બી. જે. મેડિકલ કોલેજની માઈક્રો બાયોલોજી લેબોરેટરીમાં 1.04 લાખથી વધુ કોરોના સેમ્પલ ટેસ્ટ કરાયાં

સિવિલ હૉસ્પિટલ સંકુલમાં આવેલી 1200 બેડની હૉસ્પિટલ અનેક દર્દીઓ માટે જીવન સંજીવની પુરવાર થઈ છે. આ હોસ્પિટલમાં અનેક તબીબો, નર્સો, પેરા મેડિકલ સ્ટાફ 24x7 કાર્યરત રહે છે. પરંતુ સિવિલ હૉસ્પિટલ સંકુલમાં આવેલી બી. જે. મેડિકલ કોલેજની માઈક્રો બાયોલોજી લેબોરેટરી પણ સતત 24 કલાક કાર્યરત રહે છે. એટલું જ નહી પરંતુ દિવસરાત શહેરીજનો ઉપરાંત રાજ્યભરમાંથી આવતાં દર્દીઓના સેમ્પલ ટેસ્ટ કરે છે. અત્યાર સુધી અહીં કુલ 1.04 લાખથી વધુ ટેસ્ટ કરાયાં છે.

અમદાવાદઃ માઈક્રો બાયોલોજી ડિપાર્ટમેન્ટના એસોસિએટ પ્રોફેસર ડૉ. સુમિતા સોની કહે છે કે, આ લેબોરેટરી 8 ફેબ્રુઆરી 2020થી સતત કાર્યરત છે. એક પણ રજા લીધા વિના આ સ્ટાફ દિવસ રાત કામ કરતો રહ્યો છે અને એટલે જ અત્યાર સુધીમાં 1,04,000થી વધુ ટેસ્ટ કરી શકાયા છે. આ ઉપરાંત બી.જે.મેડિકલ કોલેજ રેપિડ એન્ટિજન ટેસ્ટીંગ કિટ માટે પણ વેલિડેશન સેન્ટર તરીકે કાર્ય કરે છે. દેશમાં રેપિડ ટેસ્ટ વધતાં તેના વેલીડેશન માટે કામગીરી પણ વધી છે.

અત્યાર સુધી અહીં કુલ 1.04 લાખથી વધુ ટેસ્ટ કરાયાં

લેબોરેટરીના ટ્યુટર ડૉ. દીપા કિનારીવાલા કહે છે કે, ICMR દ્વારા બી. જે. મેડિકલ કોલેજને ક્વોલિટી કંટ્રોલ ટેસ્ટીંગ માટે કામગીરી સોંપવામાં આવી છે. ગુજરાતમાં હાલ 40 જેટલી લેબોરેટરીમાં RT-PCR મેથડથી કોરોનાના ટેસ્ટ કરાય છે. આ લેબોરેટરીઓમાંથી દર માસે સેમ્પલ બી.જે. મેડિકલ કોલેજની લેબોરેટરીમાં ક્રોસ ચેકીંગ માટે મોકલવામાં આવે છે. તેના માટે ICMR દ્વારા ડેટા એન્ટ્રી પોર્ટલ શરૂ કરાયું છે. આ સેમ્પલની એન્ટ્રી એ પોર્ટલમાં કરાય છે. બન્ને લેબોરેટરીનું રિઝલ્ટ પોર્ટલમાં નાંખવામાં આવે છે અને ICMR દ્વારા બન્ને પરિણામોનું એસેસમેન્ટ કરાય છે અને ફાઈનલ રિઝલ્ટ જાહેર કરાય છે. સેમ્પલનું ક્રોસ ચેકીંગ કેમ? તેવા પ્રશ્નના જવાબમાં ડૉ. કિનારીવાલા કહે છે કે, કોઈપણ લેબોરેટરીમાં વ્યક્તિ, મશીન કે અન્ય એરર આવી શકે છે, ત્યારે કોઈ પણ સેમ્પલનું ભૂલભરેલું પરીક્ષણ અનેક સમસ્યાઓ ઉભી કરી શકે છે. ક્રોસ ચેકીંગમાં આવી ભૂલ પકડાઈ જાય અને કોઈ વ્યક્તિ તેનો ભોગ ન બને તે માટે આવી સિસ્ટમ સક્રિય કરાઈ છે. આ પદ્ધતિથી અત્યાર સુધીમાં 500થી વધુ સેમ્પલ ટેસ્ટીંગ ક્વોલિટી કંટ્રોલ માટે કરાયું છે. આજ રીતે બી.જે. મેડિકલ કોલેજનું ક્વોલિટી કંટ્રોલ ટેસ્ટીંગ NIV(PUNE) દ્વારા કરાય છે.

બી. જે. મેડિકલ કોલેજની માઈક્રો બાયોલોજી લેબોરેટરી સતત 24 કલાક કાર્યરત

આસિસ્ટન્ટ પ્રોફેસર ડૉ. દિશા પટેલ કહે છે કે, અમારી લેબોરેટરીમાં 19 માર્ચે રાજ્યનો પ્રથમ પોઝિટિવ કેસ ડાયોગ્નોઝ થયો, ત્યારથી આજ સુધી કોઈ સ્ટાફે એક પણ રજા કે રિષેશ માણી નથી. અમે સતત કાર્યરત રહ્યાં છીએ, જો કે ટેસ્ટીંગના પરિમાણ(કીટ) બદલાતા ગયા તેમ તેમ સતત નિષ્ણાત તબીબો દ્વારા ટેક્નીશીયન્સને તાલિમ પણ આવી રહી છે. બી.જે. મેડિકલ કોલેજની 24 કલાક કાર્યરત રહેતી માઈક્રો બાયોલોજી લેબોરેટરીમાં અત્યાર સુધીમાં કુલ 1.04 લાખથી વધુ ટેસ્ટ કરાયા છે. સલામ છે આવા કર્મવીરોને...