નેનો ફોનથી કરોડોની છેતરપિંડી કરનાર ગેંગ દિલ્હીથી ઝડપાઈ

અમદાવાદઃ સાયબર ક્રાઈમે દિલ્હીના પ્રીત વિહાર વિસ્તારમાંથી 19 આરોપીઓની ધરપકડ કરી છે. લાઈફ ઈન્શ્યોરન્સ અને પોલિસી હોલ્ડરને ટાર્ગેટ બનાવી લાખો રૂપિયા ખંખેરી કરનાર ફેક કોલ સેન્ટર ગેંગને સાયબર ક્રાઈમ પોલીસે દબોચી લીધી છે. જો કે, આ કોલ સેન્ટર અન્ય કોઈ રીતે નહિ, પણ નેનો ફોનથી ચલાવવામાં આવતું હતુ અને નેનો ફોનથી ચાલતા કોલ સેન્ટરનો આ પહેલો કિસ્સો છે.

સાયબર ક્રાઈમે દિલ્હીથી એક કોલ સેન્ટર ઝડપી 19 લોકોની ધરપકડ કરી છે. સાયબર સેલના PI વી બી બારડ અને PSI અલ્પેશ મહિડાને બાતમી મળી હતી કે, દિલ્હીના કેટલાક શખ્સો ઈન્સ્યોરન્સ પોલિસી રદ થઈ હોય તો, તેને ચાલુ કરવાના નામે ઠગાઈ કરી રહ્યા છે. જેથી પોલીસે તેની પર કામ શરૂ કર્યું હતું, પણ તપાસ કરતા આ કોલ સેન્ટર સેન્ટરમાં પહેલી એવી મોડસ ઓપ્રેન્ડી સામે આવી જેમાં નેનો ફોન વાપરવામાં આવતો હતો. નેનો મોબાઈલ અને વોઈસ ચેન્જર મોડ્યુલ વડે કોલ સેન્ટરર પોલિસી હોલ્ડરને ફોન કરતા હતા અને જેથી મહિલાનો અવાજ પુરુષમાં કન્વર્ટ થઈ જતો હતો અને પુરુષનો અવાજ મહિલામાં કન્વર્ટ થઈ જતો હતો. વોઈસ ચેન્જર ઍપ્લિકેશન મારફતે આ ટેકનીકનો ઉપયોગ કરીને નાગરિકોને છેતરવામાં આવતા હતા. અત્યાર સુધીમાં તો, પોલીસે અનેક વખત કોલ સેન્ટરને ઝડપ્યા છે, પરંતુ આ મોડસ ઓપ્રેન્ડી પહેલી વખત સામે આવી છે. આ નેનો ફોન આંગળીના બે વેઢા જેટલી સાઈઝના છે, પણ તેના થકી કરોડો રૂપિયા ખંખેરી લેવાય છે.

સાયબર ક્રાઈમના DCP રાજદિપસિંહ ઝાલાએ જણાવ્યું હતું કે, આરોપીઓ તો એટલી હદે તૈયાર છે કે, અમુક ઈન્ટર્નશીપ કરવા આવેલી યુવતીઓને પણ ભનક આવવા દીધી ન હતી કે, તે જગ્યાએ ફેક સેન્ટર ચાલે છે. આખરે પોલીસ આ આરોપીઓમાંથી બે નિર્દોષ યુવતીને મુક્ત કરવા માટે કાયદેસરની કાર્યવાહી કરી માનવતા દાખવશે.