અમદાવાદઃ અમદાવાદની શાન કહેવાતી અને અમદાવાદીઓને એક જગ્યાએથી બીજી જગ્યાએ પહોંચાડવામાં સૌથી મહત્વની ભૂમિકા ભજવતી AMTS બસની સેવાઓ હવે આખા અમદાવાદમાં શરૂ થઇ છે. આ સાથે જ છ મહિનાના લાંબા વિરામ બાદ આજથી બીઆરટીએસની બસ સેવા આજથી શરુ કરવામાં આવી છે. ઉલ્લેખનીય છે કે બીઆરટીએસની 205 બસો આજથી રોડ પર દોડતી થઇ છે.
અમદાવાદમાં AMTS અને BRTS બસો શરૂ, સોશિયલ ડિસ્ટન્સ કયાંક જળવાયું તો ક્યાંક ઉડ્યા ધજાગરા
કોરોના પેનડેમિકમાં સપડાયેલાં મેગા સિટી અમદાવાદના રહેવાસીઓ માટે આજે શહેરની લાઈફલાઈન જેવી જાહેર પરિવહન સિટી બસ સેવાનો પૂર્ણરુપે પુનઃઆરંભ કરવામાં આવ્યો છે. શહેરની જાહેર બસ સેવાના એએમટીએસ અને બીઆરટીએસના વહીવટીતંત્ર એ ગઇકાલે જાહેરાત કરી હતી કે કોરોના ગાઈડ લાઈન્સના ચુસ્ત અમલ સાથે બસ સેવા ફરી તમામ રુટ પર શરુ થશે. જોકે તંત્ર દ્વારા સેનિટાઈઝર અને ફરજિયાત માસ્ક જેવા નિયમનું પાલન તો કરાવાઈ રહ્યું હતું. પરંતુ શહેરવાસીઓ સોશિયલ ડિસ્ટન્સિંગ જાળવીને તંત્રને સહકાર આપવામાં ઠાગાઠૈયાં કરતાં નજરે પડ્યાં હતાં.
આજથી અમદાવાદમાં AMTS અને BRTS બસો શરૂ
જોકે, અત્યાર સુધી પૂર્વની બસો પશ્ચિમમાં ન જતી હોવાથી પ્રવાસીઓને હાલાકી પડતી હતી. પરંતુ બસો ચાલુ કર્યા બાદ પ્રવાસીએ જ સોશિયલ ડિસ્ટન્સના ધજાગરા ઉડાડ્યાં છે. આજથી નદી પરના તમામ બ્રીજ પર હાલ પૂર્વ પશ્ચિમ બસો આવજા કરશે. જોકે પેસેન્જરોની બેઠક ક્ષમતાના 50 ટકા પેસેન્જર બસમાં મુસાફરી કરી શકશે.
બંને બસ સેવા ઉપલબ્ધ થઈ રહી છે. ત્યારે પ્રવાસીઓ દ્વારા જાણે કોરોના હોય જ નહીં તે પ્રકારનું વર્તન કરવામાં આવી રહ્યું છે. જોકે દરેક સ્ટેશન પર મુસાફરોનું થર્મલ ચેકિંગ થઈ રહ્યું છે સાથે જ માસ્ક અને સેનિટાઈઝરની સુવિધા પણ ઉપલબ્ધ કરાઈ છે.