6 માસથી ડોક્ટરને ફોન કરીને પૈસા આપી દો નહીંતર જોઈ લઈશ તેવી ધમકી આપનારા સામે ફરિયાદ

શહેરમાં એક ડોક્ટરને છેલ્લાં 6 માસથી અજાણ્યો ઈસમ ફોન કરીને મારા પૈસા આપી દે નહીંતર જોઈ લઈશ તેવી ધમકી આપે છે અને હોસ્પિટસલમાં કેટલા પેશન્ટ છે તથા મારો કેસ લખી દો જેવી વાતો કરી મજાક કરી હેરાન કરે છે. જે મામલે વેજલપુર પોલીસે ડોક્ટરની ફરિયાદ નોંધીને તપાસ હાથ ધરી છે.

અમદાવાદઃ કલ્પેશ સાવજીભાઈ નકુમ નામના ડોકટરે ફરિયાદ નોંધાવી છે કે ગત 14 ફેબ્રુઆરીના સાંજે તેઓ ઘરે હતાં ત્યારે એક ફોન આવ્યો હતો. જેમાં હબીબ બોલું છે તેમ કહીનેે મારા પૈસા આપી દો તેવું કહ્યું હતું. જેથી ડોકટરે કહ્યું હતું કે શેના પૈસા ત્યારે સામેવાળી વ્યક્તિએ જણાવ્યું હતું કે મારા માસાને ફોન કર્યો છે ત્યારે ડોકટરે પ્રતિકાર કરતાં જણાવ્યા હતું કે હું ડૉ કલ્પેશ બોલું છું આ તમારા માસાનો નંબર નથી.

પ્રતીકાત્મક તસવીરઃ 6 માસથી ડોક્ટરને ફોન કરીને પૈસા આપી દો નહીંતર જોઈ લઈશ તેવી ધમકી આપનાર સામે ફરિયાદ

ફોન કાપ્યાં બાદ સામેવાળાએ 2-3 વાર ફોન કર્યો હતો. અજાણી વ્યક્તિ અનેક વખત ડોક્ટરને અલગઅલગ નંબર પરથી ફોન કરતી હતી અને પૈસા આપી દો તેવું કહેતી હતી. ક્યારેક રાતે પણ ફોન આવતો હતો. ડોકટર સાથે અગાઉ અપહરણનો બનાવ બન્યો હતો જેથી ડરીને તેમને આ અંગે પોલીસને જાણ કરી હતી.

વેજલપુર પોલીસે ડોક્ટરની ફરિયાદ લઈને કાર્યવાહી શરુ કરી છે. હાલ ફોન નંબરના આધારે આરોપીનું નામસરનામું શોધવા પ્રયત્ન શરૂ કર્યા છે.