હાઇકોર્ટમાં સુનવણી પૂર્ણ : સરકારને 108ની કામગીરી અને હોસ્પિટલમાં ખાનગી વાહનોમાં આવતા દર્દીઓને દાખલ કરવાની સૂચના

ગુજરાતમાં કોરોનાના કેસમાં સતત વધારો થઇ રહ્યો છે. હવે 10 હજારથી વધુ કોરોના પોઝિટિવ કેસ નોંધાઇ રહ્યા છે, ત્યારે ગુજરાત હાઇકોર્ટમાં કોરોનાની કામગીરી મુદ્દે સુઓમોટો કરીને સુનાવણી હાથ ઘરવામાં આવી હતી. આગામી સુનાવણી 27 એપ્રિલના રોજ થશે, જેમાં અંતિમ નિર્ણય હાઇકોર્ટ દ્વારા આપવામાં આવશે.

• ગુજરાતમાં હાઇકોર્ટમાં સુનાવણી પૂર્ણ
• રાજ્યમાં બેડ ખાલી હોવાનો જવાબ રાજ્ય સરકારે આપ્યો
• ખાનગી વાહનોમાં આવતા દર્દીઓને હોસ્પિટલમાં દાખલ કરો- હાઇકોર્ટ
• સરકારે કોરોનાને કાબૂમાં લેવા શું પ્રયાસો કર્યા, તેની રજૂઆત કરાઇ
• અમદાવાદ મેડિકલ એસોસિએશન દ્વારા 14 દિવસ લોકડાઉનની જરૂરિયાત હોવાની કોર્ટમાં કરી રજૂઆત

અમદાવાદ : ગુજરાતમાં કોરોનાના કેસમાં સતત વધારો થઇ રહ્યો છે. હાલ દૈનિક 10 હજારથી કોરોનાના પોઝિટિવ કેસ નોંધાઇ રહ્યા છે, ત્યારે ગુજરાત હાઇકોર્ટમાં કોરોનાની કામગીરી મુદ્દે સુઓમોટો કરીને સુનવણી હાથ ધરવામાં આવી હતી. જેમાં મંગળવારના રોડ હાઇકોર્ટમાં સુનાવણી પૂર્ણ કરવામાં આવી છે. જે અંગે 27 એપ્રિલના રોજ અંતિમ નિર્ણય હાઇકોર્ટ દ્વારા આપવામાં આવશે. જ્યારે મંગળવારની સુનવણીમાં હાઇકોર્ટ દ્વારા ટકોર કરવામાં આવી છે કે, ખાનગી વાહનોમાં આવતા દર્દીઓને સરકારી હોસ્પિટલમાં દાખલ કરવામાં આવતા નથી. જેથી આ ઘટનાને ધ્યાનમાં લઇને હાઇકોર્ટે રાજ્ય સરકારને ટકોર કરી હતી કે, દર્દી 108માં આવે કે, ખાનગી વાહનોમાં હોસ્પિટલમાં દાખલ કરવા જોઇએ અને તેમને સારવાર આપવી જોઇએ.

અમદાવાદ મેડિકલ એસોસિએશને 14 દિવસ લોકડાઉનની જરૂરિયાત હોવાની કોર્ટમાં કરી રજૂઆત

ગુજરાત હાઇકોર્ટમાં ચાલી રહેલા કોરોના સુઓમોટોની કાર્યવાહીમાં અમદાવાદ મેડિકલ એસોશિયેશન દ્વારા રાજ્યમાં 14 દિવસના લોકડાઉનની જરૂરિયાત હોવાની કોર્ટમાં રજૂઆત કરી હતી, જ્યારે રાજ્યમાં હજૂ પણ દિવસે કોરોના ટેસ્ટ વધારવાની જરૂરિયાત હોવાનુ રજૂઆત કરી હતી. ઉલ્લેખનીય છે કે, સોમવારના રોજ અમદાવાદ મેડિકલ એસોસિયેશન દ્વારા GCCI(ગુજરાત ચેમ્બર ઓફ કોમર્સ એન્ડ ઇન્ડસ્ટ્રીઝ)ને પત્ર લખીને જરૂરિયાત ઇન્ડસ્ટ્રીઝ જ 50 ટકા કેપેસિટિ સાથે ચાલુ રાખવાની માગ કરવામાં આવી હતી, જ્યારે બાકીની ઇન્ડસ્ટ્રીઝ 14 દિવસ સુધી બંધ રાખવાની માગ પત્ર દ્વારા કરવામાં આવી હતી.

આ પણ વાંચો -કોરોના સારવારમાં અભાવનું એક મોટું કારણ સરકારી આંકડા અને વાસ્તવિક સ્થિતિ વચ્ચેનું અંતર છે- ગુજરાત હાઇકોર્ટ

30 એપ્રિલ સુધીમાં એક લાખ બેડ વધારાશે તેવો સરકારનો દાવો

રાજ્યમાં વર્તમાન પરિસ્થિતીની જો વાત કરવામાં આવે તે અનેક એવા જિલ્લાઓ છે કે જેમાં બેડ સંપૂર્ણપણે ફુલ ગયા છે. કોરોના હોસ્પિટલમાં એક બેડ મેળવા માટે લોકો વલખા મારી રહ્યા છે, ત્યારે અમદાવાદ અન્ય જગ્યાઓ સહિત રાજ્યમાં 30 એપ્રિલ સુઘી એક લાખ બેડની સુવિધાઓ વધારવામાં આવશે, તેવો રાજ્ય સરકાર દ્વારા હાઇકોર્ટમાં દાવો કરવામાં આવ્યો છે. ઉલ્લેખનીય છે કે, અમદાવાદમાં 1,200 બેડની હોસ્પિટલ પણ સંપૂર્ણપણે ફુલ થઇ ગઇ છે, ખાનગી હોસ્પિટલમાં જગ્યા નથી, ત્યારે રાજ્ય સરકારે હાઇકોર્ટમાં અમદાવાદમાં 76 ટકા બેડ ભરાયેલા હોવાનો સરકાર દ્વારા દાવો કરવામાં આવ્યો છે.

રાજ્યની યુનિવર્સિટી સંચાલિત લેબોરેટરીમાં RT-PCR ટેસ્ટ કરાવાનું સરકારનું આયોજન

હાઇકોર્ટમાં રાજ્ય સરકાર દ્વારા એવી પણ રજૂઆત કરવામાં આવી હતી કે, રાજ્યની યુનિવર્સિટી સંચાલિત લેબોરેટરીમાં RT-PCR ટેસ્ટ કરવાનુ સરકારનુ આયોજન છે, જ્યારે રાજ્ય સરકાર દ્વારા આગાઉથી જ યુનિવર્સિટીની લેબોરેટરીમાં ટેસ્ટિંગ સેન્ટર શરૂ કરવાની જાહેરાત કરવામાં આવી હતી.

આ પણ વાંચો -ગુજરાત સરકારને "સુપ્રીમ" રાહત, હાઈકોર્ટના આદેશ પર લગાવ્યો સ્ટે

રેમડેસીવીર ઇન્જેક્શન એન્ટીજન ટેસ્ટ પોઝિટિવ અને HRCT ટેસ્ટ પોઝિટિવ દર્દીઓને આપવા માટે સરકાર તૈયાર

કોરોનાના કાળો કહેર જે રીતે વર્તી રહ્યો છે અને પ્રથમ લહેર કરતા બીજી લહેરમાં જે રીતે કોરોના માનવીના શરીર પણ એટેક કરી રહ્યો છે. પ્રથમ લહેરમાં 7થી 9 દિવસે ફેફસામાં અસર થતી હતી અને હવે બીજી લહેરમાં વર્તમાન સમયમાં ફક્ત 2 કે 3 દિવસમાં અસર થઇ જાય છે, ત્યારે રેમડેસીવીર ઇન્જેક્શન મહત્વનુ સાબિત થતા હોય તેવુ ડૉક્ટર પ્રિસ્ક્રિપ્શન લખી આપે છે, રાજ્ય સરકાર રેમડેસીવીર ઇન્જેક્શન માટે પહેલા ફક્ત ગંભીર દર્દીઓને ઇન્જેક્શન આપવાની વાત કરી હતી. જ્યારે મંગળવારના રોજ હાઇકોર્ટમાં રાજ્ય સરકાર રેમડેસીવીર ઈજેક્શન એન્ટીજન ટેસ્ટ પોઝિટિવ અને HRCTટેસ્ટ પોઝિટિવ દર્દીઓને આપવા માટે સરકાર તૈયાર હોવાનુ જણાવ્યુ હતુ.

આ પણ વાંચો -સરકાર કોરોનાના પારદર્શી અને સાચા આંકડા જાહેર કરે - ગુજરાત હાઇકોર્ટ

રાજ્ય સરકારે 5.74 હજાર રેમડેસીવીર ઇન્જેક્શનનો ઓર્ડર કર્યો

ગુજરાત હાઇકોર્ટમાં રાજ્ય સરકારે કરેલી કામગીરી બાબતે જણાવ્યુ હતુ કે, રાજ્ય સરકારે 1 એપ્રિલથી 18 એપ્રિલ સુધી 5,74,000 રેમડેસીવીર ઇન્જેક્શનનો ઓર્ડર કર્યો છે, જ્યારે RT-PCR ટેસ્ટિંગની સંખ્યા વધારવામાં આવી છે, જ્યારે રાજ્યમાં 98 લેબોરેટરી ટેસ્ટિંગ માટે કાર્યરત કરવામાં આવી છે. આ ઉપરાંત 33 જિલ્લાઓમાં RT-PCR ટેસ્ટિંગના મશીનો પણ મૂકવામાં આવ્યા છે. ઉપરાંત 12 જિલ્લામાં નવી લેબોરેટરી પણ બનવાની વાત હાઇકોર્ટમાં સરકાર દ્વારા કરવામાં આવી છે.

આ પણ વાંચો -કોરોનાને કાબૂમાં લેવા ગુજરાત હાઇકોર્ટ એડવોકેટ એસોસિએશને કરી સ્ટેન્ડિંગ એડવાઈઝરી કમિટી બનાવવાની માગ

રિયલ ટાઈમ બેડની ઉપલબ્ધતા સરકારનું આયોજન

રાજ્યના તમામ જિલ્લામાં કેટલા બેડ ખાલી છે, કેટલા બેડ ભરેલા છે અને ICU અને ઓક્સિજન વાળઆ કેટલા બેડ ખાલી છે, તે તમામની વિગતો રાજ્યના નાગરિકોને ઓનલાઇન પ્રાપ્ત થાય તે માટે રિયલ ટાઇમ બેડની ઉપલબ્ધતાનુ આયોજન સરકાર દ્વારા કરવામાં આવી રહ્યુ છે, જિલ્લા પ્રમાણે આ વ્યવસ્થા ગોઠવવામાં આવશે, જ્યારે અમદાવાદમાં પણ બને તેટલું ઝડપી રિયલ ટાઈમ બેડ ઉપલબ્ધીના આંકડા મળે તે માટે પણ સરકારનું આયોજન હોવાનુ હાઇકોર્ટમાં જવાબ આપ્યો હતો, જ્યારે સમગ્ર રાજ્યમાં 1,590 સંસ્થાઓમાં કુલ 79,444 પથારીઓ રહલી છે, અને 66.0 ટકા પથારીઓ પર દર્દીઓ દાખલ છે અને અન્ય બાકી રહેલી પથારીઓ ખાલી છે. અમદાવાદ કોર્પોરેશનમાં 14 ટકા, રાજકોટ કોર્પોરેશનમાં 3 ટકા અને સુરત કોર્પોરેશનમાં 18 ટકા પથારીઓ ખાલી છે. અને ઓક્સિજનના કુલ ઉત્પાદનના 70 ટકા આરોગ્ય વિભાગ માટે અનામત રાખવામાં આવ્યો હોવાનો રાજ્ય સરકાર દ્વારા જવાબ રજૂ કરવામાં આવ્યો હતો.

આ પણ વાંચો -રેમડેસીવીર ઉપલબ્ધ કરાવવા હાઇકોર્ટની સરકારને તાકીદ, બે દિવસ બાદ ફરી સુનાવણી

હાઇકોર્ટમાં હવે 26 એપ્રિલના રોજ આગામી સુનાવણી

હાઇકોર્ટમાં કોરોના સુઓમોટો મુદ્દે મંગળવારના રોજ સુનાવણી પૂર્ણ કરવામાં આવી હતી. હાઇકોર્ટ દ્વારા રાજ્ય સરકાર પર અનેક પ્રશ્નો કરવામાં આવ્યો હતો. જેમાં મંગળવારના રોજ સુનવણી પુર્ણ કરવામાં આવી હતી, જ્યારે હવે આગામી 26 એપ્રિલના રોજ ગુજરાત હાઇકોર્ટ ફરી સુનાવણી હાથ ધરવામાં આવશે.

આ પણ વાંચો -25 હજાર ઇન્જેક્શન ગંભીર લક્ષણો ધરાવતા લોકોને ઉપલબ્ધ કરાવવામાં આવી રહ્યા છે: રાજ્ય સરકાર