અમદાવાદ જિલ્લામાં બે દિવસમાં 1,559 યુનિટો શરૂ થયાં, 30,000 લોકોને રોજગારી મળવાની શરૂ

વર્તમાનમાં કોરોના પરિસ્થિતિને કારણે સોશિયલ ડિસ્ટન્સિંગ જાળવવા માટે રાજ્ય સરકાર દ્વારા જે તે જિલ્લામાં રહેલા પ્રધાનો જિલ્લા કચેરી ખાતેથી જ ઑનલાઇન વિડિયો કોન્ફરન્સિંગમાં સહભાગી થાય છે, આજે બુધવારે મહેસૂલપ્રધાન કૌશિક પટેલ અમદાવાદ કલેક્ટર કચેરીથી રાજ્ય મંત્રીમંડળની ચોથી વીડિયો કોન્ફરન્સ કેબિનેટની બેઠકમાં સહભાગી થયા હતાં. જેમાં અમદાવાદ જિલ્લામાં છેલ્લા બે દિવસમાં 1559 યુનિટો શરૂ કરવામાં આવ્યા છે, તેની ચર્ચા થઈ હતી.

અમદાવાદ- ઑનલાઇન બેઠક બાદ મહેસૂલપ્રધાન કૌશિક પટેલે જણાવ્યું હતું કે, આજની તારીખે અમદાવાદ જિલ્લામાં ગ્રામ્ય સહિતના કુલ 1,436 કેસ પોઝિટિવ નોંધાયેલા છે. ૭૪ લોકોને ડિસ્ચાર્જ કરવામાં આવ્યા છે અને કુલ ૫૩ વ્યક્તિઓના મૃત્યુ થયા છે. આજની તારીખે ૬,૯૩૧ લોકોને હોમ કોરેન્ટાઇન રાખવામાં આવ્યા છે. સરકારી અધિકારીઓ, કર્મચારીઓ સાથે ૨૪ કલાક સેવામાં રોકાયેલા ડોક્ટર્સ, પેરા મેડિકલ સ્ટાફ, પોલીસની સક્રિય કામગીરી તેમજ લોકોના લોકડાઉનના પાલનને કારણે આપણે કોરોનાના સંક્રમણને નાથવામાં આપણે મહદઅંશે સફળ રહ્યા છીએ.

બે દિવસ પહેલા રાજ્ય સરકાર દ્વારા વેપારઉદ્યોગ શરૂ થાય, લોકોને રોજગારીના અવસર મળે તે માટે ભારત સરકારના નિયમોને આધીન વેપારઉદ્યોગ ચાલુ થાય તે માટેનો નિર્ણય લેવામાં આવ્યો હતો. આ નિર્ણયને પગલે અમદાવાદ જિલ્લામાં ૧૫,૯૬૩ અરજીઓ મળી હતી. જે અંતર્ગત ૧,૫૫૯ જેટલા યુનિટો શરૂ થયા છે. જેનાથી ૩૦,૦૦૦ હજાર લોકોને રોજગારી મળવાની શરૂ થઇ છે. ઉદ્યોગધંધા શરૂ કરવા અંગે કલેક્ટર કચેરીમાં અરજી મળે તેની આવશ્યકતાઓ- માંગણીઓ ધ્યાનમાં રાખીને કાર્યવાહી કરવામાં આવે છે તેમ તેમણે વધુમાં ઉમેર્યું હતું. અમદાવાદ, સૂરત અને વડોદરાના અમૂક વિસ્તારોમાં કડક લોકડાઉનનો અમલ કરવા માટે કરફ્યુ લાગુ કરાયેલો છે. પરંતુ કોરોનાની પરિસ્થિતિને આધારે ભારત સરકારની માર્ગદર્શિકાઓને ધ્યાનમાં લઇને રાજ્ય સરકાર તેમાં આગળ વધશે. વર્તમાન સ્થિતિને ધ્યાનમાં રાખીને સરકારે ગરીબો માટે રેશન કાર્ડ દ્રારા અન્ન બ્રહ્મ જેવી યોજના દ્વારા ગરીબ અને જરૂરિયાતમંદ લોકો સુધી અનાજ પહોંચાડ્યું છે અને વિવિધ પ્રકારની મદદ દ્વારા લોકોનું જીવન સરળ બની શકે તે માટે રાજ્ય સરકાર દ્વારા પ્રયત્નો કરવામાં આવી રહ્યાં છે.