધુ જુગારીઓને ઝડપી પાડ્યા હતા. જેની જાણ સ્ટેટ મોનીટરીંગ સેલ જ્યોતિ પટેલ Dyspને થતાં તેઓ પણ સ્પબ્ધ રહી ગયા હતા. તેઓ સમગ્ર ઓપરેશનમાં બેકઅપ પલાનમાં થોડા દૂર રહેલા હતા. પરંતુ 150થી વધુ જુગારીઓ ઝડપાયા હોવાનું જાણવા મળતા તેઓ પણ ચોંકી ઉઠ્યા હતા.

મનપસંદ ચેરીટેબલ ટ્રસ્ટમાં પણ કરવામાં આવી કાર્યવાહી

સમગ્ર દરોડામાં સૌથી મોટી ચોંકાવનારી વાત તે સામે આવી હતી કે, જુગારધામ મનપસંદ ચેરીટેબલ ટ્રસ્ટ (Manpasand Charitable Trust)ના નેજા હેઠળ ચાલી રહી હતું. જે ટ્રસ્ટમાં પણ જુગાર રમાઇ રહ્યો હતો જેને લઈ સ્ટેટ મોનીટરીંગ સેલે ત્યાં પણ કડક કાર્યવાહી કરી હતી. જો કે, આ ટ્રસ્ટ કોના નામે રજીસ્ટ્રેશન થયેલું છે. ક્યાં કામોને આધારે રજીસ્ટર થયું છે તે અંગે થઈ તપાસ કરવામાં આવે તો કદાચ મસ્તમોટું કૌભાંડ પણ બહાર આવી શકે છે. ચોંકાવનારી બાબત એક એ પણ હતી કે, જુગારધામ પર જુગાર રમવા આવતા લોકોને તમાકુ, નાસ્તા સહિત તમામ સવલતો આપવામાં આવતી હતી. જેમાં પાણીની બોટલ પણ મનપસંદ ચેરીટેબલ ટ્રસ્ટની પ્રિન્ટિંગ થયેલી બોટલ આપવામાં આવતી હતી.

અમદાવાદ શહેર પોલીસ અને સ્થાનિક એજન્સી શું આંખ આડા કાન કરી રહી છે ?

અમદાવાદ શહેરમાં દારૂ, ડ્રગ્સ, જુગાર હવે કોઈ સામાન્ય વાત રહી નથી. જેના પડઘા સમગ્ર રાજ્યમાં પડી રહ્યા છે. શહેરમાં બેફામ વહેંચાઈ રહેલા ડ્રગ્સ અને દારૂના કારણે એક તરફ લોકો હેરાન, પરેશાન અને ત્રાહિમામ પોકારી ઉઠ્યા છે. તેવામાં અમદાવાદ શહેર પોલીસ (Ahmedabad City Police) અને શહેર ક્રાઈમ બ્રાન્ચ, SOG સહિત પોલીસ એજન્સીઓ ક્યાંક આંખ આડા કાન કરી રહી હોય તેવું સ્પષ્ટ લાગી રહ્યું છે. કારણ કે શહેરના શાહપુર, દરિયાપુર, સહિત અનેક વિસ્તારોમાં મસ્ત મોટું દારૂનું રેકેટ, ડ્રગ્સનું રેકેટ ચાલી રહ્યું છે. કેટલાક પોલીસ સ્ટેશનમાં તો પોલીસ જ જાણે સમગ્ર રેકેટ ચલાવી રહી હોય તેવું પણ લાગી રહ્યું છે. ત્યારે ગાંધીના ગુજરાતમાં કલંકિત કરનારી આજની દરિયાપુર મનપસંદ જિમખાનામાં થયેલા જુગારધામ પરના દરોડામાંથી અમદાવાદ શહેર પોલીસે બોધ પાઠ મેળવવો રહ્યો છે.

આ પણ વાંચો: યે જમાદાર હૈ કી માનતા હી નહીં, જમાદાર એન્ડ કંપની ગુજરાત છોડી ઉદેપુરમાં જુગારધામ શરૂ કર્યું હતું

સ્ટેટ મોનીટરીંગ સેલે જુગારધામમાંથી શું ઝડપી પાડ્યું ?

સ્ટેટ મોનીટરીંગ સેલ દ્વારા દરોડા પાડવામાં આવતાની સાથે જ નાસભાગ મચી ગઇ હતી. જો કે, સમયસૂચકતા ખુબ જ રહેલી હોવાના કારણે તમામ આરોપીઓને દબોચી લેવામાં આવ્યા હતા. આરોપીઓ પાસેથી હાલ રોકડ પોલીસ દ્વારા કબ્જે લેવાની કાર્યવાહી કરવામાં આવી રહી છે. પરંતુ પત્તાની કેટ, કોઈન, સહિત 10થી વધુ કાર અને અન્ય મુદ્દામાલ કબજે લેવાની કાર્યવાહી કરવામાં આવી રહી છે. સ્ટેટ મોનીટરીંગ સેલના વિશ્વસનીય સૂત્રનું કહેવું છે, 150થી વધુ આરોપીઓ હોવાથી મુદ્દામાલ લાખો રૂપિયામાં થઈ શકે છે. જેની ગણતરી કરતા પણ કદાચ સવાર પડી શકે છે.

જુગારધામ ચલાવનાર મુખ્ય સૂત્રધાર કોણ ?

અમદાવાદ શહેરમાં જુગારધામએ કોઈ મોટી બાબત હવે ગણવામાં આવતી નથી. જેના કારણે યુવાધન પણ જુગારની લતે લાગી રહ્યું છે. દરિયાપુર વિસ્તારમાં આવેલા મનપસંદ જિમખાના અનેક વખત જુગારીઓ ઝડપાયા હતા. તેમ છતાં ફરી તે કાર્યરત થઈ જતું હતું. આ વખતે જુગારધામ પર જ્યોતિ પટેલ Dyspએ પોતે સમગ્ર ઓપરેશન પોતાના નેજા હેઠળ હાથ ધર્યું હતું. જ્યારે મનપસંદ જુગારધામ ચલાવનાર મુખ્ય સંચાલક આરોપી ગામા ઉર્ફે ગોવિંદ પટેલ અને સહસંચાલક મૂળરાજસિંહની ધરપકડ કરવામાં આવી છે. તો બીજી તરફ સુત્રોનું કહેવું છે કે, સમગ્ર રેકેટમાં બંધબારણે દરિયાપુર મનપસંદ જુગારધામમાં મોટા હિન્દુ સંગઠન (Hindu organization)ના આગેવાન પણ ભાગીદાર રહેલા છે. જે અંગે થઈ પોલીસ ઊંડાણપૂર્વક તપાસ કરે તો છેડા ત્યાં સુધી પણ પહોંચી શકે છે.

આ પણ વાંચો: લોકડાઉનમાં કંપની માલિકે કંપનીમાં જ ખોલી નાખ્યું જુગારધામ, 41.76 લાખના મુદ્દામાલ સાથે 8 શકુનીઓ ઝડપાયા

સ્થાનિક પોલીસ ક્યાં બની નિષ્ફળ ?

દરિયાપુર મનપસંદ જિમખાના છેલ્લા કેટલાક મહિનાથી ચાલુ રહ્યું હતું. જ્યાં અવારનવાર દરોડા પણ પડી ચુક્યા છે. સુત્રોનું કહેવું છે કે, ગામા પટેલ દ્વારા ઉંચા પાયે તમામ જગ્યાએ પોતાનો વહીવટી પહોંચી જઈ રહ્યો છે. જેના કારણે મસ્તમોટું જુગારધામ ચાલી રહ્યું છે. પરંતુ ઉચ્ચ અધિકારીઓના વહીવટીની લાલસામાં જ્યારે મોટી રેડ પડે છે ત્યારે નાના પોલીસ અધિકારીઓનો ભોગ લેવાઈ જતો હોય છે.