War Against Drugs: ગુજરાતમાંથી 5 મહિનામાં અંદાજિત 24,800 કરોડથી વધુની કિંમતનું ડ્રગ્સ ઝડપાયું

રાજ્યમાં યુવાધનને ડ્રગ્સ દ્વારા બરબાદ કરવાનું ચલણ દિવસે દિવસે વધી રહ્યું હોય તેવા આંકડા સામે આવી રહ્યા છે. ગુજરાતના વિવિધ વિસ્તારોમાંથી છેલ્લા 5 મહિનામાં અંદાજિત કુલ રૂપિયા 24,800 કરોડનું ડ્રગ્સ ગુજરાત પોલીસ અને નાર્કોટિક્સ સેલ દ્વારા ઝડપી પાડવામાં આવ્યું હોવાની માહિતી મળી રહી છે. રાજ્યમાં યુવાધનને બરબાદ કરવા માટે રાજ્યના તેમજ આંતરરાષ્ટ્રીય બજારોમાંથી ડ્રગ્સ ઠલવાતો રહે છે. જેને અટકાવવા માટે નાર્કોટિક્સ કંટ્રોલ બ્યૂરો તેમજ ગુજરાત પોલીસ દ્વારા કડક કાર્યવાહી કરવામાં આવતી રહેતી હોય છે. ગુજરાત નાર્કોટિક્સ સેલ પાસેથી મળેલી માહિતી અનુસાર રાજ્યમાં છેલ્લા 5 મહિનામાં ચરસ, ગાંજો, હેરોઈન સહિત અંદાજિત કુલ રૂપિયા 24,800 કરોડનું ડ્રગ્સ પકડાયું છે.

• છેલ્લા 5 મહિનામાં અંદાજિત 24,800 નું ડ્રગ્સ ઝડપાયું
• 21 સપ્ટેમ્બરે આશરે 150 કરોડનું ડ્રગ્સ પોરબંદરમાં ઝડપાયું હતું
• અદાણી પોર્ટ પરથી આશરે 21000 કરોડનું ડ્રગ્સ ઝડપાયું હતું

ન્યૂઝ ડેસ્ક: ગુજરાતમાં છેલ્લા 5 મહિનામાં અલગ- અલગ જગ્યાએથી આશરે કુલ રૂપિયા 24,800નું ડ્રગ્સ ઝડપી પાડ્યું છે. જેમાં સૌથી વધુ ડ્રગ્સ આશરે 21000 કરોડનું કચ્છના મુન્દ્રામાંથી ઝડપાયું હતું અને પોરબંદરમાં પણ 150 કરોડથી વધુનું ડ્રગ્સ ઝડપી પાડવામાં આવ્યું હતું. તો વિવિધ જગ્યાએથી બાકીનું ડ્રગ્સ ઝડપાયું હતું. જેમાં આજે દ્વારકામાં પકડાયેલું રૂપિયા 350 કરોડનું 66 કિલો ડ્રગ્સ પણ સામેલ છે.

દેવભૂમિ દ્વારકામાંથી 66 કિલોનો ડ્રગ્સનો જથ્થો ઝડપાયો

દેવભૂમિ દ્વારકા જિલ્લામાંથી આજે તા. 10-11-2021ના રોજ ખંભાળિયા હાઈવે પરથી ડ્રગ્સનો જથ્થો મળી આવ્યો છે. જેમાં ખંભાળિયા આરાધના ધામ પાસે કારમાંથી અંદાજિત 66 કિલોનો ડ્રગ્સનો જથ્થો ઝડપાયો છે. જેની કિંમત 350 કરોડથી વધુની જણાવાઈ રહી છે. આ ડ્રગ્સ સમુદ્ર રસ્તે આવી રહ્યું હોવાની બાતમી મળી હતી. જેમાં દ્વારકા SOG અને ગુજરાત ATS દ્વારા સંયુક્ત રીતે તપાસ કરવામાં આવી રહી છે. આ અગાઉ મુદ્રા પોર્ટ પર પણ ડ્રગ્સનો મોટા પ્રમાણમાં જથ્થો ઝડપાયો હતો.

• ગુજરાતમાં તાજેતરમાં પકડાયેલા ડ્રગ્સના જથ્થાની વાત કરીએ તો...

કચ્છમાંથી મળ્યું અંદાજિત 3,600 કરોડ રૂપિયાનું ડ્રગ્સ

કચ્છના મુન્દ્રા પોર્ટમાં પણ ટેલ્કમ પાવડરની આડમાં 1,200 કિલો હેરોઈનનો જથ્થો લઈ જવાતો હોવાનું બહાર આવ્યું હતું. જેની બજાર કિંમત 3,600 કરોડ રૂપિયાની અંદાજવામાં આવી હતી. DRIની ટીમે મુન્દ્રામાં આ હેરોઈનનો જથ્થો પકડી પાડ્યો હતો, જે અત્યાર સુધીનો મળી આવેલો સૌથી મોટો ડ્રગ્સનો જથ્થો હતો. મુન્દ્રા પોર્ટ પર ટેલ્કમ પાવડરની આડમાં કરોડો રૂપિયાના ડ્રગ્સનો જથ્થો લઈ જવાતો હોવાનું બહાર આવ્યું હતું. મુન્દ્રા બંદરે અફઘાનિસ્તાનથી વાયા ઈરાન થઈને પકડાયેલો હેરોઈનનો જથ્થો 1200 કિલો જેટલો હતો, જેની બજાર કિંમત અંદાજીત 3,600 કરોડ રૂપિયાની હતી. હજુ પણ તપાસ ચાલુ છે અને તેની કિંમત અંતિમ કુલ જથ્થા સાથે તેમજ ગુણવતા પ્રમાણે નક્કી કરવામાં આવશે.

અમદાવાદમાં ક્રાઇમ બ્રાન્ચે 250 ગ્રામ ડ્રગ્સ સાથે બે ડ્રગ્સ માફિયાઓને ઝડપી પાડ્યા હતા

ગુજરાત રાજ્ય સહિત અમદાવાદમાં પણ ડ્રગ્સ માફિયાઓ સામે પોલીસે કડક વલણ અપનાવ્યું છે તેમ છતાં ડ્રગ્સ માફિયાઓ બેફામ ફરી રહ્યા છે. 24 ઓક્ટોબરે અમદાવાદમાં ક્રાઇમ બ્રાન્ચે 250 ગ્રામ ડ્રગ્સ સાથે બે ડ્રગ્સ માફિયાઓને ઝડપી પાડ્યા હતા, જે MD ડ્રગ્સની કિંમત 25 લાખ રૂપિયા છે. ઝડપાયેલા બન્ને આરોપીઓ રાજસ્થાનથી સરકારી ST બસમાં ડ્રગ્સનો જથ્થો લઈને અમદાવાદ આવવા માટે નીકળ્યા હતા પરંતુ પોલીસે જાણકારીના આધારે બન્નેને MD ડ્રગ્સ(MD Drugs)સાથે ઝડપી પાડ્યા હતા.

ડીસામાંથી પણ દરોડા દરમિયાન 7,96,700 રૂપિયાના મુદ્દામાલ સાથે ડ્રગ્સ ઝડપાયું હતું

27 સપ્ટેમબરે ડીસા શહેર દક્ષિણ પોલીસે ખાનગી બાતમીના આધારે ડીસા શહેરમાં આવેલી મોઢેશ્વરી સોસાયટીના એક રહેણાંક મકાનમાંથી અંદાજિત આઠેક લાખ રૂપિયાની કિંમતના ડ્રગના જથ્થા સાથે એક શખ્સની અટકાયત કરી હતી. પોલીસે આ સફળ ઓપરેશનમાં શુભમકુમાર પટેલ ઉર્ફે પાબ્લો ઇસ્કોન નામના શખ્સના ઘરે દરોડો પાડ્યો હતો. તેના ઘરમાથી જ 338.60 ગ્રામ ગાંજો, 59.760 ગ્રામ સ્મેક અને 18.25 ગ્રામ મેફેડ્રોન (md)નો જથ્થો તથા 3 મોબાઈલ રોકડ 6,350 સહિત તમામ જથ્થોની કિંમત 7,96,700 રૂપિયા હતી. પોલીસે આ તમામ જથ્થા સાથે શુભમકુમાર પટેલ ઉર્ફે પાબ્લો ઇસ્કોનની અટકાયત કરી હતી.

સુરત ક્રાઈમ બ્રાન્ચની ટીમે 19.62 લાખ રૂપિયાના ડ્રગ્સને ઝડપી પાડ્યું હતું

25 સપ્ટેમ્બરે સુરત ક્રાઈમ બ્રાન્ચને મોટી સફળતા મળી હતી. જેમાં સુરત ક્રાઈમ બ્રાન્ચની ટીમે 19.62 લાખ રૂપિયાના ડ્રગ્સને ઝડપી પાડ્યું હતું. ક્રાઈમ બ્રાન્ચે કડોદરા નિયોલ ચેકપોસ્ટ પરથી ગાડીમાં મેફેડ્રોન ડ્રગ્સ લાવતા ત્રણ આરોપીની પણ ધરપકડ કરી હતી. પોલીસે આરોપી પાસેથી 196.2 ગ્રામ ડ્રગ્સ કબજે કર્યું હતું. આરોપીઓ આ ડ્રગ્સ મુંબઈથી લાવ્યા હોવાનું સામે આવ્યું હતું.

ગુજરાત ATSએ અંદાજીત રૂપિયા 250 કરોડનો હેરોઈનનો જથ્થો જપ્ત કર્યો હતો

ગુજરાત ATS અને indian coast guard દ્વારા તા. 19 સપ્ટેમ્બરે સંયુક્ત ઓપરેશન હાથ ધરવામાં આવ્યું હતું. જેમાં ભારતીય જળ સીમામાંથી અંદાજીત રૂપિયા 250 કરોડના હેરોઇન સાથે સાત ઈરાની નાગરિકોની ધરપકડ કરવામાં આવી હતી. ભારતીય જળ સીમામાંથી 50 કિલો હેરોઇન ઝડપી પાડ્યું હતું. ગુજરાત ATS ને ચોક્કસ બાતમી મળી હતી કે, મોટી માત્રામાં ગુજરાતમાં ડ્રગ્સ પહોંચાડવામાં આવી રહ્યું છે. જે માહિતીના આધારે ગુજરાત ATS ની એક ટીમ સક્રિય થઇ હતી અને ઇન્ડિયન કોસ્ટ ગાર્ડ યુનિટને સાથે રાખી સંયુક્ત ઓપરેશન બનાવવામાં આવ્યું હતું. જેના આધારે ભારતીય જળ સીમામાંથી 50 કિલો હેરોઇન ઝડપી પાડ્યું હતું અને હેરોઇન સાથે સાત ઈરાની નાગરિકોની પણ ધરપકડ કરવામાં આવી હતી. ભારતીય જળ સીમામાં હેરોઇનની હેરાફેરી મામલે ગુજરાતી ATS એ હેરોઇનની તસ્કરીનો પર્દાફાશ કર્યો હતો.

અમદાવાદમાંથી NCBએ 20 કરોડનું કોકેઈન ડ્રગ્સ (drugs) પકડ્યું હતું

12 ઓગસ્ટે અમદાવાદમાં બે અલગ- અલગ સ્થળથી ડ્રગ્સનો જથ્થો ઝડપી પાડવામાં પોલીસ સફળ થઈ હતી. ગુજરાત NCBને 20 કરોડનું કોકેઈન ડ્રગ્સ (drugs)પકડવામાં મોટી સફળતા મળી હતી. આ પકડાયેલા મુદ્દામાલની અંદાજીત આંતરરાષ્ટ્રીય બજાર કિંમત 20 કરોડ હતી, ત્યારે NCB દ્વારા પિલ્લાઇની ધરપકડ કરીને વધુ તપાસ હાથ ધરવામાં આવી હતી. પિલ્લાઈ અગાઉ પણ કેટલીક વાર ડ્રગ્સ(drugs) માટે અમદાવાદ આવી ચૂક્યો હોવાનું સૂત્રો દ્વારા જાણવા મળ્યું હતું. પિલ્લાઈની સાથે અન્ય એક આરોપીની પણ પોલીસે ધરપકડ કરી હતી.

વલસાડમાંથી પણ 4.5 કિલો MD ડ્રગ્સ ઝડપાયું

વલસાડ જિલ્લાના વાપી GIDC વિસ્તારમાં આવેલા ડુંગરી ફળિયામાંથી 4 ઓગસ્ટે ગુજરાત નાર્કોટિક્સ કન્ટ્રોલ બ્યુરો (NCB)ની ટીમે રેડ કરી હતી. રેઇડમાં 4.5 કિલો MD ડ્રગ્સ, 85 લાખ રોકડ સાથે 2 લોકોની ધરપકડ કરી આગળની કાર્યવાહી હાથ ધરી હતી.

આંતરરાષ્ટ્રીય દરિયાઈ સરહદે 150 કરોડના હેરોઈન પાકિસ્તાની 8 ખલાસીઓ ઝડપાયા

17 એપ્રિલે આંતરરાષ્ટ્રીય દરિયાઈ સરહદે 150 કરોડના હેરોઈન સાથે ઝડપાયેલા 8 પાકિસ્તાની શખ્સોને રિમાન્ડની માંગણી સાથે ભુજ કોર્ટમાં રજૂ કરવામાં આવ્યા હતા. ભુજની સ્પેશિયલ એનડીપીએસ કોર્ટે ગુનાની ગંભીરતા સમજી આરોપીઓના 12 દિવસના રિમાન્ડ મંજૂર કર્યા હતા. આરોપીઓની કસ્ટડી ATS ગુજરાતને સોંપાઈ હતી. તેમના દ્વારા વિવિધ મુદ્દાઓ પર તપાસ શરૂ કરવામાં આવી હતી. પકડાયેલા હેરોઇનની કિંમત 150 કરોડ આંકવામાં આવી હતી. હેરોઈનના પેકેટ પાકિસ્તાની બોટમાં યુક્તિપૂર્વક છુપાવાયા હતા. બોટમાં સવાર ઝડપાયેલા પાકિસ્તાની 8 ખલાસીઓને જખૌ કોસ્ટગાર્ડ ખાતે લવાયા હતા. જેઓને રિમાન્ડની માંગણી સાથે ભુજની NDPS કોર્ટમાં રજૂ કરાયા હતા. કોર્ટે આરોપીઓના રિમાન્ડ મંજૂર કર્યા હતા.

1 કરોડની કિંમતના એક કિલો ડ્રગ્સ સાથે એક શખ્સ ઝડપાયો

20 જાન્યુઆરીએ ATSની ટીમે મુંબઇથી આવતા શખ્સની 1 કરોડની કિંમતના એક કિલો ડ્રગ્સ સાથે ધરપકડ કરી હતી. કાર્યવાહી માટે ATSની ટીમે વોચ રાખીને આરોપીને શાહીબાગથી ઝડપી પાડ્યો હતો. પકડાયેલા એક કિલો ડ્રગ્સની આંતરરાષ્ટ્રીય કિંમત પાંચ કરોડ હોવાનું અનુમાન છે. જેમાં આરોપીની ધરપકડ કરીને વધુ તપાસ હાથ ધરી હતી. ગુજરાત ATS વધુ તપાસ હાથ ધરતા માલુમ પડ્યું કે મેથામ્ફેટામાઇન નામનું ડ્રગ્સની કિંમત આંતરરાષ્ટ્રીય બજારમાં 5 કરોડ હોવાનું અનુમાન લગાવવામાં આવે છે.

અર્જુન મોઢવાડિયાએ ડ્રગ્સને મામલે સરકારને આડે હાથે લીધી

ગુજરાત કોંગ્રેસના પૂર્વ પ્રદેશ પ્રમુખ અર્જુન મોઢવાડિયાએ ડ્રગ્સને મામલે સરકારને આડે હાથે લીધી હતી. તેમણે ટ્વિટ કરીને જણાવ્યું છે કે, ગુજરાતમાં ડ્રગ્સનો સપ્લાય બંધ થવાનું નામ લઈ રહ્યો નથી. આજે દ્વારકામાં 66 કિલો (રૂપિયા 3.50 કરોડ) ડ્રગ્સ ઝડપાયું હતું. જેઓ 66 ગ્રામ દવા પર મગરના આંસુ વહાવે છે તેઓ મુન્દ્રાના 21000 કિલો કે 66 KG પર કંઈ કહેશે નહીં. ભાજપની સરકાર ગુજરાતમાં ડ્રગ માફિયાઓને રોકવામાં ભાજપ નિષ્ફળ નિવડી છે.