અમદાવાદ મનપાને હાઈકોર્ટનો સવાલ: લોકો ઘરની બહાર નીકળીને શું ખાશે તે હવે શું કોર્પોરેશન કરશે નક્કી?

આજે ગુજરાત હાઇકોર્ટ(Gujarat High Court)માં ઈંડા અને નોનવેજની લારીઓને ઉપાડી લેવાના કોર્પોરેશનના નિર્ણય ઉપર સુનાવણી(High court hearing on nonveg lorries) હાથ ધરવામાં આવી હતી. સુનાવણીમાં હાઈકોર્ટે અમદાવાદ મહાનગરપાલિકાની(Ahmedabad Municipal Corporation)ઝાટકણી કાઢતા જણાવ્યું કે, વ્યક્તિ પોતાના ઘરેથી બહાર નીકળે ત્યારે તે શું ખાશે એ શું હવે કોર્પોરેશન નક્કી કરશે?

• ઈંડા અને નોનવેજની લારીઓ બાબતે સુનાવણી હાથ ધરવામાં આવી
• રાજ્યમાં અનેક જગ્યાઓ પર આ બાબતે નિર્ણય લેવાશે
• મહાનગરપાલિકાની હાઈકોર્ટે કાઢી ઝાટકણી

અમદાવાદ: આજે ગુજરાત હાઇકોર્ટમાં(Gujarat High Court) ઈંડા અને નોનવેજની લારીઓ હટાવવાં બાબતે 2:30 વાગ્યે સુનાવણી હાથ ધરવામાં આવી(High court hearing on nonveg lorries) હતી. હાઈકોર્ટેમનપાની ઝાટકણી કાઢતા જણાવ્યું કે, ખાવા-પીવાની બાબત પર રોક લગાવવી એવો અધિકાર મ્યુનિસિપલ કમિશ્નરને કોણે આપ્યો? તેમજ વ્યક્તિના ખાવા-પીવાની પસંદગી સત્તાપક્ષના વિચારોને આધીન બનાવી શકાય નહીં. પ્રશાસન મરજીથી વર્તીને લોકોને હેરાન કરે તે ચલાવી નહી લેવાય. હાઈકોર્ટે મનપાને નોટિસ ઇશ્યુ કરી હતી અને સુનાવણી બાદ જવાબમાં મનપાએ કોર્ટ સમક્ષ રજૂઆત કરી હતી કે એવા દબાણો કે જે રાહદારીઓને જાહેર માર્ગથી પસાર થવામાં મુશ્કેલી ઊભી કરતા હોય તેમને દૂર કરવા કોર્પોરેશને નિર્ણય કર્યો હતો.

પ્રશાસન મરજીથી વર્તીને લોકોને હેરાન કરે તે ચલાવી નહી લેવાય : હાઈકોર્ટે

રાજ્યમાં રાજકોટ, અમદાવાદ સહિત અન્ય જિલ્લાઓમાં એકાએક મહાનગરોમાં લારી, ગલ્લાઓ ઉઠાવી લેતા તેમજ પદાધિકારીઓ દ્વારા મીડિયા મારફતે ઈંડા અને નોનવેજની લારીઓને હટાવી લેવાના નિર્ણય જણાવી મનપાના એસ્ટેટ વિભાગ દ્વારા મોટા પાયે ઝુંબેશ હાથ ધરવામાં આવી હતી. જેને લઇને ગુજરાત હાઈકોર્ટમાં અરજી કરાતા આજે સુનાવણી હાથ ધરાઈ હતી જેમાં અરજદારોના હાઇકોર્ટમાં પક્ષ મૂકનારા વકીલે કોર્ટમાં રજૂઆત કરી હતી કે 45 દિવસ સુધી રોજ કમાઈને ખાનારા લોકોની લારીઓ મનપા જપ્ત કરે તે ક્યાં સુધી યોગ્ય?

ભાજપ નેતાનું નિવેદન

ભાજપનાં અગ્રણીએ જણાવ્યું હતું કે, મુખ્યપ્રધાને પહેલાં પણ લોકોએ શું ખાવું અને શું ન ખાવું તે લોકો ઉપર છોડવા કહ્યું હતું આજે તે વાતનું હાઈકોર્ટે સમર્થન કર્યું છે અને ફક્ત સ્વચ્છતાનું ધ્યાન રાખવું જોઈએ.

કોંગ્રેસ નેતાનું નિવેદન

કોંગ્રેસનાં મુખ્ય પ્રદેશ પ્રવકતા મનિષ દોશીએ જણાવ્યું હતું કે, શહેરોમાં રોડ, ગટર ,રસ્તા અને ગેરકાયદેસર બાંધકામની તકલીફો છે તેમજ કોરોનામાં આરોગ્યની સેવાઓ ભાંગી પડી હતી, તેની ઉપરથી ધ્યાન ભટકાવવા માટે સરકાર દ્વારા નોનવેજનો મુદ્દો ઉપાડ્યો હતો. સરકાર લોકો પાસેથી ટેક્ષ વસુલે છે, પણ સેવાઓ આપતી નથી અને નિષ્ફળતાઓને ઢાંકવા માટે સરકાર આવા ગતકડાં કરે છે, પરંતુ નામદાર હાઇકોર્ટે તેમનાં પર ફિટકાર લગાવી છે.

આ પણ વાંચો :જાણો, સુરતમાં શા માટે ઈંડા અને નોનવેજની લારીઓ પર પ્રતિબંધ મૂકવામાં આવ્યો નથી?

આ પણ વાંચો :સૂકા સાથે લીલું બળ્યું: અમદાવાદ AMCએ ઈંડા નોન-વેજની લારીઓ બાદ ખાણીપીણીના લારી ગલ્લા જપ્ત કર્યા