નાયબ મુખ્યપ્રધાને 108 કોવિડ કંટ્રોલ રુમની મુલાકાત લઈ સેવાઓની સમીક્ષા કરી

કોરોનાના કેસમાં ફરી એક વખત વધારો થતાં તંત્ર દ્વારા કંટ્રોલ રૂમ શરૂ કરવામાં આવ્યો છે. અમદાવાદ શહેરના પૂર્વ છેડે આવેલા કઠવાડા વિસ્તારમાં 108ના સેન્ટરને કોવિડ કંટ્રોલ રૂમ તરીકે રૂપાંતર કરવામાં આવ્યો છે. આ સેન્ટરની મુલાકાતે નાયબ મુખ્યપ્રધાન નીતિન પટેલ આવ્યાં હતાં અને વિવિધ સેવાઓની સમીક્ષા કરી હતી અને કાર્યપદ્ધતિની જાણકારી મેળવી હતી.

• કોરોના કેસમાં વધારાને લઇને તંત્રનો ધમધમાટ
• નાયબ મુખ્યપ્રધાન નીતિન પટેલ 108 સેન્ટરની મુલાકાત લીધી
• કોવિડ કંટ્રોલ રુમ સહિત અન્ય સેવાઓની સમીક્ષા કરી

અમદાવાદ: હવે શહેરના કોરોનાગ્રસ્ત દર્દીઓ 108નો સીધો સંપર્ક કરીને પ્રાથમિક તપાસ કરાવી શકશે. અમદાવાદ શહેરમાં 108ની 80થી વધુ એમ્બ્યૂલન્સ કોવિડ દર્દીઓની સારવાર માટે કાર્યરત કરવામાં આવી છે. અમદાવાદના કઠવાડા સ્થિત 108 એમ્બ્યુલન્સ સેન્ટર દ્વારા કાર્યરત સેવાઓ તેમજ તેની કાર્યપદ્ધતિનું નાયબ સીએમ નીતિન પટેલ દ્વારા વિહંગાવલોકન કરવામાં આવ્યું હતું. તેમણે 108ની સાથે 104, 1100, 181 અભયમ, 112 જેવી અન્ય સેવાઓની પણ સમીક્ષા કરી હતી.

કોરોના કેસમાં વધારાને લઇને તંત્રનો ધમધમાટ

108 કંટ્રોલ સેન્ટરથી કોરોનાના દર્દીઓનું મોનીટરીંગઆ અગાઉ કોરોનાગ્રસ્ત દર્દીને ક્યા સારવાર લેવી, કંઇ હોસ્પિટલમાં સારવાર અર્થે પથારી ખાલી છે તેવા પ્રશ્નો મૂંઝવતાં હતાં.જેના કારણે દર્દીનો અમૂલ્ય સમય વેડફાતો હતો. જેથી દર્દી તરફથી ક્યાં સારવાર મેળવવી તે નક્કી કરવામાં વિલંબ થતો હતો. જેની દરકાર કરીને રાજ્ય સરકાર દ્વારા અમદાવાદ શહેરમાં 108 કંટ્રોલ સેન્ટરથી તમામ કામગીરીનું મોનિટરીંગ અને સંચાલન કરવામાં આવી રહ્યું છે.

દર્દીનું અહીંથી કરાય છે કાઉન્સિલિંગ

કોરોનાગ્રસ્ત દર્દી જ્યારે 108માં ફોન કરે ત્યારે અહીંના તબીબ દ્વારા તેમની સ્વાસ્થ્ય પૃચ્છા કરવામાં આવે છે. દર્દીની સ્થિતિ ગંભીર ન જણાઇ આવતાં અને અન્ય કોઇ પ્રકારની કોમોર્બિડિટી ન જણાતાં દર્દીને હોમ આઇસોલેશનમાં સારવાર શરૂ કરાવવામાં આવે છે. 108 સેન્ટરની જ અન્ય એક સેવા 104 દ્વારા આવા દર્દીઓની સ્વાસ્થ્ય સ્થિતિનું સતત મોનિટરીંગ તેમ જ દર્દીનું કાઉન્સેલિંગ કરવામાં આવે છે.