વાસણાના પ્રવીણનગરમાં જૂથ અથડામણ: 20 વ્યક્તિઓ સામે પોલીસ ફરિયાદ

અમદાવાદમાં વાસણા વિસ્તારમાં આવેલ પ્રવીણનગરમાં બે જૂથ વચ્ચે અથડામણ થઇ હતી. જેમાં 20 થી 25 માણસોના ટોળાએ એકબીજા ઉપર પથ્થરમારો અને પાઈપ જેવા હથિયારો વડે હુમલો કર્યો હતો.

અમદાવાદ: અમદાવાદના વાસણા વિસ્તારમાં આવેલ પ્રવીણનગરમાં બે જૂથ વચ્ચે આજે સવારે દસ વાગ્યાની આસપાસ અથડામણ થઇ હતી. જેમાં 20થી 25 માણસોના ટોળાએ એકબીજા ઉપર પથ્થરમારો અને પાઈપ જેવા હથિયારો વડે હુમલો કર્યો હતો. જેમાં બંને પક્ષે કેટલાક લોકો ઘાયલ થયાં હતાં. તેમને હોસ્પિટલમાં દાખલ કરવામાં આવ્યાં છે. પોલીસને ઘટનાની જાણ થતાં ઘટના સ્થળે પહોંચી હતી, તેમ જ આ તોફાની શખ્સો સામે કાર્યવાહી કરવા વાસણા પોલીસ સ્ટેશન લઈ ગઈ હતી. બંને પક્ષના જૂથોએ એકબીજા સામે ફરિયાદ નોંધાવી છે. બંને પક્ષે થઈને કુલ ૨૦ લોકો સામે એફ.આઇ.આર કરવામાં આવી છે.

અહીંના સ્થાનિકોનું કહેવું છે કે, આ બંને જુથો વચ્ચે અવારનવાર ઝઘડા થતાં આવે છે. આ બંને જૂથોમાં વર્ષો જૂની અદાવત છે. ગઇકાલે પણ બંને જૂથના યુવાનો વચ્ચે એક નાનકડા ઝઘડો થયો હતો અને બંને જૂથોએ સમાધાન કર્યું હતું. પરંતુ આજે સવારે વળી આ જૂથ અથડામણની ઘટના બની હતી.