અમદાવાદમાં ગત રાત્રીથી ધીમી ધારે વરસાદ ચાલુ, ભારે વરસાદની આગાહી

સમગ્ર ગુજરાતમાં સીઝનનો 95 ટકા વરસાદ વરસી ચૂક્યો છે. ત્યારે હવામાન વિભાગે આગાહી કરી છે કે, આગામી 48 કલાક દરમિયાન ગુજરાતમાં ભારેથી અતિભારે વરસાદ વરસી શકે છે. સમગ્ર ગુજરાતમાં વરસાદને લઈને ઓરેન્જ એલર્ટ આપવામાં આવ્યું છે. અતિભારે વરસાદની શકયતાવાળી જગ્યાઓએ NDRFની 13 ટુકડીઓ તૈનાત કરવામાં આવી છે. જ્યારે સમગ્ર ગુજરાતમાં NDRFની ટીમને સ્ટેન્ડ-ટુ રહેવા આદેશ અપાયા છે.

અમદાવાદ: સૌરાષ્ટ્ર હોય કે ઉત્તર ગુજરાત હોય અનરાધાર વરસાદ કારણે નદીઓમાં પુર આવ્યા છે. રાજ્યમાં 44 નદીઓ ઓવરફ્લો થઈ ગઇ છે. કેટલાક લોકોના ડૂબી જવાની ઘટનાઓ પણ બની છે. રાજ્યના 100 ડેમ હાઇ એલર્ટ પર મૂકવામાં આવ્યા છે. જ્યારે બે હજાર જેટલા લોકોને આશ્રયસ્થાનમાં આશરો અપાયો છે. કેટલાક ગામોમાં વીજપુરવઠો પણ ખોરવાયો છે, તેને પણ ઠીક કરવાની કવાયત શરૂ કરી દેવામાં આવી છે.

ત્યારે અમદાવાદ જિલ્લો અને તેની આસપાસના જિલ્લાઓ, તેમજ કચ્છ જિલ્લામાં પણ ભારે વરસાદ વરસી શકે છે. સેટેલાઇટ ઇમેજમાં સમગ્ર ગુજરાતનું આકાશ વરસાદી વાદળોથી ઘેરાયા હોવાનું સ્પષ્ટ દેખાઇ રહ્યું છે. જો અમદાવાદ શહેરની વાત કરવામાં આવે તો, છેલ્લા 24 કલાક દરમિયાન લગભગ 1.25 ઇંચ જેટલો વરસાદ ધીમી ધારે વરસ્યો છે. જ્યારે તેના પહેલા બે દિવસ રાત્રીના સમયગાળા દરમિયાન ધોધમાર 2 ઈંચ જેટલો વરસાદ વરસ્યો હતો. વરસાદ વરસવાને કારણે અમદાવાદ હાટકેશ્વર, ચાંદખેડા, અખબાર નગર, મેમનગર જેવા વિસ્તારોમાં પાણી ભરાયા છે. ત્યારે અમદાવાદ શહેરમાં પાણીના ભરાવાને રોકવા માટે સાબરમતી નદી પરના વાસણા બેરેજનો દરવાજો એક ફૂટ જેટલો ખોલવામાં આવ્યો છે.ભારે વરસાદને પગલે રાજ્ય સરકારે માછીમારોને દરિયો ન ખેડવાની પણ સૂચના આપી છે. તમામ જિલ્લા કલેકટરને પરિસ્થિતિ પર નજર રાખવા સૂચના આપી દેવામાં આવી છે. નાગરિકોને પાણીની જગ્યાએ અને નદીકિનારે નહીં જવાની પણ સૂચના તંત્ર દ્વારા આપી દેવામાં આવી છે.