અમદાવાદના સૈજપુર-બોઘા વૉર્ડમાં પ્રાથમિક સુવિધાને લઈ સ્થાનિકો ત્રાહિમામ

કોર્પોરેશનની ચૂંટણી આગામી 21 ફેબ્રુઆરીના રોજ યોજવાની છે, ત્યારે ચૂંટણી લડવા માટે રાજકીય પક્ષો મેદાને ઉતર્યા છે. દરેક પક્ષો સત્તા માટે એડીચોટીનું જોર લગાવી રહ્યાં છે. મતદારોને આકર્ષવા માટે ઉમેદવારો રણનીતિ ઘડી રહ્યાં છે. શહેરમાં અનેક સમસ્યાઓ છે કે જે હજુ પણ પૂરી થઇ શકી નથી. નાગરિકો હજુ અનેક સમસ્યાથી ત્રાહિમામ છે.

• ગટર, પાણી, રોડ રસ્તા જેવી પ્રાથમિક સુવિધાનો અભાવ
• કાઉન્સિલરોના કામોથી સ્થાનિકો નારાજ
• માત્ર ચૂંટણીટાણે જ કોર્પોરેટરો અને નેતાઓ દેખાય છેઃ સ્થાનિકો

અમદાવાદઃ શહેરમાં સૈજપુર-બોઘા વૉર્ડમાં 2.50 લાખ જેટલી જનસંખ્યા આવેલી છે અને 1.50 લાખ જેટલા મતદારો છે. કોંગ્રેસના 2 અને ભાજપના 2 કાઉન્સીલર છે. આ વૉર્ડમાં વર્ષોથી 2 કોંગ્રેસના અને 2 ભાજપના ઉમેદવારો જીતતા આવ્યાં છે. પરંતુ કોઇ પણ પક્ષ સ્થાનિકોના પ્રશ્નોનું નિરાકરણ લાવતું નથી. ત્યારે સ્થાનિકોએ જણાવ્યું હતું કે, છેલ્લા 5 વર્ષની અંદર પ્રાથમિક સુવિધા કોઈપણ પ્રકારની કરવામાં આવી નથી. ગટર, પાણી, રોડ રસ્તા જેવી પ્રાથમિક સુવિધાનો અભાવ જોવા મળી રહ્યો છે. કોઇપણ કોર્પોરેટર હોય તે માત્ર ચૂંટણી ટાણે જ દેખાય છે, પછી પાંચ વર્ષ સુધી કોઇ દેખાતુ નથી.

સ્ટ્રીટ લાઇટ, લાઇબ્રેરી, ટ્રાફિકની સમસ્યા જેવી અનેક સમસ્યાઓ

સૈજપુર-બોઘા વૉર્ડમાં પાણી ઉભરાવવું, રોડ-રસ્તા, સ્ટ્રીટ લાઇટ, લાઇબ્રેરી, ટ્રાફિકની સમસ્યા જેવી અનેક સમસ્યાઓ ઠેર-ઠેર જોવા મળી છે. જેને લઈ સ્થાનિકો દ્વારા ઉગ્ર રોષ પણ જોવા મળ્યો હતો. સ્થાનિકોનું કહેવું છે કે, સરકાર ટેક્સ લે છે, પરંતુ કેમ હોસ્પિટલ, રોડ-રસ્તા, ડ્રેનેજ લાઇન જેવી પ્રાથમિક સુવિધાઓથી અમને અળગા રાખે છે. ત્યારે બીજી તરફ કોર્પોરેટરને જે સરકારી ગ્રાન્ટ મળે છે, તે ક્યાં જાય છે તેવો પ્રશ્ન લોકોમાં ઉઠવા પામ્યો છે. આ ઉપરાંત રેવન્યુ ગ્રાન્ટ પણ કોર્પોરેટરોને મળે છે, તે પણ ક્યાં જાય છે તે એક પ્રશ્ન છે?

સ્થાનિકોની માંગણી શું છે?

આ વૉર્ડમાં સ્થાનિકોની માંગણી છે કે, અમને યોગ્ય તમામ પ્રકારની સવલત આપવામાં આવે. જેવી કે હોસ્પિટલ, રોડ-રસ્તા, ડ્રેનેજ લાઇન જેવી પ્રાથમિક સુવિધાઓ આપવામાં આવે. આ ઉપરાંત આ વૉર્ડમાં આવતા ગાર્ડનને વિકાસાવવામાં આવે તેવી પણ માંગ કરી છે. ત્યારે હવે પ્રજા કોને મત આપીને જીતાડશે તે જોવું રહ્યું.