શાહપુરમાં બાળકોએ રમકડાંની રથયાત્રા યોજી, જોકે માસ્ક પહેરવાનું ભૂલ્યાં

કોરોના મહામારીને ધ્યાનમાં રાખીને ગુજરાત હાઇકોર્ટે આ વર્ષે 143મી રથયાત્રા પર પ્રતિબંધ જાહેર કર્યો છે ત્યારે શહેરના શાહપુર વિસ્તારમાં અનેક બાળકોએ રમકડાંની રથયાત્રા કાઢી હતી. જોકે ચિંતાજનક બાબત એ હતી કે મોટાભાગના બાળકો માસ્ક વગર અને સોશિઅલ ડિસ્ટન્સિંગ વગર જોવા મળ્યાં હતાં.

અમદાવાદ: ગુજરાત હાઈકોર્ટે રાજ્યમાં તમામ સ્થળે રથયાત્રા કાઢવા પર પ્રતિબંધ લાદ્યો છે ત્યારે શાહપુરમાં બાળકો દ્વારા રમકડાંની રથયાત્રા કાઢવામાં આવી હતી. જેમાં કેટલાક મોટા લોકો પણ સામેલ થયાં હતાં. બાળકો દ્વારા કાઢવામાં આવેલી આ રથયાત્રામાં ત્રણ રથ અને રમકડાના અખાડા હતાં. ચિંતાજનક બાબત એ હતી કે મોટાભાગના બાળકોના ચહેરા પર માસ્ક જોવા મળ્યો ન હતો અને સોશિઅલ ડિસ્ટન્સિંગનું પણ પાલન કરવામાં આવ્યું ન હતું.

શાહપુર નાગોરીવાડના છોકરાઓ દ્વારા નાની રથયાત્રા નીકાળવામાં આવી હતી. જેમાં રમકડાંની ટ્રકો, અખાડા અને રથને શામેલ કર્યા હતાં. તમામ ટ્રકોને સુંદર રીતે શણગારવામાં આવ્યાં હતાં. આ વખતે ભક્તો વગર રથયાત્રા મંદિર પરિસરમાં જ પરિક્રમા કરી પૂર્ણ થવાની છે ત્યારે દર વર્ષે રથયાત્રાનો આનંદ માણતાં ભક્તો બાળકો દ્વારા અનોખી રીતે નાની રથયાત્રા નીકાળી રથયાત્રાનો આંનદ માણતાં જોવાં મળ્યાં હતાં.