શહેરના ટેક્સી ડ્રાઈવરોને લાગ્યું કોરોનાનું ગ્રહણ, 6 મહિનાથી ટેક્સીઓ બંધ

ટેક્સી ડ્રાઈવરો પર કોરોનાની મહામારીની મોટી અસર થઈ છે. સરકાર દ્વારા કોરોનાની મહામારીમાં પ્રવાસન સ્થળોને બંધ કરી દેવામાં આવ્યા છે, જેના કારણે ટેક્સીચાલકોને ભારે નુકસાન સહન કરવાનો વારો આવ્યો છે.

• ટેક્સીના હપ્તા કાઢવા અઘરા પડી રહ્યા છે
• છેલ્લા 6 મહિનાથી ટેક્સીઓ ધૂળ ખાઈ રહી છે
• હાલમાં માત્ર ઓફિસ અને દવાખાના માટે ટેક્સી ચાલી રહી છે

અમદાવાદઃ કોરોનાની મહામારીમાં મોટા ભાગના ધંધાઓ પર મોટી અસર થઈ છે. પ્રવાસન ઉદ્યોગમાં ચાલતી ટેક્સીઓ હાલ છેલ્લા 6 મહિનાથી બંધ હાલતમાં છે. કોરોનાની મહામારીમાં સરકાર દ્વારા પ્રવાસન સ્થળો બંધ કરી દેવામાં આવ્યા છે. અમદાવાદના ટેક્સી ડ્રાઇવર એસોસિએશનના સભ્ય અલ્પેશ ત્રિવેદીએ કહ્યું કે, કોરોનાની મહામારીમાં લોકો ઘરની બહાર નીકળતા નથી ત્યારે પ્રવાસન ઉદ્યોગ સાથે સંકળાયેલી ટેક્સીઓ પણ છેલ્લા 6 મહિનાથી બંધ છે.

આ પણ વાંચોઃકોરોના સંક્રમણની વિપરીત અસરો હવે બજારો પર, સૂકા મસાલા અને મરચાના બજારમાં 50 ટકા ગ્રાહકો ઘટ્યા

પ્રવાસન સાથે સંકળાયેલી 70 ટકા ટેક્સી બંધ

કોરોનાની મહામારીમાં ટેક્સી ડ્રાઈવર એસોસિએશનના સભ્યે જણાવ્યું હતું કે, ખાનગી ઓફિસોમાં ચાલતી ટેક્સી, હોટલમાં ચાલતી ટેક્સી, અને દવાખાનામાં ડોક્ટરો માટે ચાલતી ટેક્સી તેમજ સરકારી ઓફિસોમાં કોન્ટ્રાક્ટ પ્રમાણે ચાલતી ટેક્સીઓ જ ચાલી રહી છે. આ પ્રકારની ટેક્સીઓ માત્ર 30 ટકા જેટલી જ છે. બાકીની 70 ટકા જેટલી ટેક્સીઓ પ્રવાસન સાથે સંકળાયેલી છે.

આ પણ વાંચોઃઅંબાજીમાં પ્રવાસીઓ ન આવતા હોટલ, ગેસ્ટહાઉસ અને રેસ્ટોરન્ટના ધંધા પડી ભાંગ્યા

ટેક્સી ડ્રાઈવરોએ ઘરે બેસવાનો વારો આવ્યો

એક શહેરમાંથી બીજા શહેરમાં પ્રવાસન માટે આવતા લોકો ટેક્સીનો ઉપયોગ કરે છે. મોટા ભાગની ટેક્સીઓ પ્રવાસન ઉદ્યોગ સાથે સંકળાયેલી છે, પરંતુ કોરોનાની મહામારીમાં પ્રવાસન ઉદ્યોગો પર બ્રેક લાગી જતા, ટેક્સી સંચાલકો અને ડ્રાઈવરોને ઘરે જ બેસવાનો વારો આવ્યો છે. ટેક્સીના ઉદ્યોગમાં ડ્રાઇવરો પણ ટ્રીપના આધારે કામ કરતા હોય છે, જેને લઇને તેમને પણ ઘરે જ રહેવાનો વારો આવ્યો છે.

ટેક્સીના હપ્તા ભરવા મુશ્કેલ બન્યા
ટેક્સીના સંચાલકો દ્વારા મોટા રોકાણ કરી વાહનો ખરીદવામાં આવે છે. હાલમાં ટેક્સી સંચાલકોને બેંકના હપ્તા ભરવા પણ મુશ્કેલ થયા છે. છેલ્લા 6 મહિનાથી બંધ પડેલી ટેક્સીઓમાં પણ ખર્ચાઓ આવી રહ્યા છે. સરકારને પણ અપીલ છે કે, ટેક્સી સંચાલકોને રાહત આપવામાં આવે. સરકાર કઇ ને કરે તો પણ બેંકમાં ચાલતા વાહનોના હપ્તામાં પણ રાહત આપે તો મોટી રાહત મળી શકે છે.